Galasya 2:2 - Manobo Sarangani

² Dimoton a te Jerusalem, so yan se ibeg te Timanem impetaga-taga din kanak. Pegdateng day doton, migtipon se kedita day menge sogounun i Cristo doton te kesikmihan. In-indan ko kandan se Mèpiya Indan tepad ki Cristo gayed ko ipegtoladà diyà te menge otaw kenà Judiyo. Eg-ikagi a, se otaw memenal ki Jesus, yan se otaw doen kelowaan lekat te salà, kenà pineokit te pegtolò te punù ingkeliwat i Moises. In-indan ko iyan amon ketegahan te menge doma sogounun i Cristo te metòlid se intoladà ko, aw amon eked dan peg-aneng-aneng te kolang se pegtoladà ko te menge otaw kenà Judiyo.

Galasya 2:2 ပူးပေါင်းရင်းမြစ်များ

Galasya 2:6

Pegdineg dan te intoladà ko, wedad palos tinodà te menge sogounun i Cristo. Aneng-aneng ko, pengkey melangkaw se gulal dan, meneng mig-onawa kay, so diyà te Timanem, kenà sikandan se melangkaw diyà te doma dan otaw nemenal.

Filipos 2:16

aw yan ipegpetaga-taga niyo kandan se Mèpiya Indan te doen kaling pedowan ibegay te Timanem kandan. Aw yan se eg-inangen niyo, eked a keyàyà te aldaw te peglikò i Cristo, so sikiyo se ipekità ko kandin amon ketegahan din te doen ontong te ininang ko.

1 Tesalonika 3:5

Yan se doun te insogò ko si Timoteo doton kenyo. So ontò a dimela kenyo, insogò ko sikandin amon metaga-taga a tepad te pegtaking niyo te Timanem, so netetana a aw neekalan kaw i Satanas, aw yan nebàtan besi se nebatog day doton kenyo.

Galasya 2:9

Si Santiago, si Pedro, aw si Juan ekon se melangkaw diyà te kedita dan menge sogounun i Cristo. Mig-aneng-aneng dan te insogò a te Timanem. Migsebad se pedowan te kedita day menge sogounun i Cristo te mèpiya aw yan se inangen day si Bernabe se megtoladà te menge otaw kenà Judiyo, aw yan se kandan inangen se megtoladà te menge Judiyo. Yan migpeelimenoway kay doton, so migsebad se pedowan te kedita day kenyan.

1 Korinto 9:26

Yan se doun te egpekagsen a te pegtaking ko ki Cristo, iling te otaw egpekagsen se egkagnan lamig domateng te temanan. Iling a heman te otaw egpesontokay gayed egpekesogat te timbang din.

1 Korinto 1:23

Meneng se ipegtoladà day, yan se kebenalan tepad ki Cristo inlansang diyà te kros, pengkey egkebensi se menge Judiyo kenyan, aw eg-aneng-aneng se menge Griego te wedad ontong niyan.

1 Korinto 9:24

Netegahan niyo den, aw doen koyà, pengkey medita se otaw komagnan, meneng sebad olò se kebegayan te ontong. Tayod kaw heman te pegtaking niyo ki Cristo amon mekekinawà kaw heman te kenyo ontong.

1 Korinto 2:2

so ibeg ko, sebad olò se itoladà ko kenyo, yan si Jesu Cristo aw pegkematay din kidoen te kros.

Ininang 15:12

Penga niyan, netingen se kedita te otaw aw nenenalan dan. Mig-indan si Bernabe aw si Pablo te menge kepelahan ininang te Timanem pineokit kandan doton te menge otaw kenà Judiyo.

Ininang 15:4

Pegdateng dan doton te Jerusalem, sinagman dan te menge otaw egpemenal, aw menge egpengibing te simbahan, aw menge sogounun i Cristo. Penga niyan, mig-indan si Pablo aw si Bernabe te kedita te ininang te Timanem pineokit kandan.

Filipos 2:29

Aw domateng sikandin, segmani niyo sikandin taking te keluba te pegkità niyo kandin, so sikandin se kedowa tadon diyà te Pengolo. Keilangan segmanen niyo se kedita te otaw iling kandin,

Galasya 1:16

Impekità te Timanem kanak se Batà din amon itoladà ko doton te menge otaw kenà Judiyo. Penga niyan, wedad otaw dinotonan ko amon megtoladà kanak.

Ininang 23:11

Tengà te delem, migpekità se Pengolo diyà ki Pablo aw minikagi, “Ikà egkelemitan. Mig-indan ka den tepad kanak dini te Jerusalem. Meg-indan ka pa heman doton te Roma.”

Ininang 18:9

Tengà te delem, migpekità se Pengolo diyà ki Pablo, aw minikagi diyà kandin, “Ikà egkelemitan. Ikà eglengà te pegtoladà, meneng ebey ka pa pegtoladà,

Ininang 5:34

Meneng doen sebad Parisiyo egtoladà te punù ingkeliwat i Moises si Gamaliel. Egsegmanen sikandin te menge doma otaw. Timindeg sikandin amon mikagi, meneng onà din impelowà se menge sogounun i Cristo dalem te peg-ikagi din.

Mat. 10:16

“Nayan, peg-ahà kaw amon eked kaw pemilangi te menge mededaet otaw, so iling kaw te ayam-ayam karniro binenganan te menenanap te kebenesan iningedanan lobo. Yan keilangan ontò kaw megpekebiyasa, aw keilangan wedad palos inangen niyo medaet.

Ininang 15:2

Meneng nengela si Pablo aw si Bernabe diyà te intoladà dan sìyan. Migpedindilay dan aw wedà dan pegsebad. Penga niyan, miglalang se menge otaw egpemenal te isogò dan si Pablo aw si Bernabe aw menge doma otaw domoton te Jerusalem amon megkità dan te menge sogounun i Cristo aw menge egpengibing te simbahan tepad te toladà dan sìyan.

Roma 9:16

Yan netegahan tadon den te kenà egpemellien te Timanem se otaw lekat te ibeg dan aw kepagod dan, meneng lekat te keido te Timanem se pegpemallì din.

2 Korinto 12:1

Wedad ontong te pegduyun ko te kanak pegkeotawun, meneng iling te neleges a tomaba te menge otaw kidoen. Meneng iindan ko den kenyo se menge impekità te Pengolo kanak, aw doma impetaga-taga din.

Galasya 1:6

Menge kedowa ko, ontò a nepela kenyo, so te wedà pa kenamay, timinàyog kaw den ekon te Timanem timawal kenyo pineokit te tabang i Cristo. Nemenal kaw den ekon te sebad kemolò toladà tepad te kelowaan te otaw.

Galasya 1:12

so wedad otaw migtoladà te Mèpiya Indan diyà kanak, meneng impetaga-taga i Jesu Cristo kanak se Mèpiya Indan seini.

Galasya 5:7

Kedengan, ontò kaw egtaking te kebenalan, meneng seini, nepela a so limengà kaw den.

2 Timoteo 4:7

Migpekeaseb a iling te otaw egkoyà. Iling a te otaw kimagnan dimateng doton te temanan, so tinoman ko den se kedita impunù te Timanem kanak. Neseligan a te pegtoladà ko te kebenalan pinemenalan tadon,

Menge Hebreo 12:1

Nayan, ontò medita se otaw simalig diyà te Timanem gebii, aw yan impetaga-taga dan diyà kenitadon te ontò egkeseligan se Timanem. Iling te pegkoyà se pegtaking tadon te Timanem dini lanto te tanà, aw yan keilangan tomanan kidon heman te kedita mekeanggà kenitadon iling te inangen te otaw megkekoyà. Keilangan lomengà kidon heman te peg-inang tadon te salà gayed egpekeiket kenitadon. Keilangan megpekagsen kidon komagnan lamig domateng kidon doton te temanan.