Ininang 21:8 - Manobo Sarangani

⁸ Keeldawan niyan, nesayo kay pesalo doton te Sesarya. Pegtenà day, dimeleg kay doton te balay i Felipe aw mig-ogpà kay kidoen. Si Felipe se sebad diyà te pito otaw migtelaban te menge sogounun i Cristo doton te Jerusalem. Sikandin heman se menenoladà te kagi te Timanem.

Ininang 21:8 ပူးပေါင်းရင်းမြစ်များ

Ininang 6:5

Pegdineg te kedita te otaw egpemenal kenyan, aneng-aneng dan, mèpiya iyan inangen. Yan pinemallì dan si Esteban, so egpemenal sikandin diyà te Timanem te kedakel te pedowan din, aw egbeyà-beyaan heman te Espiritu Santo. Se doma otaw pinemallì dan, yan si Felipe, aw si Procoro, aw si Nicanor, aw si Timon, aw si Parmenas, aw si Nicolas tege Antyokya timolò te ketanem te menge Judiyo pengkey kenà sikandin Judiyo.

Efeso 4:11

Sikandin se nemegay kenitadon te menge kinemoloan te kebiyasa amon megpetebangay kidon. Doen menge sogounun i Cristo. Doen heman menge telekeliwat te kagi te Timanem. Doen heman menge otaw egtoladà te Mèpiya Indan tepad ki Cristo. Doen heman menge otaw biyasa egpengibing aw egtoladà te menge otaw egpemenal.

2 Timoteo 4:5

Meneng sikona, Timoteo, keilangan gayed ka tomaking te metòlid. Keilangan megpeketagad ka tomayod te kelimahan. Pegtoladà ka te Mèpiya Indan tepad ki Jesu Cristo. Toman ka te kedita insogò te Timanem kamno.

Ininang 28:16

Pegdateng day doton te Roma, wedà kelebosowi si Pablo, meneng impeogpà doton te sebad balay tinonggoan te sondalo.

Ininang 16:13

Pegkesebado, dimoton kay te wayeg lowà te Filipos, so doen ekon kidoen tiponanan te menge otaw megtawal-tawal. Nenenoo kay kidoen te kilid te wayeg, aw migpebelaw-belaway kay te menge bayi netipon kidoen.

Ininang 16:10

Penga niyan, nengemahà kay te sekayan day pesalo doton te Masidonya, so netegahan day te insogò kay te Timanem doton kandan amon megtoladà kay kandan te Mèpiya Indan tepad ki Jesus.

Ininang 9:30

Pegketaga-taga te menge doma din kenyan, inibing dan sikandin doton te Sesarya aw impesakay dan diyà te dakel belangay pesalo doton te Tarso.

Ininang 28:11

Penga te telo se bolan, nesayo kay simakay te sebad pangkò lekat te Alejandriya ngadan din Pingin Timanem tapay impondo kidoen te Malta dalem te eked pekelowà.

Ininang 27:1

Pegpengibing dan ki Pablo pesalo doton te Italya, simakay kay te dakel belangay. Doen sebad serhinto diyà te menge sondalo iningedanan Gropo Augusto ngadan din si Julio impetonggò i Festo ki Pablo aw menge doma otaw kineleboso.

Ininang 23:23

Penga niyan, impeangay te kapitan se dowa serhinto, aw minikagi diyà kandan, “Tiponi niyo se dowa gatos sondalo mipanaw, aw kepitowan sondalo somakay te kodà, aw dowa gatos mengibing te dilek amon meketagad dan, so mesayo kaw kwani alas nowibi te delem pesalo doton te Sesarya.

Ininang 20:13

Ibeg i Pablo, mipanaw doton te Asos. Yan simoway kay kandin. Simakay kay te belangay pesalo doton te Asos amon somongon kay kandin doton.

Ininang 20:6

Inapit a i Pablo doton te Filipos. Mig-ogpà kay kidoen taman te pegkepenga te pista te pegpengaen te pan kenà eglebag. Penga niyan, simakay kay te dakel belangay. Penga te lima se delem, nengonsaeb kay kandan doton te Troas. Mig-ogpà kay kidoen te sebad simana.

Ininang 18:22

Pegdateng din doton te Sesarya, dimeleg doton te Jerusalem amon gomemaw te menge otaw egpemenal kidoen. Penga niyan, dimoton te Antyokya.

Ininang 16:16

Nayan, doen sebad aldaw migpesalo kay doton te wayeg amon megtawal-tawal. Kinità day se sebad allang bayi enitowan. Sikandin se teleetok aw eden se domateng diyà te otaw. Yan dakel se ontong te menge tig-apò din pineokit te peg-etok din.

Ininang 10:1

Kidoen te Sesarya, doen serhinto ngadan din si Cornelio. Sikandin se sebad diyà te menge sondalo iningedanan Gropo Italya. Sikandin se olo te sebad gatos sondalo.

Ininang 21:16

Doen menge otaw egpemenal lekat te Sesarya timaking kenami. In-ated kay dan doton te balay te sebad otaw lekat te Sipro si Mason, nenamay den nemenal ki Cristo. Mig-ogpà kay kidoen kandin.