Genesis 15:1 - Manobo Sarangani

¹ Penga niyan, migpekità se Timanem diyà ki Abram, aw minikagi sikandin, “E Abram, ikà egkelemitan. Siak se megkelasag kamno amon eked ka peelegi. Ontò dakel se ontong ibegay ko diyà kamno.”

Genesis 15:1 ပူးပေါင်းရင်းမြစ်များ

Genesis 26:24

Pegkedelem niyan, migpekità se Timanem diyà kandin, aw minikagi sikandin, “Siaken se Timanem egseligan te amay no si Abraham. Ikà egkelemitan, so egdomaan ta. Mèpiya se ibegay ko diyà kamno, aw inangen ko ontò medita se bowad-bowad nikaw, so yan se impakang ko diyà ki Abraham gayed timolò kanak.”

Luc. 12:32

“Ikà niyo egkelemitan. Pengkey pilabok kaw, meneng pinemallì kaw te Timanem amon megpesakop kaw diyà te peglowan din.

Luc. 1:13

Meneng minikagi se anghil, “Zacarias, ikà egkelemitan. Nenenalan se Timanem te intawal-tawal nikaw. Doen batà no meama tomebaw diyà te esawa no, aw keilangan ingedanan no sikandin ki Juan.

Genesis 21:17

Dinineg te Timanem se pegkelag te batà, aw minikagi se anghil te Timanem lekat te langit, “E Agar, nengà lay migkelag ka? Ikà egkelemitan. Dinineg te Timanem se pegkelag te batà no doton sida.

Luc. 1:30

Minikagi heman se anghil, “Maria, ikà egkelemitan, so pinemallì ka te Timanem amon tebangan ka din.

Mat. 8:26

Minikagi si Jesus, “Wedà pa kedì kelobos se pegsalig niyo kanak. Ikà niyo egkelemitan.” Penga niyan, timindeg si Jesus aw sinagda din se kelamag aw balud, aw migkelinaw se lanaw.

Impekità 1:17

Pegkità ko kandin, ontò a nelemitan aw limemlem a diyà te monà din. Wedà a pekeiwal so iling a te otaw nematay. Meneng pinemàdan a din te kowanan belad din aw impetindeg a din. Minikagi sikandin, “Ikà egkelemitan. Siaken se keteboan aw temanan te kedita.

Menge Hebreo 1:1

Gebii, pineokit te menge telekeliwat te kagi te Timanem se peg-ikagi din diyà te menge kemonaan tadon Judiyo. Mekedita se peg-ikagi diyà kandan, aw medita se kinemoloan te peokit te peg-ikagi din kandan.

1 Korinto 3:22

Pengkey siak, aw si Apolos, aw si Pedro, insogò te Timanem se kedita day amon megtabang kenyo. Pengkey eden se ontong dini te keneyonan, pengkey dalem te wedà kaw pa kematay, aw pengkey matay kaw, aw pengkey aldaw seini, aw pengkey modi aldaw, tomalag iyan imbegay te Timanem amon doen ontong niyo,

Ininang 10:22

Timaba dan, “Insogò kay te sebad serhinto si Cornelio olo te sebad gatos sondalo. Sikandin se otaw egpenimanem aw egtolò te Timanem, aw induyun sikandin te medita Judiyo. Doen anghil te Timanem migpunù kandin te ipeangay ka din amon megtoladà ka kandin.”

Mat. 28:5

Na, pegdateng te didowa bayi doton te lebeng, minikagi se anghil, “Ikà niyo egkelemitan. Netegahan ko te inahà niyo si Jesus, sìyan inlansang diyà te kros.

Genesis 15:2

Meneng minikagi si Abram, “E Timanem eglowan diyà te kedita, wedad palos ibegay no diyà kanak mekebegay te keluba te pedowan ko dalem te wedad batà ko. Aw matay a, metig-apò i Elieser tege Damasko se kedita te kedònan ko.

Genesis 15:4

Penga niyan, minikagi se Timanem diyà kandin, “Kenà si Elieser se meketig-apò te kedònan nikaw, so kamno batà meama se meketig-apò te kedònan nikaw.”

Genesis 31:7

Meneng gayed a din beling inekalan, so mekesempolò din todai se pakang din tepad te itandan din diyà kanak. Meneng pineokit te tabang te Timanem kanak, wedà a din peelegi.

Genesis 22:1

Pegkenamay-namay, migtandà se Timanem te pegsalig i Abraham diyà kandin. Timawal se Timanem, “E Abraham.” Timaba si Abraham, “Seini a.”

Genesis 22:20

Nayan, pegkenamay-namay, inindanan si Abraham te doen den menge batà te kedowa din si Nahor, so tinebawan se nayi din si Melca.