Efeso 3:9 - Manobo Sarangani

⁹ Insogò a din amon ipetaga-taga ko diyà te kedita te otaw aw eden se tod te Timanem mig-inang te kedita. Wedà din petega-tegahi diyà te otaw gebii aw eden se tod din,

Efeso 3:9 ပူးပေါင်းရင်းမြစ်များ

Kolasas 1:26

Yan se kebenalan wedà din petega-tegahi diyà te menge otaw gebii lamig songkani. Meneng impetaga-taga din den iyan diyà te menge sakop din,

Mat. 13:35

Pineokit kenyan, tinoman din se kagi te telekeliwat te kagi te Timanem gebii, “Megtoladà a te otaw pineokit te tegdeyanan. Iindan ko diyà kandan se wedà ko petega-tegahi lekat te keteboan te keneyonan.”

2 Timoteo 1:9

Impelowà kidon din lekat te salà aw tinawal kidon din amon inangen kidon din menge sakop din. Yan se ininang din kenà tandà te peg-inang tadon te mèpiya, meneng tandà te kandin ibeg aw tabang din kenitadon. Gebii te wedad pa palos ininang din, miglalang sikandin megtabang kenitadon pineokit ki Jesu Cristo.

Kolasas 3:3

Iling te nematay kaw, aw iling te inantay kaw den te Timanem doma ki Cristo pengkey wedà pa iyan pekitai.

Mat. 28:19

Yan isogò ko den sikiyo doton te kebelad te keneyonan. Pegtoladà kaw te kedita te otaw amon tomaking dan kanak. Pemonyagi niyo dan diyà te ngadan te Timanem Amay, aw Batà din, aw Espiritu Santo.

Impekità 4:11

“E Pengolo day Timanem, melangkaw ka, Aw yan keilangan iduyun ka, aw segmanen ka, aw toloen ka te kedita, So sikona se mig-inang te kedita, aw Lekat te kamno ibeg, ininang no se kedita te doen seini.”

Tito 1:2

Insogò a amon ipetaga-taga ko kandan te doen egpelimanan tadon, sìyan kaling pedowan wedad temanan impakang te Timanem gebii. Kenà egkebolalaw se Timanem,

1 Timoteo 3:16

Netegahan te kedita tadon te ontò mèpiya se kebenalan impetaga-taga te Timanem aw pinemenalan tadon. Migpekeotaw si Jesu Cristo aw dimini te tanà. Impetaga-taga te Espiritu Santo te metòlid sikandin. Kinità sikandin te menge anghil. Inindanan se menge otaw kenà Judiyo tepad kandin. Doen otaw nemenal kandin doton te kebelad te tanà. Inengat sikandin doton te langit.

Impekità 13:8

Simbahen iyan te kedita te otaw te keneyonan, sìyan menge otaw wedà kesolat se ngadan dan kidoen te libro sinolatan te ngadan te kedita te otaw begayan te kaling pedowan wedad temanan. Yan se libro insolat te Karniro inimetayan, aw insolat iyan te wedà pa inangi se keneyonan.

1 Pedro 1:20

Gebii te wedà pa peg-inang se Timanem te keneyonan, tapay din pinemallì si Cristo, meneng kaling sikandin insogò dini te tanà amon megpelowà kenyo.

2 Timoteo 4:17

Pengkey timanan dan kanak, meneng migtabang se Pengolo tadon kanak, aw nemegay sikandin kanak te keseg, aw yan nekebatog a migtoladà te Mèpiya Indan tepad kandin diyà te kedita te otaw kenà Judiyo. Pengkey ibeg te menge poon ko imetayan a, meneng impelowà a te Pengolo tadon.

2 Tesalonika 2:13

Menge kedowa day egkedekelan te Pengolo tadon te pedowan, mèpiya aw gayed kay megpesiontong diyà te Timanem tepad kenyo, so lekat te keteboan te keneyonan pinemallì kaw te Timanem amon ipelowà kaw lekat te salà, aw yan se ininang din kenyo pineokit te peglinis te Espiritu Santo kenyo, aw pineokit te pegpemenal niyo te kebenalan.

Kolasas 1:23

Meneng keilangan gayed kaw somalig diyà ki Jesu Cristo, aw keilangan lobosen niyo se pegpemenal niyo kandin. Ikà niyo egsoway lekat te kagi te Timanem pinemenalan niyo tepad ki Cristo, so doen den egpelimanan niyo. Yan se Mèpiya Indan intoladà den diyà te menge otaw doton te kebelad te keneyonan, aw yan heman se ipegtoladà ko.

Efeso 1:4

Gebii te wedà pa inangi te Timanem se keneyonan, tapay kidon din pinemallì amon inangen kidon sakop din pineokit ki Cristo, aw amon meg-aneng-aneng se Timanem te metòlid kidon, aw wedad silahen din diyà kenitadon. So dakel se pedowan te Timanem kenitadon,

1 Korinto 2:7

Meneng se medalem kebiyasa ipegtoladà ko, yan se kebiyasa lekat te Timanem wedà din petega-tegahi diyà te otaw kedengan. Meneng te wedà pa peg-inang se Timanem te keneyonan, tapay din den piglalang te doen kelowaan lekat te salà amon domoma kidon kwani kandin.

Ininang 15:18

Yan se kagi te Pengolo impetaga-taga din gebii.’

Juan 10:30

Siak aw Amay ko migsebad.”

Juan 5:19

Minikagi si Jesus diyà te menge obanen te Judiyo, “Eneng-enengi niyo se kagi ko kenyo. So Batà a te Timanem, wedad palos inangen ko lowà te ibeg te Amay ko. Olò ko inangen se tapay kinità ko eg-inangen te Amay ko. Se inangen din, yan heman se inangen ko,

Juan 5:17

Meneng doen intaba i Jesus kandan, so minikagi sikandin, “Gayed egterbaho se Amay ko pengkey aldaw seini, aw yan se doun te gayed a heman egterbaho.”

Luc. 24:47

Doen heman kagi te Timanem insolat te keilangan megtoladà kaw diyà te kedita te otaw te keneyonan te pegwedaden te Timanem se salà dan aw megselsel dan aw memenal dan kanak. Keilangan megtebò kaw megtoladà kenyan dini te Jerusalem.

Mat. 25:34

so mikagi a diyà te menge otaw lenged te kowanan ko, ‘Taking kaw den kanak, so pinemallì kaw te Amay ko Timanem amon meluba kaw. Metoman den iyan so megtebò a den lomowan diyà kenyo iling te peglalang te Amay ko te wedà pa inangi se keneyonan.

Mat. 10:27

Pengkey eden se inikagi ko diyà kenyo te olò sikitadon, yan se keilangan ikegiyen niyo diyà te menge doma otaw. Pengkey eden se intoladà ko te wedad doma dimineg, yan se keilangan itoladà niyo diyà te kedita te otaw te keneyonan.

Impekità 17:8

Sìyan menenanap mebolot kinità no, doen pedowan din kedengan, meneng nematay den. Meneng te eked kenamay, meantay aw lomowà lekat te awang kidoen te tanà wedad temanan te kedalem. Aw lomowà iyan, iagbel iyan doton te kilot amon ipelumun. Mepela se kedita te otaw te keneyonan, sìyan menge otaw wedà kesolat se ngadan dan kidoen te libro sinolatan te ngadan te kedita te otaw begayan te kaling pedowan wedad temanan. Yan se insolat te wedà pa inangi se keneyonan. Mepela dan so kinità dan se sìyan menenanap mebolot, aw nematay iyan, meneng meantay pa.

Impekità 14:6

Penga niyan, kinità ko se sebad anghil limayang kidoen te tengà-tengà te langit aw tanà. Egtoladà sikandin te mèpiya indan wedad temanan. Yan se intoladà din diyà te kedita te otaw mig-ogpà kidoen te keneyonan, pengkey kenan dan peg-ogpà.

Roma 11:25

Menge kedowa ko kenà Judiyo, doen kebenalan wedà pa petega-tegahi lamig songkani, meneng ipetaga-taga ko den iyan diyà kenyo amon eked kaw peg-aneng-aneng te sikiyo olò se otaw netaga-taga te kebenalan. Metugul se keditaan te Judiyo songkani. Eked dan taking te Timanem singed aw onà megpesakop se kedita te otaw kenà Judiyo pinemallì te Timanem.

Efeso 3:2

Netegahan niyo den besi te insogò a te Timanem amon megtoladà a kenyo te doen tabang din kenyo pengkey kenà kaw Judiyo.

Efeso 6:19

Pegtawal-tawal kaw heman tepad kanak, amon begayan a te Timanem te kebiyasa te pegtoladà ko te kagi din. Pegtawal-tawal kaw tepad kanak amon wedad lamit ko te pegtoladà ko te Mèpiya Indan tepad ki Cristo, sìyan wedà din petega-tegahi diyà te otaw gebii.

Kolasas 4:3

Pegtawal-tawal kaw heman tepad kenami, amon doen aldaw ibegay te Timanem kenami te pegtoladà day te kagi din, sìyan kebenalan tepad ki Cristo wedà din petega-tegahi gebii. Kineleboso a pa seini tandà te pegtoladà ko te kebenalan sìyan.