Efeso 4:1 - Manobo Sarangani

¹ Nayan, siak se nekeleboso tandà te pegtaking ko te Pengolo, aw yan memoyò a diyà kenyo te keilangan gayed mèpiya se kedita te eg-inangen niyo, sìyan ibeg te Timanem, so yan se tod din te pegtawal din kenyo.

Efeso 4:1 ပူးပေါင်းရင်းမြစ်များ

Kolasas 1:10

Yan se egpemoyoen day amon ibeg te Pengolo tadon se eg-inangen niyo, aw amon gayed sikandin meluba tepad kenyo. Aw yan se inangen niyo, mèpiya se kedita te inang niyo, aw labi kaw pa metaga-taga tepad te Timanem.

Filipos 1:27

Nayan, pengkey eden se domateng kanak, keilangan onawa se inangen niyo diyà te Mèpiya Indan tepad ki Cristo intoladà kenyo. Yan pengkey domoton a kenyo, aw olò a indanan tepad kenyo, ketegahan ko te wedà kealin se pegsalig niyo diyà ki Cristo, aw sebad se pedowan niyo se egpetebangay te pegtoladà niyo te Mèpiya Indan tepad ki Cristo pinemenalan niyo.

1 Tesalonika 2:12

Migtoladà kay kenyo te metòlid. Mig-antag kay te pedowan niyo. Migpunù kay kenyo te keilangan metòlid se eg-inangen niyo mekeluba te Timanem. Sikandin se timawal kenyo amon sekopen kaw din diyà te peglowan din, aw amon mekekinawà kaw te kèpiya din.

2 Pedro 1:3

Tinebangan kidon te Timanem Metolos amon gayed kidon meketolò te ibeg din dalem te peg-ogpà tadon dini lanto te tanà. Yan se ininang din so netegahan tadon den sikandin. Tinawal kidon din amon mekeakop kidon diyà te kelangkaw din aw kèpiya din.

2 Timoteo 1:9

Impelowà kidon din lekat te salà aw tinawal kidon din amon inangen kidon din menge sakop din. Yan se ininang din kenà tandà te peg-inang tadon te mèpiya, meneng tandà te kandin ibeg aw tabang din kenitadon. Gebii te wedad pa palos ininang din, miglalang sikandin megtabang kenitadon pineokit ki Jesu Cristo.

1 Korinto 4:16

Se punù ko kenyo, peg-ilingi niyo se eg-inangen ko.

2 Tesalonika 1:11

Yan se doun te gayed kay egtawal-tawal tepad kenyo. Egpemoyò kay diyà te Timanem te ipetagad kaw din kominawà te ibegay din kenyo. Ibeg day, tebangan kaw te Timanem amon metoman se kedita te ibeg niyo meg-inang te mèpiya tandà te pegsalig niyo kandin.

Efeso 4:17

Nayan, seini se ipunù ko kenyo lekat te Pengolo tadon. Ikà niyo den egtaking te ketanem te otaw kenà egtaking te Timanem, so wedad ontong te aneng-aneng dan.

Genesis 17:1

Peg-apet te kesyaman teg siyam se omay i Abram, migpekità se Timanem diyà kandin, aw minikagi sikandin, “Siak se Timanem eglowan diyà te kedita. Tolò ka kanak. Keilangan gayed ka meg-inang te metòlid.

Roma 12:1

Nayan, menge kedowa ko, ontò mèpiya se keido te Timanem kenitadon, aw yan se doun te megpunù a den kenyo te keilangan betel niyo ibegay se pegkeotawun niyo diyà te Timanem dalem te doen pa pedowan niyo. Aw ibegay niyo se pegkeotawun niyo diyà kandin, kinewaen din iyan, aw ipetaga-taga niyo te melobos se pedowan niyo te pegsimba niyo kandin.

Kolasas 2:6

Pegpemenal niyo ki Jesu Cristo, neinang sikandin Pengolo niyo, aw yan keilangan tomaking kaw kandin te kelikit te aldaw.

1 Pedro 3:9

Aw doen otaw meg-inang te medaet diyà kenyo, ikà niyo eg-inang te medaet diyà kandan. Aw doen otaw megtompuyus kenyo, ikà niyo egtompuyus kandan. Meneng pemoyò kaw diyà te Timanem te keidowan din dan, so pegtawal din kenyo, migpakang sikandin te keidowan kaw din.

2 Korinto 6:1

Egtoloen ko se Timanem simogò kanak aw seini se ipegtoladà ko. Aw nekekinawà kaw te tabang te Timanem, pekitai niyo te doen ontong niyo pineokit te peg-inang niyo te metòlid.

2 Juan 1:5

Simolat a den kamno bayi amon ipeaneng-aneng ko kamno te keilangan megpedekelay kidon te pedowan. Kenà kaling se punù insolat ko kenyo seini, so tapay niyo iyan netegahan lekat te ketebò te pegpemenal niyo ki Cristo kedengan.

1 Pedro 5:10

Pengkey nelimahan kaw den seini, meneng mepenga iyan te eked kenamay. Gayed egtabang se Timanem, aw tinawal kaw din amon megdoma kaw kandin te wedad temanan tandà te pegsebad niyo diyà ki Cristo. Penga te pegtayod niyo te kelimahan, Timanem se meg-inang kenyo mesikop aw domasel, aw sikandin se memegay kenyo te eneg din.

1 Pedro 2:11

Meneng menge kedowa ko egkedekelan ko te pedowan, kenà keneyonan seini se ontò ogpeanan niyo, aw olò kaw iling te mepanaw dini lanto te tanà. Yan megpunù a den kenyo te keilangan eked kaw taking te medaet ibeg te lawa niyo, so pineokit kenyan kebàtan se pegtaking niyo te Timanem.

Menge Hebreo 13:21

Yan se doun te egtawal-tawal a diyà te Timanem egpemegay te kelinaw te begayan kaw te kedita te mèpiya tabang din amon mekebatog kaw tomoman te ibeg din. Ibeg ko heman, tebangan kaw din amon meg-inang kaw te mekeluba kandin pineokit te tabang i Jesu Cristo diyà kenyo. Iduyun sikandin te wedad temanan. Metoman iyan.

Filipos 3:14

Gayed a egpekagsen iling te otaw egkoyà gayed egkagnan pesalo doton te temanan amon mekekinawà a te ontong ibegay te Timanem kanak, so tinawal a din meg-ogpà doton te langit tandà te ininang i Jesu Cristo kanak.

Efeso 5:2

Keilangan gayed kaw megpedekelay te pedowan iling te kedakel te pedowan i Cristo kenitadon. Pegkematay i Cristo doton te kros, simelilin sikandin kenitadon, aw yan neinang sikandin iling te ayam-ayam inimetayan amon mesinalay se Timanem.

Efeso 4:4

Ininang kaw den te Timanem iling te sebad lawa, aw olò sebad se Espiritu Santo mig-ogpà diyà kenyo, so olò sebad se egpelimanan niyo lekat te pegtawal te Timanem kenyo.

Efeso 3:1

Na, siak si Pablo, kineleboso a so egtaking a ki Jesu Cristo aw migtoladà a tepad kandin diyà kenyo menge otaw kenà Judiyo.

Galasya 4:12

Menge kedowa ko, seini se ontò ibeg ko kenyo. Peg-ilingi a niyo, so pegpemenal ko ki Cristo, limengà a te pegsalig ko diyà te punù ingkeliwat i Moises aw mig-iling a heman kenyo kenà Judiyo kenà egsalig te punù, sìyan egtoloen te menge Judiyo. Eked ko palos kelibeli se mèpiya ininang niyo kanak kedengan.

Genesis 5:24

Gayed migpedomaay si Enok aw Timanem lamig te aldaw te pegkewedad din, so binaloy sikandin te Timanem.

Menge Hebreo 3:1

Menge kedowa ko tinawal aw sinakop te Timanem, peg-aneng-aneng kaw den tepad ki Jesus pinemenalan tadon. Sikandin se insogò te Timanem dini te tanà, aw sikandin se egkagon kenitadon doton te Timanem.

2 Korinto 10:1

Na, siak si Pablo doen ipunù ko kenyo lekat te pegketinuud aw keido i Cristo. Siak ekon se telawun aw kidoen a doma niyo, meneng mebolot a ekon aw somolat a kenyo lekat te mediyò.

Tito 2:10

Keilangan eked dan penakaw, meneng mèpiya se inangen dan amon ipetaga-taga dan te gayed dan egkeseligan. Aw iling kenyan se kedita te eg-inangen dan, metaga-taga se menge doma otaw te mèpiya se ipegtoladà tadon tepad te Timanem egpelowà kenitadon.

Kolasas 4:12

Minikagi heman si Epapras sebad heman sakop te probinsya niyo te dakel se pedowan din kenyo. Gayed sikandin egtolò te ibeg i Jesu Cristo. Egtawal-tawal sikandin aw ontò egpemoyò diyà te Timanem te melobos se pegpemenal niyo. Ibeg din ontò kaw metaga-taga te kedita te ibeg te Timanem diyà kenyo.

2 Korinto 5:20

Siak heman se sebad sogounun i Cristo egpengibing te kagi din, so pineokit kanak, ipetaga-taga te Timanem se punù din. So insogò a i Cristo, yan mikagi a diyà kenyo, pegsebadi niyo se pedowan niyo diyà te Timanem.

Ininang 9:31

Penga niyan, wedad den migsamok te otaw egpemenal doton te kedita te lonsod te Judiya aw Galiliya aw Samarya. Nelobos se pedowan dan, aw timolò dan te Pengolo, aw migtabang se Espiritu Santo kandan.

Roma 11:29

Eked ketodà se aneng-aneng te Timanem tepad te otaw pinemallì din aw binegayan din te kèpiyaan.

Efeso 2:10

Meneng pineokit ki Cristo, ininang kidon den te Timanem kaling amon mekeinang kidon te mèpiya, so yan se tapay din inlalang kenitadon.