Juan 13:34 - Manobo Sarangani

³⁴ Doen den kaling punù ko kenyo seini. Pegpedekelay kaw te pedowan. Keilangan megpedekelay kaw te pedowan iling te kedakel te pedowan ko kenyo.

Juan 13:34 ပူးပေါင်းရင်းမြစ်များ

Efeso 5:2

Keilangan gayed kaw megpedekelay te pedowan iling te kedakel te pedowan i Cristo kenitadon. Pegkematay i Cristo doton te kros, simelilin sikandin kenitadon, aw yan neinang sikandin iling te ayam-ayam inimetayan amon mesinalay se Timanem.

Juan 15:17

Seini se impunù ko kenyo. Keilangan megpedekelay kaw te pedowan.”

1 Pedro 1:22

So nenenalan kaw den te kebenalan tepad ki Cristo, lininisan kaw den lekat te salà, aw ontò kaw den egpedekelay te pedowan. Meneng ibeg ko, labi kaw pa megpedekelay te pedowan.

Galasya 6:2

Aw megpetebangay kaw, yan egtoloen niyo se punù i Cristo.

1 Juan 3:23

Seini se impunù din kenitadon, te keilangan somalig kidon diyà te Batà din si Jesu Cristo, aw megpedekelay kidon heman te pedowan iling te intoladà din kenitadon.

1 Juan 4:21

Seini se impunù te Timanem kenitadon. Se otaw dakel se pedowan din te Timanem, yan se otaw keilangan dakel heman se pedowan din te menge doma din.

Santiago 2:8

Mèpiya aw toloen niyo se punù te Timanem, sìyan kagi din insolat, “Kedekeli niyo te pedowan se doma otaw iling te peg-aneng-aneng niyo te kenyo pegkeotawun.”

1 Tesalonika 3:12

Egpemoyò kay heman te labi pa megkedakel se pedowan niyo te menge doma otaw egpemenal aw kedita te otaw, iling te kedakel te pedowan day kenyo.

Roma 12:10

Tandà te pegpesakop niyo diyà ki Cristo, neinang kaw den iling te telekedowa, aw yan keilangan megpedekelay kaw te pedowan. Keilangan meagka se pedowan te kedita niyo te pegpesegmanay.

2 Juan 1:5

Simolat a den kamno bayi amon ipeaneng-aneng ko kamno te keilangan megpedekelay kidon te pedowan. Kenà kaling se punù insolat ko kenyo seini, so tapay niyo iyan netegahan lekat te ketebò te pegpemenal niyo ki Cristo kedengan.

Galasya 6:10

Yan seini se mèpiya inangen tadon. Gayed tadon inangen se mèpiya diyà te kedita te otaw, aw labi pa diyà te menge kedowa tadon egpemenal.

1 Juan 3:11

Seini se kebenalan dinineg niyo lekat te pegpemenal niyo ki Cristo kedengan lamig songkani. Keilangan megpedekelay kidon te pedowan.

Menge Hebreo 13:1

Keilangan gayed dakel se pedowan niyo diyà te menge doma otaw egpemenal.

2 Tesalonika 1:3

Menge kedowa day, mèpiya aw megpesiontong kay diyà te Timanem tepad kenyo. Mèpiya se pegpesiontong day, so ontò den magsen se pegpemenal niyo kandin, aw ontò kaw den heman egpedekelay te pedowan.

Galasya 5:22

Meneng se otaw egbeyà-beyaan te Espiritu Santo, seini se eg-inangen din. Egkedekelan din se doma otaw te pedowan, ontò egkeluba, doen kelinaw te pedowan din, egpeketayod te kelimahan, mèpiya se eg-inangen din, egkebowasag sikandin diyà te doma otaw, aw egkeseligan sikandin,

2 Pedro 1:7

Aw meketolò kaw te ibeg te Timanem, keilangan megpeidoway kaw heman. Aw egpeidoway kaw, keilangan dakel heman se pedowan niyo diyà te kedita te otaw.

Kolasas 1:4

Egpesiontong kay diyà kandin so inindanan kay te ontò kaw egsalig diyà ki Jesu Cristo, aw dakel ekon heman se pedowan niyo diyà te kedita te sakop te Timanem.

Galasya 5:6

Diyà te menge otaw nemenal den ki Cristo, wedad elet diyà te otaw tinolì aw otaw wedà tolii. Onawa iyan diyà te Timanem. Meneng ibeg te Timanem, ipekità tadon te benal se pegpemenal tadon pineokit te dakel pedowan tadon.

Juan 17:21

Ibeg ko megsebad dan te pedowan, iling te pegsebad te pedowan ta seini, so sikona Amà, diyà ka kanak, aw diyà a heman kamno. Iling heman kenyan, ibeg ko diyà dan kenita, amon memenal se kedita te otaw dini te keneyonan te insogò a nikaw.

Mat. 5:44

Meneng mikagi a den diyà kenyo te keilangan kedekelan niyo te pedowan se poon niyo. Keilangan gayed kaw megtawal-tawal diyà te Timanem tepad te otaw egpemilang kenyo.

Roma 13:8

Ikà niyo egpengotang amon wedad salà niyo. Meneng ikà niyo palos egwedad te pegpedekelay niyo te pedowan, so aw dakel se pedowan te otaw diyà te doma, timoman den sikandin te kedita te punù ingkeliwat i Moises.

Roma 13:10

Aw dakel se pedowan tadon diyà te doma otaw, wedad palos medaet inangen tadon diyà kandan. Yan aw dakel se pedowan tadon diyà te doma otaw, meketolò kidon te kedita te punù ingkeliwat i Moises.