Ininang 22:3 - Manobo Sarangani

³ “Siaken se doma niyo Judiyo. Timebaw a doton te Tarso, sebad lonsod doton te Silisya. Timilles a dini te Jerusalem. Si Gamaliel se meistro migtoladà kanak. Mig-iling a te kedita te punù egtoloen te kemonaan tadon. Measeb a egtolò te Timanem onawa te keaseb niyo songkani.

Ininang 22:3 ပူးပေါင်းရင်းမြစ်များ

Ininang 26:5

Aw meg-insà ka kandan, mekeindan dan te benal, so netegahan dan te ontò a egtolò te ketanem te menge Judiyo, so siaken se migpelenged te menge Parisiyo.

Ininang 9:11

Minikagi se Pengolo, “Doton ka te dalan iningedanan Metòlid. Pemehai se balay i Judas, so yan se inogpaan te sebad otaw tege Tarso si Saulo. Migtawal-tawal sikandin diyà kanak.

Ininang 5:34

Meneng doen sebad Parisiyo egtoladà te punù ingkeliwat i Moises si Gamaliel. Egsegmanen sikandin te menge doma otaw. Timindeg sikandin amon mikagi, meneng onà din impelowà se menge sogounun i Cristo dalem te peg-ikagi din.

Ininang 21:39

Minikagi si Pablo, “Siaken se Judiyo. Sakop a te Tarso, sìyan dakel lonsod doton te Silisya. Ibeg ko mikagi a diyà te otaw netipon.”

Ininang 21:20

Pegdineg dan kenyan, induyun dan se Timanem. Penga niyan, minikagi dan diyà ki Pablo, “Mèpiya so nemenal den se menge otaw kenà Judiyo, meneng ikà egkelibel te minelalan heman se Judiyo nemenal ki Jesus. Measeb dan pa egtolò te punù ingkeliwat i Moises.

2 Korinto 11:22

Aw domuyun dan te kandan pegkeotawun so Judiyo dan, siak heman se sebad Judiyo. Aw ikegiyen dan te pinemallì te Timanem se kandan pongan te Israel, siak heman se sebad sakop te Israel. Aw domuyun dan te kandan pegkeotawun so sikandan se menge bowad-bowad i Abraham, siak heman se sebad bowad-bowad i Abraham.

Luc. 10:39

Dalem te peg-inang i Marta te kànen, gayed nenenoo se adi din si Maria diyà te dapag i Jesus amon menenalan te itoladà din.

Roma 11:1

Nayan, pengkey wedad nael Judiyo nemenal, meneng ikà niyo eg-aneng-aneng te timinàyog se Timanem te kedita te Judiyo, so siaken heman sebad Judiyo. Si Abraham se kemonaan ko, aw nesakop a heman diyà te pongan i Benjamin.

Ininang 23:6

Netaga-taga si Pablo te kenà egsebad se kedita te obanen te simbahan, so doen egpelenged te Sadusiyo, aw doen doma otaw egpelenged te Parisiyo. Yan minikagi si Pablo diyà kandan, “Menge kedowa ko, siaken se egpelenged te Parisiyo, aw kemonaan ko heman se egpelenged te Parisiyo. Impedini a amon insaen a niyo te aldaw seini, so egpeliman a te peg-antay te Timanem te otaw lekat te nematay.”

Ininang 6:9

Doen menge otaw migdindil kandin. Sikandan se menge tege Sirene aw tege Alejandriya egsimba doton te simbahan iningedanan “Tengke Otaw Nekelowà,” aw menge doma dan tege Silisya, aw tege Asya.

Galasya 1:21

Peglekat ko doton te Jerusalem, dimeleg a doton te Sirya aw doton te Silisya.

Galasya 1:14

Labi a pa measeb diyà te doma ko menge Judiyo onawa te idad ko te peg-iling te punù ingkeliwat i Moises, so labi a pa measeb diyà kandan te pegtolò ko te kedita te ketanem te kemonaan day.

Ininang 23:34

Pegbasa te gobirnador te solat, mig-insà aw kenan se probinsya linekatan i Pablo. Pegketaga-taga din te Silisya se linekatan din,

Ininang 15:41

Tineped dan se menge lonsod doton te probinsya te Sirya aw Silisya. Inantag dan se pedowan te menge otaw egpemenal amon melobos se pedowan dan diyà te Timanem.

Ininang 15:23

Seini se kagi te solat impeibing kandan. “Menge kedowa day kenà Judiyo doton te Antyokya, aw Sirya, aw Silisya. Se simolat kani, yan se menge sogounun i Cristo aw egpengibing te simbahan. Sikami se kedowa niyo.

Ininang 11:25

Penga niyan, dimoton si Bernabe te Tarso amon mengemahà ki Saulo.

Ininang 9:30

Pegketaga-taga te menge doma din kenyan, inibing dan sikandin doton te Sesarya aw impesakay dan diyà te dakel belangay pesalo doton te Tarso.

Luc. 8:35

Penga niyan, dimoton se menge otaw inindanan dan amon komità dan kenyan. Pegdateng dan doton ki Jesus, kinità dan se otaw pinelowaan te bosaw. Nenenoo sikandin kidoen te dapag i Jesus, aw nenelowal den, aw migkèpiya den sikandin. Pegkità dan kenyan, nelemitan dan.

Luc. 2:46

Te iketelo te aldaw, kinità dan sikandin kidoen te dakel simbahan doton te Jerusalem. Dimoma sikandin te menge menenoladà, aw nenenalan sikandin diyà kandan aw mig-insà heman diyà kandan.

Ininang 9:1

Nayan, dalem niyan, gayed egkeopal si Saulo aw egbentakan din se kedita te otaw egpemenal te Pengolo. Dimoton sikandin te ontò pengolo te simbahan te Jerusalem,

Ininang 26:9

“Pengkey siak, kedengan eden ko aw mèpiya se pegpemilang ko te menge otaw egpemenal ki Jesus tege Nasarit.