1 Korinto 8:1 - Manobo Sarangani

¹ Nayan, tomaba a te insà niyo tepad te pegkaen niyo te pengelapen imbegay diyà te inotaw egseligan te otaw kenà egsalig te Timanem. Ontò benal se inikagi niyo te netegahan te kedita tadon se kebenalan tepad te pegkaen te pengelapen imbegay diyà te inotaw. Meneng ikà niyo egkelibel kani. Aw meg-aneng-aneng kaw te netegahan niyo se kedita, yan se kelekatan te pegduyun niyo te kenyo pegkeotawun, meneng medaet iyan. Meneng aw megpedekelay kaw te pedowan, yan se kelekatan te pegpetebangay niyo tepad te pegtaking niyo te Pengolo tadon.

1 Korinto 8:1 ပူးပေါင်းရင်းမြစ်များ

1 Korinto 8:7

Pengkey benal te wedad doma timanem, meneng doen pa menge otaw doton kenyo wedà dan keleseb te kebenalan sìyan. Timaking dan te ketanem te otaw egdogsò aw egpengaen te pengelapen ipegbegay diyà te inotaw. Yan se ketanem dan kedengan te wedà dan pa pemenal ki Cristo. Pengkey lamig songkani, aw kànen dan se pengelapen imbegay diyà te inotaw, eden dan aw doen labut dan te pegpemasa te inotaw sìyan. So wedà dan pa keleseb te kebenalan, eden dan aw mekesalà dan pineokit te pegkaen dan te pengelapen imbegay diyà te inotaw.

Roma 14:3

Aw egpengaen kaw te pengelapen, ikà niyo eglindò te otaw kenà egpengaen kenyan. Aw kenà kaw egpengaen te pengelapen, ikà niyo egsila te otaw egpengaen kenyan, so tomalag sakop te Timanem se kedita niyo.

Impekità 2:14

Pengkey induyun ko sikiyo, meneng netegahan ko heman te doen medaet eg-inangen niyo, so doen otaw doton kenyo egtaking te kebolalaw intoladà i Balaam gebii. Migtoladà si Balaam ki Balak te peokit te pegboyo din te menge bowad-bowad i Israel amon lomengà dan te pegtaking dan diyà te Timanem. Binoyo din dan amon komaen dan te pengelapen imbegay diyà te kenà benal timanem, aw amon lomayok dan te kenà kandan esawa.

1 Korinto 8:4

Nayan, tepad te pegkaen te pengelapen imbegay diyà te inotaw, benal se inikagi niyo te kenà ontò timanem se egbegayan dan. Benal heman se inikagi niyo te olò sebad se Timanem.

1 Korinto 8:2

Aw meg-aneng-aneng se otaw te netegahan din se kedita, kolang pa se pegketaga-taga din.

Roma 15:14

Menge kedowa ko, netegahan ko den te gayed mèpiya se eg-inangen niyo, aw tinoledaan kaw te kebenalan tepad te Timanem, aw mekebatog kaw heman megpetoledaay.

Efeso 4:16

aw iling te lawa din se kedita tadon menge sakop din. Aw megsebad se terbaho te luluwadun aw teg sebad-sebad kinemoloan diyà te lawa, meketilles se lawa. Iling heman kenyan, aw tomanen te teg sebad-sebad kenitadon se eg-inangen tadon, tomilles kidon aw megkagsen kidon pineokit te pegpedekelay tadon te pedowan.

1 Korinto 15:34

Peketòlid kaw. Lengai niyo den se peg-inang niyo te salà. Simolat a kani kenyo amon meyàyà kaw, so medita pa se otaw kidoen kenyo eg-inang te salà, aw wedà ketaga-taga te kebenalan tepad te inang te Timanem.

Ininang 15:29

Ikà niyo egpengaen te pengelapen tapay imbegay diyà te inotaw, aw dipanog, aw ayam-ayam pelengen. Ikà niyo heman eg-inabut te kenà kenyo esawa. Mèpiya aw tomolò kaw kenyan. Taman den iyan te ikegiyen day kenyo.”

1 Korinto 10:28

Meneng aw doen otaw mikagi diyà kenyo te tapay iyan imbegay diyà te inotaw, ikà niyo egpengaen kenyan amon wedad keeneng-enengan te otaw simabi kenyo, so pengkey eked pegkedaet se kenyo aneng-aneng, meneng megkedaet beling se kandin aneng-aneng. Pengkey komaen a aw eked, wedad otaw mekesila kanak pengkey wedà peg-onawa se aneng-aneng day,

Ininang 21:25

Meneng tepad te menge otaw kenà Judiyo nemenal, simolat kay kandan kedengan te eked dan kaen te pengelapen tapay imbegay diyà te inotaw, aw dipanog, aw ayam-ayam pelengen, aw eked dan heman peg-inabut te kenà kandan esawa.”

Ininang 15:10

Meopal besi se Timanem aw ipetolò niyo dan te ontò melima, so wedà iyan kebatog te kemonaan tadon, aw eked kidon heman pekebatog kenyan.

Impekità 2:20

Meneng netegahan ko te doen heman medaet eg-inangen niyo, so mepakay diyà kenyo aw toledaan kaw te bayi si Jesebel egpelingo-lingo telekeliwat te kagi te Timanem. Egboyo sikandin te menge sakop ko pineokit te pegtoladà din te mepakay aw lomayok dan te kenà kandan esawa, aw komaen dan heman te pengelapen ipegpemegay diyà te kenà benal timanem.

Kolasas 2:18

Doen heman menge otaw egpelangkaw-langkaw, so eg-ikagi dan te doen kebenalan impetaga-taga te Timanem kandan, aw egtoladà dan tepad te pegpedanà aw pegsimba dan te menge anghil. Meneng peg-ahà kaw amon eked kaw dan keekali pineokit te kagi dan, so kenà lekat te Timanem se ipegtoladà dan, meneng lekat te medaet aneng-aneng dan.

1 Korinto 14:20

Menge kedowa ko, ikà niyo eg-iling te mengisù wedad inenengen. Pengkey mèpiya aw iling kaw te mengisù wedad toig meg-inang te salà, meneng diyà te aneng-aneng niyo, pekitai niyo te metesan kaw den.

1 Korinto 5:6

Medaet se pegpelangkaw-langkaw niyo. Mèpiya beling aw megpedanà kaw amon eked ketin se salà sìyan diyà te kedita niyo, so iling kenyan se ikegiyen tadon, “Pengkey deitek olò se yist, meneng lomebag se kedakel te arina.”

1 Korinto 5:2

Pengkey medaet iyan, meneng gayed kaw pa egpelangkaw-langkaw. Keilangan melidò kaw beling aw ipelowà niyo se otaw mig-inang te medaet sìyan, amon eked sikandin pekedoma te menge otaw egpemenal.

1 Korinto 4:18

Doen ekon doton kenyo migpelangkaw-langkaw, so eden dan aw eked a laoy kenyo.

1 Korinto 4:10

Pengkey wedad ekon inenengen day so egtaking kay ki Cristo, meneng aneng-aneng niyo doen inenengen niyo so egtaking kaw ki Cristo. Pengkey wedad ekon mebatog day inangen, meneng aneng-aneng niyo mebatog niyo inangen se kedita pengkey eden. Sikiyo se nedengeg, meneng sikami se eglindoan.

1 Korinto 1:5

Lekat te pegsebad te pedowan niyo kandin lamig songkani, ontò medita se tabang din kenyo, aw yan netegahan niyo se kebenalan, aw biyasa kaw egtoladà kenyan.

Roma 14:22

Pengkey eden se aneng-aneng niyo tepad te ketanem egtekingan niyo, ikà niyo egpetaga-taga kenyan diyà te doma otaw, so botong aw Timanem olò se metaga-taga kenyan. Meluba se otaw netaga-taga den te metòlid se ketanem pinemallì din egtekingan.

Roma 14:14

Tandà te pegsebad ko ki Jesus, ontò a den netaga-taga te wedad palos kànen ininang te Timanem eked kepakay kànen. Meneng aw meg-aneng-aneng se otaw te doen kànen ininang te Timanem eked kepakay kànen, eked kepakay aw kànen din iyan.

Roma 14:10

Yan se doun te eked kepakay aw silahen tadon se ketanem egtekingan te doma otaw migpesakop diyà kandin. Eked heman kepakay aw meglindò kidon kandan, so sominalo kwani se kedita tadon te Timanem amon okomen kidon din.

Roma 12:16

Se kedita niyo migpesakop diyà ki Cristo, keilangan megsebad kaw te pedowan. Ikà niyo egpelangkaw-langkaw, meneng mèpiya aw megpeketagad kaw meg-inang te sagkep inang. Ikà niyo eg-aneng-aneng te sikiyo olò se netaga-taga te kebenalan.

Roma 11:25

Menge kedowa ko kenà Judiyo, doen kebenalan wedà pa petega-tegahi lamig songkani, meneng ipetaga-taga ko den iyan diyà kenyo amon eked kaw peg-aneng-aneng te sikiyo olò se otaw netaga-taga te kebenalan. Metugul se keditaan te Judiyo songkani. Eked dan taking te Timanem singed aw onà megpesakop se kedita te otaw kenà Judiyo pinemallì te Timanem.

Roma 14:19

Nayan, pengkey eden se inangen tadon, keilangan eneng-enengen tadon amon eked kebàti se kelinaw te pedowan tadon, amon megpetebangay kidon te pegtaking tadon ki Cristo.

1 Korinto 4:6

Menge kedowa ko, dini te intoladà ko seini, impolingun ko diyà kanak aw ki Apolos, so ibeg ko meg-iling kaw kenami te pegtolò day te kagi te Timanem insolat, amon wedad pedigselan niyo.

1 Korinto 10:15

Doen inenengen niyo, aw yan mikagi a kenyo te eneng-enengi niyo aw benal se intoladà ko.