Efeso 2:3 - Manobo Sarangani

³ Kedengan, iling heman kenyan se kedita tadon, so gayed kidon egtaking te medaet ibeg te pedowan tadon. Pengkey eden se ibeg te lawa aw aneng-aneng tadon, yan se eg-inangen tadon. So yan se ketanem tadon, detengan kidon peden te pelumun te Timanem iling te kedita te otaw kenà egtolò kandin.

Efeso 2:3 ပူးပေါင်းရင်းမြစ်များ

Tito 3:3

so sikitadon egpemenal, wedad heman inenengen tadon kedengan, aw metugul kidon, aw wedà kidon taking te ibeg te Timanem. Neallang kidon te mededaet ibeg te pedowan tadon aw menge kelubahan medaet. Gayed kidon eg-aneng-aneng tepad te medaet inangen tadon diyà te doma otaw, aw gayed kidon eg-ingà. Nebensihan kidon te doma otaw aw nebensi kidon heman kandan.

1 Pedro 1:14

So menge batà kaw den te Timanem, yan keilangan tomolò kaw kandin. Kedengan te wedà kaw pa ketaga-taga te kebenalan, timaking kaw te medaet ibeg te pedowan niyo. Meneng ikà niyo den egtaking kenyan.

Efeso 4:22

Yan keilangan tenanan niyo den se tapay pegkeotawun niyo so yan se linekatan te medaet ketanem tinekingan niyo kedengan, so pineokit kenyan, egkeekalan kaw amon tomaking kaw te medaet ibeg te pedowan niyo, aw yan se mekedaet kenyo.

Roma 13:14

Meneng peg-iling kaw te eg-inangen te Pengolo tadon si Jesu Cristo. Ikà niyo eg-aneng-aneng tepad te pegtoman niyo te medaet ibeg te lawa niyo.

Roma 6:12

Yan eked den kepakay aw beyà-beyaan kaw te salà. Eked den kepakay aw tomolò kaw te medaet ibeg te pedowan niyo.

1 Juan 2:16

Doen medaet ibeg te pedowan, aw doen heman kitaen te otaw aw keibegan dan, aw doen heman pegpelangkaw-langkaw dan tandà te kedònan dan, meneng se kedita niyan kenà lekat te Timanem Amay, so lekat iyan te keneyonan.

Efeso 2:2

Kedengan, gayed kaw egpekesalà. Mig-iling kaw te otaw eg-inang te salà dini te keneyonan. Timolò kaw ki Satanas, pengolo te kedita te bosaw. Sikandin se egbayà-bayà te kedita te otaw kenà egtolò te Timanem.

Juan 8:44

Si Satanas se ontò amay niyo, aw se ibeg din medaet, yan heman se ibeg niyo inangen. Lekat te ketebò te keneyonan, egpengimatay sikandin. Wedad palos labut din te kebenalan, so wedad kebenalan diyà kandin. Aw megkebolalaw sikandin, yan se ketanem te pedowan din, so bolelawun sikandin, aw sikandin se eglekatan te kedita te kebolalaw.

2 Korinto 7:1

Menge kedowa ko egkedekelan ko te pedowan, so yan se menge pakang te Timanem kenitadon, mèpiya aw ontò tadon lobosen se aneng-aneng aw eg-inangen tadon, amon ontò kidon megketòlid pineokit te pegtolò tadon te Timanem.

1 Korinto 4:7

Kenà kaw melangkaw diyà te menge doma otaw, so se kedita te nekinawà niyo, yan se imbowang te Timanem kenyo. Aw lekat te Timanem se kedita, eked kepakay aw megpelangkaw-langkaw kaw, so kenà iyan lekat te kenyo pegkeotawun.

Roma 7:18

Netegahan ko te wedad palos mèpiya kidoen te tapay pedowan ko, so pengkey meibeg a meg-inang te mèpiya, meneng eked ko iyan keinang.

Mar. 4:19

Meneng penga niyan, wedad ontong dan so dàgen dan te ibeg dan tomaking te ketanem te keneyonan, aw ibeg dan megkeyaman amon meluba dan, aw menge doma ibeg dan. Yan se doun te wedad ontong dan diyà te kagi te Timanem dinineg dan.

Genesis 6:5

Kinità te Timanem te ontò medaet se eg-inangen te kedita te otaw dini lanto te tanà, aw tomalag medaet se aneng-aneng aw ibeg dan te kelikit te aldaw.

Roma 11:30

Sikiyo menge otaw kenà Judiyo, wedà kaw tolò te ibeg te Timanem kedengan, meneng so wedà tolò se menge Judiyo, neidowan kaw den te Timanem.

Roma 9:22

Iling heman kenyan se ininang te Timanem, so pengkey keilangan ipelumun din se otaw neopalan din amon ipetaga-taga din te sikandin se ontò melangkaw, meneng tandà te kedalem te pedowan din, wedà din dan tagmon pelumuni.

Juan 1:13

Pegkeinang dan batà te Timanem, kenà iyan iling te pegtebaw te otaw dini te keneyonan. Kenà iyan heman lekat te ibeg aw aneng-aneng te otaw. Meneng lekat te ibeg te Timanem, ininang din dan menge batà din.

Genesis 8:21

Peg-adek te Timanem te nadeg niyan, neluba sikandin, aw minikagi sikandin diyà te pedowan din, “Eked a todà pegpelumun te tanà tandà te medaet inang te otaw, so netegahan ko te gayed medaet se ibeg te pedowan te otaw lekat te pegtebaw dan. Eked a todà peg-igelà te kedita te otaw aw menenanap iling te ininang ko den.

2 Pedro 2:18

Iling te medalem se ipegtoladà dan, meneng wedad kebenalan niyan. Pineokit te medaet ibeg te lawa, egboyowen dan se menge otaw kaling timanan te menge doma dan eg-inang te medaet.

2 Pedro 2:14

Aw komità dan te bayi, ibeg dan leyokan dan. Eked lengà se ibeg dan meg-inang te salà. Biyasa dan egboyo te menge otaw egdowa-dowa tepad te pegtaking dan te Timanem. Nelegeb se pedowan dan te peg-ingà. Eked dan pekelowà lekat te pelumun te Timanem.

1 Timoteo 6:9

Meneng se menge otaw egkeibeg megkeyaman, yan se mesayo meboyo aw keekalan te ibeg dan wedad ontong aw mekedaet kandan, aw yan detengan dan te mekebebaet.

Galasya 3:22

Meneng eked iyan kebatog, so doen kagi te Timanem insolat te nekesalà se kedita te otaw. Meneng olò pineokit te pegpemenal ki Jesu Cristo se pegkekinawà te mèpiya impakang te Timanem.

Roma 1:24

Yan se doun te pinebeyaan den dan te Timanem, so gayed medaet se ibeg te pedowan dan. Yan se doun te medaet se ininang dan diyà te doma otaw, aw medaet heman se ininang te doma otaw diyà kandan.

1 Juan 2:8

Pengkey tapay iyan punù, meneng iling heman te kaling punù. Impetaga-taga se kebenalan te punù sìyan pineokit te ininang i Cristo aw pineokit heman te eg-inangen niyo, so migkewedad se kengitngitan dini kenitadon, aw doen den ontò benal kelowahan dini te pedowan tadon.

Ininang 14:16

Kedengan, pinebeyaan te Timanem se eg-inangen niyo kenà Judiyo.

Genesis 5:3

Peg-apet te sebad gatos ketlowan se omay i Adam, timebaw se batà din meama iling kandin. Iningedanan din se batà din ki Set.

Roma 2:14

Wedà ketaga-taga se menge otaw kenà Judiyo tepad te menge punù te Timanem ingkeliwat i Moises. Pengkey wedà dan toledai kenyan, meneng doen aldaw eked dan peg-inang te salà, iling te impunù ingkeliwat i Moises, so netaga-taga dan te doen salà eked dan kepakay inangen.

Roma 5:9

Nayan, so inaneng-aneng den te Timanem te metòlid kidon pineokit te pegkematay i Cristo, netegahan tadon den te ontò kidon din ipelowà lekat te pelumun te modi aldaw.

Roma 5:10

Pengkey poon kidon te Timanem, meneng pineokit te pegkematay te Batà din, migsebad kidon den kandin. So migsebad kidon den kandin, yan netegahan tadon den heman te ontò kidon ipelowà lekat te pelumun pineokit te pegkeantay i Cristo lekat te nematay.

Kolasas 1:21

Kedengan, mediyò kaw kidoen te Timanem, aw minato kaw kandin, so medaet se pedowan niyo kandin aw medaet heman se eg-inangen niyo.

1 Tesalonika 4:13

Menge kedowa day, ibeg day metaga-taga kaw tepad te menge otaw nematay den, amon eked kaw kepuluk iling te otaw wedad egpelimanan dan.

1 Tesalonika 5:6

Yan se doun te keilangan eked kidon peg-iling te menge otaw kenà egpemenal, so iling dan te otaw egtedogi. Meneng keilangan iling kidon te otaw egkeloka aw egpeketagad.