2 Pedro 1:9 - Manobo Sarangani

⁹ Aw doen otaw nemenal ki Cristo meneng kenà iling kenyan se eg-inangen din, iling sikandin te bota so kenà egpengità te kebenalan. Nelibelan din te lininisan sikandin te Timanem lekat te salà.

2 Pedro 1:9 ပူးပေါင်းရင်းမြစ်များ

1 Juan 1:7

Meneng aw egtaking kidon te kelowahan iling te Timanem eg-ogpà diyà te kelowahan, yan migpesigelakay se kedita tadon egtaking kandin, aw dipanog te Batà din si Jesus se ipeg-onaw kenitadon lekat te kedakel te salà tadon.

Menge Hebreo 9:14

Meneng labi pa dakel se egkebatog pineokit te dipanog i Cristo, so lininisan kidon den lekat te salà. Pineokit te tabang te Espiritu Santo wedad temanan din, nemegay sikandin te kandin lawa diyà te Timanem, aw inimetayan sikandin pengkey wedad palos salà din. So lininisan kidon den lekat te salà pineokit te dipanog i Cristo, yan wedad den keilangan te pegsalig tadon diyà te inang wedad ontong, meneng simalig kidon den diyà te Timanem wedad temanan din.

Tito 2:14

Sikandin se simelilin kenitadon te pegkematay din amon megpelowà kenitadon lekat te pegkeallang tadon te salà, aw amon sekopen kidon din. Yan se doun te lininisan kidon din lekat te salà, aw ininang kidon din otaw meibeg meg-inang te mèpiya.

Efeso 5:26

Yan se ininang din amon inangen kidon din ontò egpenimanem. Yan se ininang din, so lininisan kidon den i Cristo pineokit te pegpebonyag tadon diyà te wayeg pineokit te kagi te Timanem.

Roma 6:11

Iling heman kenyan, keilangan eneng-enengen niyo te iling kaw den te otaw nematay so eked kaw den keibeg te salà. Pineokit te pegpesakop niyo diyà ki Jesu Cristo, binegayan kaw den te kaling pedowan, aw yan keilangan iduyun heman se Timanem pineokit te eg-inangen niyo.

1 Pedro 3:21

Yan se pengilala tepad te pegpebonyag niyo, so impelowà kaw lekat te salà kenà tandà te peg-onaw te lawa niyo amon meabat se osing, meneng tandà te pegpemoyò niyo te Timanem te ebaten din se salà lekat te pedowan niyo. Impelowà kaw lekat te pelumun pineokit te pegkeantay i Jesu Cristo lekat te nematay.

Galasya 5:13

Menge kedowa ko, tinawal kaw te Timanem amon ipelowà kaw din lekat te pegtolò niyo te punù sìyan. Pengkey wedà kaw den keallang kenyan, meneng ikà niyo den eg-aneng-aneng te mepakay aw tomaking kaw te medaet ibeg te pedowan niyo. Meneng pedekelay kaw te pedowan, aw petebangay kaw.

Galasya 5:6

Diyà te menge otaw nemenal den ki Cristo, wedad elet diyà te otaw tinolì aw otaw wedà tolii. Onawa iyan diyà te Timanem. Meneng ibeg te Timanem, ipekità tadon te benal se pegpemenal tadon pineokit te dakel pedowan tadon.

Luc. 18:22

Pegdineg i Jesus kenyan, minikagi sikandin, “Sebad mendad se keilangan inangen nikaw. Beligyai se kedakel te kedònan no, aw iteped se kwarta no diyà te menge otaw nelimahan. Aw yan se inangen no, doen ontong kinewaen no doton te langit. Penga te pegteped no te kedakel niyan, likò ka dini aw taking ka kanak.”

Mar. 10:21

Timengteng si Jesus diyà kandin, aw dakel se pedowan din kandin. Minikagi sikandin, “Sebad mendad se keilangan inangen nikaw. Olì ka den aw beligyai se kedakel te kedònan no, aw begayi se kwarta no diyà te menge otaw nelimahan. Aw yan se inangen no, doen ontong kinewaen no doton te langit. Penga te pegpemegay no te kedakel niyan, likò ka dini aw taking ka kanak.”

Impekità 3:17

so egduyun kaw te kenyo pegkeotawun te meyeyaman kaw, aw wedad den kolang te kedònan niyo. Meneng wedà niyo ketegahi te sikiyo se ontò nelimahan. Wedà niyo ketegahi te iling kaw te otaw sagkep, aw bota, aw wedad penenaktun.