Ininang 15:3 - Manobo Sarangani

³ Penga niyan, impekesayo dan te menge otaw egpemenal. Peg-okit dan te Fenisya aw Samarya, mig-indan dan te nemenal den se menge otaw kenà Judiyo. Pegdineg te kedita te otaw egpemenal kenyan, ontò dan neluba.

Ininang 15:3 ပူးပေါင်းရင်းမြစ်များ

Ininang 14:27

Pegdateng dan doton te Antyokya, pigtipon dan se kedita te otaw egpemenal amon meg-indan dan te kedita te ininang te Timanem pineokit kandan, so tinebangan dan te Timanem te peg-indan dan te menge otaw kenà Judiyo, aw yan nemenal dan heman te kagi te Timanem.

Ininang 21:5

Pegdateng te aldaw te pegkesayo day, tinekingan kay te kedita dan meama aw bayi aw mengisù. Pegdateng day doton te enay, limongken se kedita day aw migtawal-tawal kay diyà te Timanem. Penga niyan, migsoway kay den.

Tito 3:13

Peg-inang ka te mebatog no itabang diyà te abogado si Sinos aw si Apolos amon mekesayo dan lekat kidoen. Begayi se kelidoan dan amon eked dan pegkolang.

1 Korinto 16:11

Yan eked kepakay aw eked kaw pegsagman kandin. Meneng tebangi niyo sikandin, amon melinaw se pedowan din aw molì diyà kanak, so migpeliman a te peg-olì din dini, sipat menge doma kedowa tadon dini.

1 Korinto 16:6

Meneng aw domateng a kidoen kenyo, menamay a meg-ogpà kidoen, lamig te meobos se pengodan. Aw metoman iyan, sikiyo se megtabang kanak amon meketagad a domeleg pengkey doton te doma ogpeanan.

Roma 15:24

ibeg ko, mapit a doton kenyo te pegpesalo ko doton te Espanya. Ontò a meluba aw mekeogpà a doton kenyo te eked kenamay, aw penga niyan, meketabang kaw kanak te pegdeleg ko doton te Espanya.

Ininang 15:12

Penga niyan, netingen se kedita te otaw aw nenenalan dan. Mig-indan si Bernabe aw si Pablo te menge kepelahan ininang te Timanem pineokit kandan doton te menge otaw kenà Judiyo.

Ininang 28:15

Doen menge otaw egpemenal kidoen te Roma. Pegketaga-taga dan te dimateng kay, doen simongon kenami doton te Foro i Apyo, aw doen menge doma simongon kenami doton te lonsod iningedanan Telo Bentokanan. Pegkità i Pablo kandan, migpesiontong sikandin diyà te Timanem, aw neluba se pedowan din.

Ininang 13:52

Ontò neluba se kedita te otaw egpemenal doton te Antyokya, so egbeyà-beyaan dan te Espiritu Santo.

Ininang 13:48

Pegdineg te menge otaw kenà Judiyo kenyan, ontò dan neluba aw dimuyun dan te Timanem tepad te inikagi i Pablo. Nemenal se kedita te otaw neibeg te kaling pedowan wedad temanan.

Ininang 8:14

Pegketaga-taga te menge sogounun i Cristo doton te Jerusalem te nemenal se tege Samarya te kagi te Timanem, insogò dan si Pedro aw si Juan domoton te Samarya amon megtelaban kandan.

Luc. 15:32

Meneng keilangan megpelelahay kidon aw megpelubahay kidon, so eden ko aw nematay den se adi no, meneng neantay pa kedì. Netalon sikandin, meneng kinità.’”

Ininang 1:15

Doen aldaw netipon se medita otaw egpemenal, dagpò dan menge sebad gatos kelowan. Timindeg si Pedro kidoen aw minikagi,

Ininang 15:1

Nayan, doen menge otaw egpemenal dimateng lekat te Judiya kidoen te Antyokya aw migtoladà dan, kagi dan, “Eked kaw pekelowà lekat te salà niyo singed aw tolien kaw aw tomolò kaw te kedita te punù ingkeliwat i Moises.”

Ininang 15:4

Pegdateng dan doton te Jerusalem, sinagman dan te menge otaw egpemenal, aw menge egpengibing te simbahan, aw menge sogounun i Cristo. Penga niyan, mig-indan si Pablo aw si Bernabe te kedita te ininang te Timanem pineokit kandan.

Ininang 15:22

Penga niyan, migsebad se aneng-aneng te kedita te otaw egpemenal sipat menge sogounun i Cristo aw menge egpengibing te simbahan. Pinemallì dan se dowa otaw tomaking ki Pablo aw si Bernabe domoton te Antyokya. Se pinemallì dan, yan si Silas aw si Judas, se doma ngadan din si Barsabas, so induyun dan te kedita te otaw egpemenal.

Ininang 15:32

Nenamay migtoladà si Judas aw si Silas te menge otaw egpemenal, so telekeliwat dan te kagi te Timanem. Inantag dan se pedowan te menge otaw egpemenal amon melobos se pedowan dan diyà te Timanem.

Ininang 17:15

Doen doma otaw timaking ki Pablo taman te Atenas. Peg-olì dan doton te Berya, inindanan dan si Silas aw si Timoteo te intogon dan i Pablo te ayas dan domoton te Atenas.

Ininang 20:38

Ontò dan nepuluk, so minikagi si Pablo te eked den palos likò doton kandan. Penga niyan, timaking dan kandin doton te dakel belangay sekayan day.