2 Pedro 1:4 - Manobo Sarangani

⁴ Lekat te kèpiya te pedowan din, meelagà aw ontò mèpiya se pakang din kenyo amon pineokit kenyan meketig-apò kaw te kandin ketanem, aw amon eked kaw pekeinang te mekedaet ibeg te pedowan te otaw dini te keneyonan.

2 Pedro 1:4 ပူးပေါင်းရင်းမြစ်များ

2 Korinto 3:18

Wedad den belabag diyà te kedita tadon nemenal ki Cristo. Aw gayed tadon keleseban se kelangkaw te Pengolo, gayed heman elinen te Timanem se pegkesawol tadon, amon kitaen te doma otaw se kelangkaw te Pengolo diyà kenitadon. Yan se eg-inangen te Pengolo, sìyan Espiritu Santo, amon labi kidon pa megkelangkaw iling kandin.

Kolasas 3:10

aw kiminawà kaw den te kaling pegkeotawun doen kaling pedowan imbegay te Timanem, aw gayed din iyan ipegpetilles lamig iling kaw te Timanem, amon ontò kaw metaga-taga te kebenalan tepad kandin.

Menge Hebreo 12:10

Se menge amay tadon dini lanto te tanà, yan se migtoladà kenitadon te wedà kenamay tepad te eneng-enengen dan aw eden se mèpiya. Meneng se Amay tadon doton diatas te langit, yan se egtoladà kenitadon amon tebangan kidon din, aw amon meinang kidon egpenimanem.

1 Juan 3:2

Menge kedowa egkedekelan ko te pedowan, batà kidon den te Timanem. Pengkey wedà tadon pa ketegahi aw eden se keilingan tadon te modi aldaw, meneng netegahan tadon te mekeiling kidon ki Cristo aw lomikò sikandin, so ontò tadon sikandin kitaen.

2 Korinto 6:17

Yan se doun te inikagi te Timanem, “Ikà niyo egdoma te menge otaw kenà egtaking kanak. Ikà niyo eg-inabut te medaet ketanem dan. Aw tenanan niyo iyan, somongon a kenyo.

Galasya 6:8

Se kelebadan niyan, aw tomolò se otaw te medaet ibeg te pedowan din, domateng diyà kandin se kemetayun wedad temanan. Meneng se otaw egbeyà-beyaan te Espiritu Santo, yan se otaw begayan din te keentayan wedad temanan.

1 Juan 2:25

Doen impakang i Jesus kenitadon, aw yan se kaling pedowan wedad temanan imbegay din.

2 Pedro 1:1

Se solat seini lekat kanak si Simon, doma ngadan ko si Pedro. Sineligan a i Jesu Cristo aw ininang a sogounun din. Seini se solat ko diyà te kedita niyo simalig diyà ki Jesu Cristo. Sikandin se Timanem egpelowà kenitadon. Tandà te ketòlid din, ininang kaw din heman otaw simalig diyà kandin iling te pegsalig day diyà kandin.

Menge Hebreo 9:15

Yan si Cristo se mig-inang te kaling peokit amon mepakay kominawà se kedita tadon tinawal te Timanem te mèpiya impakang din kenitadon te wedad temanan. Mekinawà tadon se mèpiya sìyan, so pineokit te pegkematay i Cristo, impelowà kidon den lekat te salà ininang tadon dalem te pegtaking tadon te tapay peokit.

2 Korinto 1:20

so metoman se kedita te pakang te Timanem pineokit kandin, aw yan se doun te eg-ikagi kay te kebenalan pineokit kandin amon iduyun tadon se Timanem.

Galasya 3:16

Na, pinekangan te Timanem si Abraham aw bowad-bowad din. Kenà aw kedita te bowad-bowad i Abraham se pinekangan te Timanem, meneng sebad olò bowad-bowad din si Cristo.

Roma 9:4

Ontò den dan netebangan, so gebii pinemallì te Timanem se menge bowad-bowad i Israel, aw pigbatà din dan. Sikandan se pinekitaan din te kelangkaw din. Sikandan heman se pinekangan din te tebangan din dan. Sikandan se sineligan din te menge punù ingkeliwat i Moises. Sikandan se tinoledaan din tepad te pegsimba dan kandin. Medita heman se pakang din kandan.

Efeso 4:13

Pineokit kenyan, mekebatog kidon megsebad te pegpemenal tadon aw pegketaga-taga tadon te Batà te Timanem. Yan meinang kidon iling te otaw migketesan, so meinang se keogpà tadon iling te keogpà i Cristo.

Santiago 1:27

Meneng se otaw ontò egtaking te Timanem Amay, yan se otaw egpenabang te menge doma otaw nelimahan, pengkey menilo aw bayi balo. Kenà heman eg-iling te medaet ketanem te otaw dini te keneyonan.

2 Pedro 3:9

Pengkey doen otaw eg-aneng-aneng te eg-enggaen te Timanem se pegtoman din te pakang, meneng kenà din eg-enggaen. Ontò medalem se pedowan din, so eked sikandin keibeg te doen otaw kebàtan. Ibeg din megselsel se kedita te otaw te salà dan.

2 Pedro 3:13

Meneng migpakang heman se Timanem te inangen din se kaling langit aw kaling tanà ogpaan te kedita te otaw eg-inang te metòlid, aw yan se egpelimanan tadon.