1 Korinto 8:9 - Manobo Sarangani

⁹ Yan pengkey mepakay kaw komaen te pengelapen imbegay te doma otaw diyà te inotaw aw meibeg kaw, meneng peg-ahà kaw amon wedad otaw meboyo meg-inang te salà pineokit te peg-iling dan kenyo, so wedà dan ontò ketaga-taga te kebenalan.

1 Korinto 8:9 ပူးပေါင်းရင်းမြစ်များ

Galasya 5:13

Menge kedowa ko, tinawal kaw te Timanem amon ipelowà kaw din lekat te pegtolò niyo te punù sìyan. Pengkey wedà kaw den keallang kenyan, meneng ikà niyo den eg-aneng-aneng te mepakay aw tomaking kaw te medaet ibeg te pedowan niyo. Meneng pedekelay kaw te pedowan, aw petebangay kaw.

1 Pedro 2:16

Mepakay aw memallì kaw den aw eden se inangen niyo, meneng ikà niyo eg-aneng-aneng te mepakay aw memallì kaw meg-inang te medaet, so keilangan metòlid se eg-inangen niyo, amon ipetaga-taga niyo te egtolò kaw den te Timanem.

2 Pedro 2:19

Egtoladà dan te doen kelowaan te kedita te otaw tomaking kandan so mepakay dan meg-inang te pengkey eden se ibeg dan. Meneng sikandan se neallang te kededàtan, so pengkey eden se egbayà-bayà te otaw, yan se mekeallang kandin.

1 Korinto 10:24

Pengkey eden se inangen te otaw, kolang se tod din aw olò sikandin se mekeontong, meneng keilangan mekeontong heman se doma otaw.

1 Korinto 10:32

Keilangan mèpiya se kedita te eg-inangen niyo amon eked pegkedaet se pedowan te doma otaw, pengkey Judiyo aw kenà Judiyo, pengkey otaw egpemenal te Timanem.

1 Korinto 9:22

Peg-ilingan ko se inang te menge otaw wedà ontò ketoledai tepad te pegtaking ki Cristo, amon ketebangan ko dan. Gayed a timaking te inang te kedita te otaw, amon pineokit te pegtoladà ko, doen menge otaw mekelowà lekat te pegpelumun te Timanem.

1 Korinto 8:12

Aw pineokit te inang niyo megkedaet se aneng-aneng te doma niyo, sìyan wedà pa ontò ketaga-taga te kebenalan, kenà olò sikandin se keselaan niyo, meneng mekesalà kaw heman ki Cristo.

1 Korinto 8:10

Pengkey netegahan niyo se kebenalan, aw simpana komaen kaw te pengelapen imbegay doton te simbahan te inotaw, aw kitaen kaw te doma otaw wedà ontò ketaga-taga te kebenalan, yan se labi pa mekebegay kandin te eneg te peg-iling kenyo komaen, pengkey aneng-aneng din medaet iyan.

Impekità 2:14

Pengkey induyun ko sikiyo, meneng netegahan ko heman te doen medaet eg-inangen niyo, so doen otaw doton kenyo egtaking te kebolalaw intoladà i Balaam gebii. Migtoladà si Balaam ki Balak te peokit te pegboyo din te menge bowad-bowad i Israel amon lomengà dan te pegtaking dan diyà te Timanem. Binoyo din dan amon komaen dan te pengelapen imbegay diyà te kenà benal timanem, aw amon lomayok dan te kenà kandan esawa.

2 Korinto 11:21

Meneng mikagi kaw besi te neyàyà a so eked a keibeg meg-iling kandan. Na, so mebolot dan domuyun te kandan pegkeotawun, mebolot a den heman domuyun te kanak pegkeotawun, meneng iling a te otaw wedad inenengen te peg-indan ko kani.

Roma 15:1

Nayan, sikitadon menge otaw netaga-taga te kebenalan, keilangan medalem se pedowan tadon diyà te menge doma tadon wedà pa ontò ketaga-taga te kebenalan. Eked kepakay aw olò kenitadon ibeg se inangen tadon.

Mat. 18:10

“Keilangan eked kaw peglindò te sakop ko medanà iling te kedanà te mengisù seini, so mikagi a den diyà kenyo te egtonggoan dan te menge anghil gayed egdoma te Amay ko doton te langit. [

1 Korinto 10:28

Meneng aw doen otaw mikagi diyà kenyo te tapay iyan imbegay diyà te inotaw, ikà niyo egpengaen kenyan amon wedad keeneng-enengan te otaw simabi kenyo, so pengkey eked pegkedaet se kenyo aneng-aneng, meneng megkedaet beling se kandin aneng-aneng. Pengkey komaen a aw eked, wedad otaw mekesila kanak pengkey wedà peg-onawa se aneng-aneng day,

2 Korinto 6:3

Ontò ko eg-imendayan se eg-inangen ko amon wedad otaw meg-eked te pegpemenal, aw amon wedad isila te ipegtoladà ko tepad te Pengolo.

2 Korinto 11:29

Aw doen olò sebad otaw melomay se pegpemenal din, ontò ko ibeg tebangan sikandin. Na, aw doen sebad otaw nemenal meg-inang te salà, ontò a egkeopal diyà te otaw migboyo kandin.

Kolasas 2:8

Peg-ahà kaw te menge otaw meg-akal peden kenyo pineokit te kagi dan medalem aw mèpiya dinegen amon tomaking kaw kandan. Meneng wedad ontong te kagi dan, so egtoladà dan olò te ketanem te kemonaan dan gebii aw aneng-aneng te otaw tepad te keneyonan. Kenà lekat ki Cristo se ipegtoladà dan.