2 Korinto 1:12 - Manobo Sarangani

¹² Ontò a neluba, so netegahan ko te ontò metòlid se keogpà ko. Pengkey kenan a pesalo, aw labi pa doton kenyo, metòlid se keogpà ko aw mèpiya heman se tod ko kenà pineokit te kenaken kebiyasa, meneng pineokit te tabang te Timanem kanak.

2 Korinto 1:12 ပူးပေါင်းရင်းမြစ်များ

1 Korinto 2:13

Yan kenà lekat te kebiyasa te otaw se ipegtoladà day, meneng lekat te Espiritu Santo se kagi day, aw yan egtoladà kay te kebenalan tepad te Espiritu Santo diyà te menge otaw egbeyà-beyaan te Espiritu Santo.

2 Korinto 2:17

Kenà a iling te menge doma otaw egtoladà te kagi te Timanem amon mengewarta. Meneng insogò a te Timanem, aw netegahan din te nelobos se pedowan ko te pegtoladà te Mèpiya Indan tepad ki Cristo.

1 Tesalonika 2:10

Netegahan niyo aw netegahan heman te Timanem te wedad palos mekesila te ininang day diyà kenyo egpemenal, so timolò kay te ibeg te Timanem aw metòlid se ininang day.

1 Pedro 3:21

Yan se pengilala tepad te pegpebonyag niyo, so impelowà kaw lekat te salà kenà tandà te peg-onaw te lawa niyo amon meabat se osing, meneng tandà te pegpemoyò niyo te Timanem te ebaten din se salà lekat te pedowan niyo. Impelowà kaw lekat te pelumun pineokit te pegkeantay i Jesu Cristo lekat te nematay.

Menge Hebreo 13:18

Pegtawal-tawal kaw diyà te Timanem tepad kenami. Netegahan day te wedad ininang day mepakay silahen, aw tod day wedad palos inangen day eked duyuni te Timanem.

2 Korinto 8:8

Eked ko sikiyo sogoi memegay. Meneng ibeg ko ipetaga-taga olò kenyo se keaseb te doma otaw nemegay, amon ketegahan ko aw benal doen dakel pedowan niyo.

2 Korinto 4:2

Ontò ko pig-ekedan se medaet inang, sìyan megbolon aw mekeyàyà. Wedà a peglegawa te doma otaw. Meneng ontò ko binangal se pegtoladà te kagi te Timanem. Netegahan te Timanem te kebenalan se intoladà ko, aw netegahan iyan te kedita te otaw.

1 Korinto 15:10

Meneng pineokit te tabang te Timanem kanak, ininang a din sogounun i Cristo. Doen detengan te tabang din kanak, so labi a pa measeb diyà te kedita te doma sogounun i Cristo te peg-inang ko. Meneng kenà lekat te kanak eneg se nebatog ko, so Timanem se migtabang kanak.

Ininang 24:16

Ontò a measeb eg-inang te mèpiya, so ibeg ko wedad palos ikeyàyà ko diyà te Timanem aw otaw.

Ininang 23:1

Yan timengteng si Pablo diyà te kedita te obanen te simbahan aw minikagi sikandin, “Menge kedowa ko, pengkey eden se neinang ko, meneng netegahan ko te ontò metòlid se aneng-aneng ko diyà te Timanem lamig songkani.”

1 Pedro 3:16

Meneng aw tomaba kaw kandan, keilangan mèpiya se pedowan niyo kandan, aw keilangan megsagman kaw heman kandan. Keilangan wedad salà inangen niyo, so sakop kaw i Cristo. Yan aw doen otaw megbael-bael tepad kenyo, aw somila dan te mèpiya eg-inangen niyo, meyàyà dan.

1 Timoteo 1:5

Yan se ipunù ko amon megpedekelay dan te pedowan. Meneng eked dan pegpedekelay te pedowan singed aw linisan te Timanem se pedowan dan lekat te salà, aw metibok se ibeg dan meg-inang te metòlid, aw melobos se pegpemenal dan te Timanem.

Filipos 1:10

amon metaga-taga kaw aw eden se ontò mèpiya inangen niyo. Aw metoman iyan, eked kaw peg-inang te salà, aw wedad otaw mekesila kenyo, meneng meketagad kaw te aldaw te peglikò i Cristo.

Efeso 6:14

Yan pegpeketagad kaw iling te sondalo egpeketagad megbolaw te poon din. Iling te elen se peg-aneng-aneng niyo te kebenalan, aw iling te saol kinis se peg-inang niyo te metòlid.

Galasya 6:4

Meneng mèpiya aw eneng-enengen te teg sebad-sebad otaw se kandin eg-inangen, so aw megpekeaseb sikandin meg-inang te mèpiya, kenà lekat te eg-inangen te doma otaw se luba din, meneng lekat te kandin eg-inangen.

2 Korinto 11:3

Meneng nelemitan a aw metodà se ibeg niyo tomaking ki Cristo. Iling kenyan se peg-akal i Satanas ki Eva gebii pineokit te peg-akal te memokan kandin.

2 Korinto 1:17

Pengkey wedà a pa pekedeleg, meneng kenà egdowa-dowa se ibeg ko lomaoy kenyo. Siak kenà iling te doma otaw kenà egkeseligan aw melomì egketodà se aneng-aneng.

1 Korinto 5:8

Yan se doun te mèpiya aw megpesiontong kidon diyà te Timanem tandà te peglengà tadon te peg-inang te medaet, so yan se iling te yist mekeketin kenyo. Meneng keilangan lobosen tadon se pedowan te pegtaking tadon te kebenalan, so yan se iling te pan wedad yist.

1 Korinto 4:4

Pengkey wedad netegahan ko medaet diyà te neinang ko, meneng wedà a keinang metòlid pineokit kenyan, so Pengolo olò se netaga-taga aw metòlid a.

Roma 9:1

Nayan, doen den ipetaga-taga ko kenyo seini. Ontò iyan benal, so migpesakop a diyà ki Cristo. Netegahan ko te kenà kebolalaw se kagi ko kenyo seini, so egbeyà-beyaan a te Espiritu Santo.

Santiago 4:6

Meneng doen heman tabang din kenitadon, so doen kagi din insolat, “Se otaw megpelangkaw-langkaw, yan se otaw keopalan te Timanem. Meneng se otaw egpedanà te kandin pegkeotawun, yan se otaw tebangan te Timanem.”

Tito 2:7

Sikona heman, pengkey eden se inangen nikaw, keilangan mèpiya iyan amon meinang ka gegonan peg-ilingan te menge doma otaw. Aw megtoladà ka, keilangan metinuud ka, aw keilangan metinònò ka.

1 Korinto 1:17

Insogò a i Cristo kenà amon memonyag a, meneng insogò a din amon megtoladà a te Mèpiya Indan tepad kandin. Migtoladà a kenà pineokit te kebiyasa ko, so aw iling kenyan, kebelebagan se pegpemenal te kebenalan tepad te pegkematay i Cristo doton te kros.

1 Korinto 12:8

Se sebad otaw, doen imbegay te Espiritu Santo kandin kebiyasa amon megtoladà te kebenalan diyà te doma otaw. Se sebad otaw, doen imbegay te Espiritu Santo kandin kebiyasa amon meg-indan-indan te toladà amon mekelabet se doma otaw.