2 Korinto 10:4 - Manobo Sarangani

⁴ Se kekamang ko, kenà iling te menge kekamang te gira, meneng doen eneg imbegay kanak lekat te Timanem. Yan mekedaeg a te kededàtan, pengkey iling te kagsen te kotà te sondalo.

2 Korinto 10:4 ပူးပေါင်းရင်းမြစ်များ

2 Korinto 6:7

Ipekità ko te metòlid se eg-inangen ko so egtoladà a heman te kebenalan, aw ontò a egtebangan te tolos te Timanem. Iling a te sondalo doen kekamang eked dàgi te poon din, so iling te sondang aw kelasag se ketòlid te pedowan imbegay te Timanem kanak.

1 Korinto 2:5

Yan nemenal kaw ki Jesu Cristo, kenà lekat te kebiyasa te otaw, meneng lekat te eneg te Timanem.

1 Timoteo 1:18

Nayan, batà ko Timoteo, seini se ipunù ko kamno. Ikà egkelibel te inikagi te menge telekeliwat te kagi te Timanem tepad kamno kedengan. Yan ketebangan ka amon keseligan ka tomoman te impunù kamno, iling te sondalo egkeseligan tepad te eg-inangen din.

Roma 13:12

Iling te agpet den lomaklak se kengitngit aw domateng se aldaw, so agpet den se peglikò i Cristo. Doun niyan, keilangan lomengà kidon meg-inang te medaet, aw keilangan meg-inang kidon te metòlid. Yan megpeketagad kidon iling te sondalo gayed egpeketagad.

1 Tesalonika 5:8

Meneng sikitadon se otaw te aldaw, aw yan keilangan egpeketagad kidon. Aw gayed kidon egsalig diyà te Timanem aw egpedekelay kidon te pedowan, yan se iling te ikelasag te lawa tadon, aw iling te telandà kinis se pegpeliman tadon te pegpelowà te Timanem kenitadon lekat te pelumun.

2 Korinto 4:7

Iling a te koden wedad keelagà sinolan te bolawan meelagà, so pengkey wedad keelagà ko, meneng insalig te Timanem kanak se pegtoladà te kebenalan tepad ki Cristo amon ketegahan te menge otaw te sikandin se eglekatan te tolos. Kenà iyan lekat kanak.

Roma 6:13

Ikà niyo eglegamit te lawa niyo meg-inang te salà. Meneng keilangan ipelowan niyo se Timanem diyà kenyo, so impelowà kaw din lekat te kemetayun aw binegayan kaw din den te kaling pedowan. Begayi niyo se lawa niyo diyà te Timanem amon gemiten din iyan meg-inang te metòlid.

2 Korinto 3:5

Kenà lekat te kanak aneng-aneng aw kebiyasa se nekebatog te ininang ko doton kenyo, meneng lekat te Timanem se kebiyasa,

Menge Hebreo 11:30

Simalig heman se menge Judiyo diyà te Timanem, so limibed dan te kotà te lonsod te Jeriko te kelikit te aldaw lamig te ikepito te aldaw, aw yan tigkan tinongan te Timanem se kotà sìyan amon dàgen dan se tege Jeriko.

2 Timoteo 2:3

Pegpeketagad ka aw pemilangen ka tandà te pegtaking no ki Jesu Cristo, aw yan meinang ka iling te sondalo egkeseligan.

Ininang 7:22

Pigtoledaan sikandin te kedakel te kebiyasa te tege Ehipto. Pegketesan din, ontò biyasa se peg-ikagi aw peg-inang din.

2 Korinto 13:10

Insolat ko tapay ini kenyo te wedà a pa pesalo kidoen, amon wedad segdahen ko aw domateng a doton, so tapay kaw timolò. Benal insogò a te Pengolo kenà amon kebàtan kaw, meneng amon ketebangan kaw.

1 Korinto 9:7

so se otaw megpagod, keilangan doen ontong din. Wedad palos sondalo menogpò te kandin pegkeotawun. Wedad heman otaw eked kaen te pongo te intanem din. Wedad heman otaw telediyaga eked inem te gatas lekat te baka tinonggoan din.

2 Korinto 10:8

Pengkey todà a heman mikagi te insogò a te Pengolo, eked a heman keyàyà so insogò a din kenà amon megbaet a te pegpemenal niyo, meneng amon megtabang a kenyo.