Efeso 2:2 - Manobo Sarangani

² Kedengan, gayed kaw egpekesalà. Mig-iling kaw te otaw eg-inang te salà dini te keneyonan. Timolò kaw ki Satanas, pengolo te kedita te bosaw. Sikandin se egbayà-bayà te kedita te otaw kenà egtolò te Timanem.

Efeso 2:2 ပူးပေါင်းရင်းမြစ်များ

Efeso 6:12

Kenà otaw se bolawen tadon, meneng bolawen tadon se mededaet sogounun i Satanas pengkey melangkaw dan, aw egbayà-bayà te otaw dini lanto te tanà eg-ogpà diyà te kengitngitan, aw kedita te bosaw metolos eg-inang te medaet.

1 Juan 5:19

Netegahan tadon te sakop kidon te Timanem. Meneng se kedita te otaw egtaking te medaet dini te keneyonan, yan se menge sakop i Satanas.

Efeso 2:3

Kedengan, iling heman kenyan se kedita tadon, so gayed kidon egtaking te medaet ibeg te pedowan tadon. Pengkey eden se ibeg te lawa aw aneng-aneng tadon, yan se eg-inangen tadon. So yan se ketanem tadon, detengan kidon peden te pelumun te Timanem iling te kedita te otaw kenà egtolò kandin.

Juan 12:31

Lekat seini, ipelumun te Timanem se kedita te poon din dini te keneyonan. Dàgen din heman se pengolo te medaet dini te keneyonan si Satanas.

Efeso 5:6

Ipelumun te Timanem se kedita te otaw eg-inang te medaet iling kenyan, so kenà dan egtolò kandin. Yan peg-ahà kaw amon eked kaw keekali te otaw egpelingo-lingo egtoladà te kebenalan.

Juan 8:44

Si Satanas se ontò amay niyo, aw se ibeg din medaet, yan heman se ibeg niyo inangen. Lekat te ketebò te keneyonan, egpengimatay sikandin. Wedad palos labut din te kebenalan, so wedad kebenalan diyà kandin. Aw megkebolalaw sikandin, yan se ketanem te pedowan din, so bolelawun sikandin, aw sikandin se eglekatan te kedita te kebolalaw.

Efeso 4:22

Yan keilangan tenanan niyo den se tapay pegkeotawun niyo so yan se linekatan te medaet ketanem tinekingan niyo kedengan, so pineokit kenyan, egkeekalan kaw amon tomaking kaw te medaet ibeg te pedowan niyo, aw yan se mekedaet kenyo.

1 Korinto 6:11

Doen otaw kidoen kenyo iling kenyan se eg-inangen dan kedengan, meneng songkani binonyagan kaw den, aw ininang kaw te Timanem otaw egpenimanem, aw eg-eneng-enengen te Timanem te metòlid kaw pineokit te ngadan te Pengolo tadon si Jesu Cristo, aw pineokit te Espiritu Santo.

2 Korinto 4:4

so se menge otaw wedà pemenal, impekagsen i Satanas se olo dan amon eked dan kelebeti se Mèpiya Indan tepad te kelangkaw i Jesu Cristo, so egkitaen se keanyag te Timanem diyà te bawa i Cristo.

1 Juan 5:4

so se kedita tadon menge batà te Timanem, mekedaeg kidon te kedita te medaet dini te keneyonan, so nekedaeg kidon den te medaet pineokit te kebenalan pinemenalan tadon.

1 Juan 3:10

Seini se pengilala amon ketegahan tadon aw sinu se menge batà te Timanem aw menge batà i Satanas. Aw doen otaw kenà metòlid se eg-inangen din aw wedad kedakel te pedowan din te menge doma otaw, yan se otaw kenà batà te Timanem.

1 Pedro 1:14

So menge batà kaw den te Timanem, yan keilangan tomolò kaw kandin. Kedengan te wedà kaw pa ketaga-taga te kebenalan, timaking kaw te medaet ibeg te pedowan niyo. Meneng ikà niyo den egtaking kenyan.

Impekità 20:2

Dinakep din se nagan, yan se memokan gebii, si Satanas. Yan se ginapos din lamig mepenga se sebad melalan se omay.

1 Juan 4:4

Menge batà ko te pegpemenal, diyà kaw den te Timanem aw yan domaeg kaw te kedita dan egkeliwat te kagi kenà lekat te Timanem, so doen eg-ogpà diyà te pedowan niyo labi pa melangkaw diyà ki Satanas pengolo te medaet otaw dini te keneyonan.

1 Pedro 4:3

Keilangan eked kaw todà peg-inang te medaet ininang niyo kedengan, iling te eg-inangen te doma otaw kenà egtaking te Timanem. Kedengan kenà kaw egkeyàyà eg-inang te medaet ibeg te pedowan niyo, aw eglasing kaw, aw egsamok kaw, aw mebolot kaw, aw egpengako kaw te Timanem pineokit te pegsimba niyo te inotaw.

Kolasas 1:21

Kedengan, mediyò kaw kidoen te Timanem, aw minato kaw kandin, so medaet se pedowan niyo kandin aw medaet heman se eg-inangen niyo.

Galasya 1:4

Lekat te kandin ibeg, nematay si Cristo amon meabat se kedita te salà tadon, amon eked kidon taking te menge otaw eg-inang te medaet dini te keneyonan. Timolò si Cristo mig-inang kenyan, so yan se ibeg te Timanem Amay tadon.

Roma 12:2

Ikà niyo egtaking te ketanem te otaw kenà egpenimanem. Meneng pemoyoi niyo te inangen te Timanem kaling se aneng-aneng niyo amon metòlid se eg-inangen niyo. Yan ketegahan niyo aw eden se ibeg te Timanem inangen niyo, so mèpiya iyan, aw kelubahan din, aw wedad kolang niyan.

Santiago 4:4

Timanan kaw den te Timanem, iling te otaw timanan te esawa din aw limakad. Nelibelan niyo den besi se kebenalan seini. Se otaw egtaking te medaet ibeg te otaw dini te keneyonan, yan se otaw timinàyog te Timanem. Pengkey sinu otawi se tomaking te medaet ibeg te otaw dini te keneyonan, yan se otaw meinang poon te Timanem.

1 Korinto 5:10

Meneng se punù ko sìyan, kenà iyan tepad te menge otaw wedà pemenal, aw eg-inang te medaet, aw egkeibeg te kwarta, aw egdampas, aw egsimba te kenà benal timanem, so simpana eked kepakay se pegkità niyo te menge otaw eg-inang te medaet, yan eked kaw peg-ogpà dini te keneyonan.

Ininang 5:3

Nayan, minikagi si Pedro, “Pigbayà-bayà ka i Satanas. Ibeg no peden megkebolalaw ka diyà te Espiritu Santo. Kenà nini se kedakel te keelagà te tanà imbeligyà nikaw.

Juan 15:19

Simpana sakop kaw te menge otaw sìyan, sigalak kaw dan so onawa kaw kandan. Meneng kenà kaw den sakop dan, so nemallì a den kenyo aw impelowà ko den sikiyo lekat kandan. Yan se doun te kebensihan kaw dan.

Juan 14:30

Wedad den nael aldaw te pegtoladà ko kenyo, so agpet den domateng se pengolo te medaet dini te keneyonan, amon domaeg peden kanak. Eked a din dàgi,

2 Pedro 2:14

Aw komità dan te bayi, ibeg dan leyokan dan. Eked lengà se ibeg dan meg-inang te salà. Biyasa dan egboyo te menge otaw egdowa-dowa tepad te pegtaking dan te Timanem. Nelegeb se pedowan dan te peg-ingà. Eked dan pekelowà lekat te pelumun te Timanem.

Juan 16:11

Ipetaga-taga din heman te metoman dan ipelumun te Timanem, so dinaeg se pengolo te medaet dini te keneyonan.

Juan 13:27

Penga te pegkinawà i Judas te pan, dimateng si Satanas diyà kandin. Minikagi si Jesus, “Eyasi se inangen nikaw.”

Juan 13:2

Kimaen dan te iyambong. Kidoen heman si Judas Iscariote, batà i Simon, tapay binoyo i Satanas amon megtolok ki Jesus.

Juan 8:23

Minikagi si Jesus, “Sikiyo se tege tanà, meneng siak se tege langit. Keneyonan se tinikedowan niyo, meneng kenà keneyonan se tinikedowan ko.

Juan 7:7

Eked kaw kebensihi te menge otaw egtaking te ibeg te keneyonan, meneng kebensihan a dan, so gayed a eg-ikagi diyà kandan te medaet se eg-inangen dan.

Mat. 13:38

Se pawà, yan se keneyonan. Se mèpiya benì, yan se menge otaw migpesakop diyà te peglowan te Timanem. Meneng se sagbet, yan se menge sakop i Satanas.

Impekità 13:8

Simbahen iyan te kedita te otaw te keneyonan, sìyan menge otaw wedà kesolat se ngadan dan kidoen te libro sinolatan te ngadan te kedita te otaw begayan te kaling pedowan wedad temanan. Yan se libro insolat te Karniro inimetayan, aw insolat iyan te wedà pa inangi se keneyonan.

1 Juan 3:8

Meneng sakop i Satanas se otaw gayed megpedeleg te peg-inang te salà, so gayed migpedeleg si Satanas te peg-inang te salà lekat te gebii te wedà pa inangi se keneyonan lamig songkani. Yan migpekeotaw se Batà te Timanem si Jesus amon pegbàtan din se kedita te medaet inang i Satanas.

Santiago 1:7

Egdowa-dowa sikandin, aw kenà egkeseligan te pengkey eden se eg-inangen din. Aw iling kenyan se otaw, eden din aw doen ibegay te Timanem kandin.

2 Timoteo 4:10

Tinenanan a den i Demas, so ibeg din se keluba te keneyonan seini. Dimoton sikandin te Tesalonika. Kenan si Cresente, dimoton sikandin te Galasya. Kenan si Tito, dimoton sikandin te Dalmasya.

Ininang 19:35

Penga niyan, sinagda te konsiyal se otaw netipon. Pegkepenek dan, minikagi sikandin, “Menge sakop te Efeso, netaga-taga se kedita te otaw te sikitadon tege Efeso se egtonggò te simbahan te melangkaw timanem tadon si Diana nedagdag lekat te langit.

Luc. 22:31

Penga niyan, minikagi si Jesus diyà ki Pedro, “Simon, penenalan ka kanak. Pinemoyò i Satanas diyà te Timanem amon megtandà kenyo, iling te inangen te otaw meg-etap te omay trigo.

Luc. 16:8

Nayan, pengkey migtostos se sineligan te salà te otaw diyà te amo din, meneng dimuyun se amo kandin, so biyasa sikandin miglalang te kèpiyaan. Pengkey biyasa se menge sakop te Timanem egpengabat te ontong, meneng labi pa biyasa egpengabat te ontong se menge otaw kenà egtaking te Timanem.”

Mat. 11:19

Pegdini ko Timanem Migpekeotaw, kinità dan se ketanem ko te egpengaen a aw eg-inem. Meneng kunù wedà dan penenalan kanak, aw minikagi dan te legoken a aw metiinem a, aw egsigelaken ko se menge iskribinti aw doma otaw nelegeb te salà. Meneng wedad beloyan, so ontò biyasa se Timanem, aw ketegahan iyan te kedita te otaw migpesakop diyà kandin aw komità dan te eg-inangen din.”

Impekità 16:17

In-olà te ikepito anghil se lipong diyà te kelamag, aw doen timawal kidoen te dakel simbahan te Timanem, aw kidoen te onsedanan te peglowan, kagi din, “Nepenga den se kedita.”

Impekità 13:14

Doen menge kepelahan impeinang te tagnà menenanap pineokit te ikedowa, aw yan se doun te nekeakal sikandin te kedita te otaw eg-ogpà kidoen te keneyonan. Migpunù heman kandan amon meg-inang dan te inotaw ipesopo te tagnà menenanap, sìyan nepelian te sondang meneng wedà kematay.

Impekità 12:9

Yan indagdag se dakel nagan lekat te langit. Sikandin se migpelingo-lingo memokan gebii, aw iningedanan ki Satanas, aw biyasa sikandin eg-akal te kedita te otaw te keneyonan. Indagdag sikandin lekat te langit kidoen te tanà sipat kedita te anghil din.

Mat. 13:22

Nayan, se benì nesabog diyà te pinonoan te sagbet doen tigis, yan se iling te otaw ontò domineg te kagi te Timanem intoladà. Meneng penga niyan, wedad ontong din so dàgen sikandin te ibeg din tomaking te ketanem te keneyonan, aw ibeg din megkeyaman amon meluba sikandin. Yan se doun te wedad ontong din diyà te kagi te Timanem dinineg din.

Mar. 4:19

Meneng penga niyan, wedad ontong dan so dàgen dan te ibeg dan tomaking te ketanem te keneyonan, aw ibeg dan megkeyaman amon meluba dan, aw menge doma ibeg dan. Yan se doun te wedad ontong dan diyà te kagi te Timanem dinineg dan.

Efeso 1:21

Yan eglowan si Cristo diyà te kedita te melangkaw aw metolos doton te langit, so labi pa melangkaw se gulal din diyà te kedita te doma gulal, pengkey songkani aw modi aldaw.

Efeso 2:11

Sikiyo menge otaw kenà Judiyo, eneng-enengi niyo tepad te pegkeotawun niyo kedengan. Egkebensihan kaw te menge Judiyo egpemetolì, so wedà kaw taking te ketanem day sìyan.

Efeso 2:13

Pengkey mediyò kaw lekat te Timanem kedengan, meneng pegpemenal niyo ki Cristo, impedapag kaw te Timanem pineokit te pegkematay i Cristo doton te kros.

Efeso 4:17

Nayan, seini se ipunù ko kenyo lekat te Pengolo tadon. Ikà niyo den egtaking te ketanem te otaw kenà egtaking te Timanem, so wedad ontong te aneng-aneng dan.

Efeso 5:8

Kedengan, diyà kaw te kengitngitan, so wedà kaw pa ketaga-taga tepad te Timanem. Meneng songkani diyà kaw den te kelowahan, so migpesakop kaw diyà te Pengolo tadon. Yan keilangan imendayan niyo se keogpà niyo diyà te kelowahan.

Santiago 1:27

Meneng se otaw ontò egtaking te Timanem Amay, yan se otaw egpenabang te menge doma otaw nelimahan, pengkey menilo aw bayi balo. Kenà heman eg-iling te medaet ketanem te otaw dini te keneyonan.