Juan 12:31 - Manobo Sarangani

³¹ Lekat seini, ipelumun te Timanem se kedita te poon din dini te keneyonan. Dàgen din heman se pengolo te medaet dini te keneyonan si Satanas.

Juan 12:31 ပူးပေါင်းရင်းမြစ်များ

Genesis 3:15

Inangen ko sikiyo megpepoonay, sikona aw bayi, kamno sakop aw kandin bowad-bowad. Bonalan te bowad-bowad din se olo nikaw, aw bengaen no se palo din.”

Mat. 12:28

Meneng aw pineokit te Espiritu Santo se pegpelowà ko te bosaw lekat te otaw, yan ketegahan niyo te dimateng den dini kenyo se peglowan te Timanem.

Juan 14:30

Wedad den nael aldaw te pegtoladà ko kenyo, so agpet den domateng se pengolo te medaet dini te keneyonan, amon domaeg peden kanak. Eked a din dàgi,

Juan 3:19

Seini se doun te ipelumun dan. Pegdateng te iningedanan Lowa dini te keneyonan, neibeg dan te kengitngitan aw kimulu dan te kelowahan, so medaet se eg-inangen dan.

Juan 9:39

Minikagi si Jesus, “Insogò a dini te keneyonan amon ipekità ko se awop te pedowan te kedita te otaw. Se otaw iling te bota so wedà dan kità te kebenalan, yan se tebangan ko amon komità dan. Meneng se otaw eden dan aw kimità dan te kebenalan, yan se pekitaan ko te iling dan te otaw bota.”

Ininang 26:18

amon ketegahan dan se kebenalan, amon tomanan dan te kengitngit aw megpesalo dan diyà te kelowahan, amon mekelowà dan lekat te belad i Satanas aw megpesakop dan diyà te Timanem, aw pegwedaden din se salà dan pineokit te pegpemenal dan diyà kanak, amon kinewaen dan heman se ontong ibegay te Timanem diyà te kedita te batà din.’

1 Korinto 1:20

Wedad den detengan te kebiyasa te otaw eg-ikagi te biyasa dan, aw otaw egtoladà te punù ingkeliwat i Moises, aw otaw teleglawong, so impetaga-taga den te Timanem te kolang pa se kebiyasa te otaw dini te keneyonan.

1 Korinto 1:21

Wedad otaw metaga-taga te Timanem pineokit te kebiyasa dan. Meneng lekat te kebiyasa te Timanem, miglalang sikandin te ipelowà din se otaw memenal te kebenalan ipegtoladà kandan, pengkey doen otaw eg-aneng-aneng te wedad ontong kenyan.

2 Korinto 4:4

so se menge otaw wedà pemenal, impekagsen i Satanas se olo dan amon eked dan kelebeti se Mèpiya Indan tepad te kelangkaw i Jesu Cristo, so egkitaen se keanyag te Timanem diyà te bawa i Cristo.

Efeso 6:12

Kenà otaw se bolawen tadon, meneng bolawen tadon se mededaet sogounun i Satanas pengkey melangkaw dan, aw egbayà-bayà te otaw dini lanto te tanà eg-ogpà diyà te kengitngitan, aw kedita te bosaw metolos eg-inang te medaet.

Kolasas 2:15

Dinaeg te Timanem se kedita te metolos aw eglowan, aw impetaga-taga din te kedita tadon te nenalo den sikandin diyà te kedita dan pineokit te pegkematay i Jesus doton te kros.

Menge Hebreo 2:14

Sikitadon doen lawa egkematay se menge batà te Timanem sìyan. Yan migpekeotaw heman si Jesus amon matay sikandin, so pineokit te pegkematay din, dinaeg din den se eglekatan te kemetayun si Satanas.

1 Juan 3:8

Meneng sakop i Satanas se otaw gayed megpedeleg te peg-inang te salà, so gayed migpedeleg si Satanas te peg-inang te salà lekat te gebii te wedà pa inangi se keneyonan lamig songkani. Yan migpekeotaw se Batà te Timanem si Jesus amon pegbàtan din se kedita te medaet inang i Satanas.

1 Juan 4:4

Menge batà ko te pegpemenal, diyà kaw den te Timanem aw yan domaeg kaw te kedita dan egkeliwat te kagi kenà lekat te Timanem, so doen eg-ogpà diyà te pedowan niyo labi pa melangkaw diyà ki Satanas pengolo te medaet otaw dini te keneyonan.

1 Juan 5:19

Netegahan tadon te sakop kidon te Timanem. Meneng se kedita te otaw egtaking te medaet dini te keneyonan, yan se menge sakop i Satanas.