Galasya 4:9 - Manobo Sarangani

⁹ Meneng songkani, so netegahan niyo den se benal Timanem, aw netegahan kaw din den heman, ikà niyo todà egtaking te ibeg te otaw aw ketanem nekeallang kenyo kedengan.

Galasya 4:9 ပူးပေါင်းရင်းမြစ်များ

1 Korinto 8:3

Meneng se otaw dakel se pedowan din diyà te Timanem, yan se otaw ipetaga-taga te Timanem te batà din den.

Galasya 3:3

Ikà niyo eg-iling te menge otaw wedad inenengen. Pegtebò niyo nemenal, tinebangan kaw te Espiritu Santo. Meneng eden niyo aw meg-aneng-aneng se Timanem te metòlid kaw pineokit te pegsalig niyo te punù ingkeliwat i Moises.

Roma 8:3

So medaet se pedowan tadon, eked kidon peketolò te menge punù ingkeliwat i Moises. Meneng tinebangan kidon te Timanem, so insogò din se Batà din dini te tanà. Migpekeotaw sikandin amon ipelumun tandà te salà tadon. Pineokit te pegkematay din, wedad den eneg te salà, aw eked kidon den keleges tomaking te medaet ibeg te pedowan tadon.

1 Juan 5:20

Netegahan tadon heman te dimini se Batà te Timanem te keneyonan amon ketegahan tadon se benal Timanem. Sikitadon diyà te benal Timanem so diyà kidon te Batà din si Jesu Cristo. Sikandin se benal Timanem, aw sikandin se eglekatan te kaling pedowan wedad temanan.

2 Pedro 2:20

Aw egketaga-taga se menge otaw tepad te Pengolo tadon si Jesu Cristo migpelowà kenitadon, timanan dan te medaet keogpà te otaw dini te keneyonan. Meneng aw meboyo dan, aw todà dan dàgen te kededàtan, ontò medaet se keogpà dan labi pa medaet diyà te keogpà dan te wedà dan pa ketaga-taga tepad ki Cristo.

Menge Hebreo 7:18

Pineokit kenyan, netegahan tadon te sinelilinan den te Timanem se menge tapay punù ingkeliwat i Moises. Wedad den ontong kenyan,

2 Timoteo 2:19

Meneng eked ketodà se kebenalan impetoladà te Timanem, aw egketegahan iyan pineokit te kagi seini, “Netegahan te Pengolo se kedita te otaw egtaking kandin.” Doen heman doma kagi, “Keilangan eked pegpekesalà se kedita te otaw eg-ikagi te egtaking dan te Pengolo.”

Efeso 1:17

Egtawal-tawal a diyà te Timanem simogò te Pengolo tadon si Jesu Cristo, aw sikandin se Timanem Amay ipegduyun tadon. Egpemoyò a diyà kandin te tebangan kaw din pineokit te Espiritu Santo, amon megkebiyasa kaw, aw amon metaga-taga kaw heman te Timanem.

2 Korinto 4:6

Peg-inang te Timanem te keneyonan, mengitngit aw penga niyan ininang din se kelowahan. Iling kenyan se ininang din kanak, so kedengan, iling te doen kengitngit diyà te pedowan ko, so wedà a kilala ki Jesu Cristo. Meneng linowa din den se pedowan ko amon ipekità din kanak se kelangkaw te Timanem diyà te bawa i Cristo.

1 Korinto 13:12

Songkani, se pegketaga-taga tadon, yan se iling te bawa kitaen tadon diyà te ispiho eked ontò kebangal. Meneng doen kwani aldaw domateng, bawa i Cristo se ontò tadon kitaen. Pengkey wedà pa kesikop se netegahan ko, meneng domateng kwani se aldaw mesikop se netegahan ko iling te pegketaga-taga te Timanem kanak.

Roma 8:29

Gebii lekat te keteboan te keneyonan, tapay netaga-taga se Timanem aw sinu se megpesakop diyà kandin. Miglalang sikandin meg-inang kenitadon iling te Batà din si Jesus, so ibeg din meinang se kedita tadon iling te telekedowa, aw meinang si Jesus iling te kakay tadon.

Juan 17:3

Seini se otaw doen kaling pedowan wedad temanan, se otaw netaga-taga kamno, sebad no se ontò benal Timanem, aw netaga-taga heman kanak, si Jesu Cristo insogò no dini te keneyonan.

Juan 10:27

Egpenenalan se karniro ko te kagi ko, aw netegahan ko dan, aw egtaking dan heman kanak.

Juan 10:14

Iling a te mèpiya telediyaga te karniro. Netegahan a te Amay ko aw netegahan ko heman sikandin. Iling heman kenyan se kedita te sakop ko, so netegahan ko dan, aw netegahan a dan heman. Mepakay diyà kanak aw imetayan a amon megpelowà a te otaw megpesakop diyà kanak.

Mat. 11:27

Penga niyan, minikagi si Jesus, “Insalig te Amay ko se kedita diyà kanak. Se Amay ko, yan olò se netaga-taga te kedita tepad kanak, so Batà a din. Siak olò heman se netaga-taga te kedita tepad te Amay ko, aw eked ketaga-taga se otaw tepad kandin singed aw ipetaga-taga ko iyan diyà kandan.

1 Korinto 15:34

Peketòlid kaw. Lengai niyo den se peg-inang niyo te salà. Simolat a kani kenyo amon meyàyà kaw, so medita pa se otaw kidoen kenyo eg-inang te salà, aw wedà ketaga-taga te kebenalan tepad te inang te Timanem.

2 Korinto 11:20

so mepakay diyà kenyo aw ellangen kaw dan, aw ebaten dan se kwarta niyo, aw egawen dan se kedònan niyo. Aw lomowan dan kenyo, pengkey menampak dan kenyo, mepakay diyà kenyo.

Galasya 4:3

Iling kidon kenyan. Te wedà pa dateng si Cristo, iling kidon te batà deitek. Eked kepakay aw eked tadon toloi se ketanem te kemonaan tadon aw ibeg te otaw dini te keneyonan.

Luc. 5:38

Yan keilangan isawol se temek inangen bino diyà te solanan kaling linanit.