Genesis 12:2 - Manobo Sarangani

² Medita se bowad-bowad ibegay ko diyà kamno, aw meinang dan dakel pongan. Mèpiya se ibegay ko diyà kamno, aw inangen ko medengeg se ngadan nikaw. Mèpiya heman se ibegay ko diyà te menge doma otaw pineokit kamno.

Genesis 12:2 ပူးပေါင်းရင်းမြစ်များ

Galasya 3:14

Pineokit te pegkematay i Jesu Cristo, se kèpiyaan impakang te Timanem ki Abraham gebii, yan se minapet den diyà te kedita te otaw pengkey kenà Judiyo, amon mekekinawà kidon te Espiritu Santo, sìyan impakang te Timanem ibegay diyà te kedita te otaw memenal.

Genesis 18:18

so meinang dakel pongan se menge bowad-bowad din, aw mèpiya se ibegay ko diyà te kedita te otaw pineokit kandin.

Genesis 35:11

Minikagi heman se Timanem, “Siaken se Timanem eglowan diyà te kedita. Inangen ko medita se menge bowad-bowad nikaw. Inangen ko medita pongan se menge bowad-bowad nikaw, aw doen heman kandan meinang menge selotan.

Genesis 46:3

Minikagi sikandin, “Siaken se Timanem. Siaken se Timanem egseligan te amay no gebii. Ikà egkelemitan te pegdoton no te Ehipto, so doton te Ehipto inangen ko se menge bowad-bowad nikaw ontò melangkaw pongan.

Genesis 26:4

Inangen ko ontò medita se bowad-bowad nikaw, iling te kedita te menge bitoen doton te langit. Ibegay ko diyà kandan se kedakel te tanà seini. Mèpiya se ibegay ko diyà te kedita te otaw te keneyonan pineokit te bowad-bowad nikaw.

Genesis 24:35

Ontò mèpiya se imbegay te Timanem diyà te amo ko, aw migkeyaman den sikandin. Binegayan sikandin te Timanem te medita karniro, kambing, baka, selapì, bolawan, allang, kamilo, aw asno.

Galasya 3:7

Se kedita te otaw memenal, yan se menge otaw inangen te Timanem iling te bowad-bowad i Abraham amon begayan din dan te impakang din ki Abraham.

Genesis 13:16

Inangen ko medita se bowad-bowad nikaw igsà eked dan kebilang. Labi pa mola se pegbilang te menge napò te tanà.

Genesis 15:5

Inibing te Timanem si Abram doton te lowà te balay, aw minikagi sikandin, “Lengag ka den doton te langit. Pegbilang ka te menge bitoen aw mebatog nikaw. Iling kenyan se kedita te menge bowad-bowad nikaw.”

Genesis 28:14

Inangen ko medita se bowad-bowad nikaw igsà eked dan kebilang iling te menge napò te tanà. Meg-ogpà se menge bowad-bowad no doton te kebelad te tanà pengkey kenan nikaw kitai. Mèpiya se ibegay ko diyà te kedita te otaw dini te keneyonan pineokit kamno aw bowad-bowad nikaw.

Genesis 27:29

Ibeg ko medita se pongan meinang sineligan nikaw, aw medita se otaw lomongken diyà kamno. Mengolo ka diyà te kedita te kedomaan nikaw, aw toloen ka te kedita te kedowa nikaw. Ipelumun te Timanem se kedita te otaw megtompuyus kamno, aw mèpiya se ibegay din diyà te kedita te otaw memegay te mèpiya diyà kamno.”

Genesis 19:29

Meneng pegbaet te Timanem te menge lonsod kidoen te baog sìyan inogpaan i Lot, mig-aneng-aneng se Timanem tepad ki Abraham, aw yan impelowà din si Lot amon eked sikandin kegelà sipat te menge doma otaw.

Roma 4:11

Penga te pegpemenal i Abraham, migpetolì sikandin. Yan se pengilala te inaneng-aneng te Timanem te metòlid sikandin tandà te pegpemenal din te wedà pa tolii. Yan neinang sikandin olo te kedita te otaw egpemenal pengkey wedà dan tolii, so inaneng-aneng heman te Timanem te metòlid dan tandà te pegpemenal dan.

Genesis 18:19

Pinemallì ko sikandin amon megtoladà sikandin te menge batà din aw menge bowad-bowad din te keilangan tomolò dan kanak, aw keilangan meg-inang dan te metòlid. Aw yan se inangen dan, tomanen ko se kedita te impakang ko diyà kandin.”

Genesis 24:1

Nayan, ontò den temoay si Abraham, aw gayed mèpiya se imbegay te Timanem diyà kandin.

Genesis 25:11

Penga te pegkematay i Abraham, mèpiya se imbegay te Timanem diyà te batà din si Isaac, aw mig-ogpà sikandin doton medapag te Beer Lahai Roi.

Genesis 26:3

Peg-ogpà ka dini, aw yan megtabang a kamno, aw mèpiya se ibegay ko diyà kamno. Ibegay ko se kedakel te tanà seini diyà kamno aw diyà te menge bowad-bowad nikaw, so tomanen ko se impakang ko diyà te amay no si Abraham.

Genesis 17:20

Dinineg ko se pinemoyò no tepad ki Ismael, aw yan mèpiya heman se ibegay ko diyà kandin. Ibegay ko diyà kandin se medita batà din aw menge bowad-bowad din. Meinang sikandin kemonaan te sempolò teg dowa datò, aw inangen ko dakel pongan se menge bowad-bowad din.