1 Korinto 2:6 - Manobo Sarangani

⁶ Aw ontò egtaking te Timanem se otaw egpenenalan kanak, yan se egtoledaan ko te kebiyasa medalem. Kenà iyan iling te kebiyasa te otaw dini te keneyonan. Kenà heman iling te kebiyasa te otaw eglowan, so pesalo dan megkewedad.

1 Korinto 2:6 ပူးပေါင်းရင်းမြစ်များ

Menge Hebreo 5:14

Meneng mekekaen se otaw metesan te pengelapen. Metesan den se otaw ontò den biyasa egtaking te mèpiya aw egkulu te medaet.

Santiago 3:15

Kolang se kebiyasa te otaw iling kenyan, so kenà iyan lekat te Timanem, meneng lekat iyan te medaet ibeg te otaw dini te keneyonan egtaking te menge bosaw.

2 Korinto 4:4

so se menge otaw wedà pemenal, impekagsen i Satanas se olo dan amon eked dan kelebeti se Mèpiya Indan tepad te kelangkaw i Jesu Cristo, so egkitaen se keanyag te Timanem diyà te bawa i Cristo.

1 Pedro 5:10

Pengkey nelimahan kaw den seini, meneng mepenga iyan te eked kenamay. Gayed egtabang se Timanem, aw tinawal kaw din amon megdoma kaw kandin te wedad temanan tandà te pegsebad niyo diyà ki Cristo. Penga te pegtayod niyo te kelimahan, Timanem se meg-inang kenyo mesikop aw domasel, aw sikandin se memegay kenyo te eneg din.

1 Korinto 2:8

Se menge otaw eglowan dini te keneyonan, wedà dan ketegahi se peglalang te Timanem, so simpana netegahan dan iyan, eked dan peden lensangi se Pengolo melangkaw doton te kros.

1 Korinto 1:28

Pinemallì din heman se menge otaw wedad kelangkaw aw eglindoan te doma aw wedad ontong, amon ipekità din te wedad ontong te aneng-aneng tadon doen ontong.

Kolasas 4:12

Minikagi heman si Epapras sebad heman sakop te probinsya niyo te dakel se pedowan din kenyo. Gayed sikandin egtolò te ibeg i Jesu Cristo. Egtawal-tawal sikandin aw ontò egpemoyò diyà te Timanem te melobos se pegpemenal niyo. Ibeg din ontò kaw metaga-taga te kedita te ibeg te Timanem diyà kenyo.

Efeso 2:2

Kedengan, gayed kaw egpekesalà. Mig-iling kaw te otaw eg-inang te salà dini te keneyonan. Timolò kaw ki Satanas, pengolo te kedita te bosaw. Sikandin se egbayà-bayà te kedita te otaw kenà egtolò te Timanem.

Mat. 5:48

Yan, keilangan melobos se pedowan niyo iling te kelobos te pedowan te Amay niyo Timanem doton te langit.”

2 Korinto 1:12

Ontò a neluba, so netegahan ko te ontò metòlid se keogpà ko. Pengkey kenan a pesalo, aw labi pa doton kenyo, metòlid se keogpà ko aw mèpiya heman se tod ko kenà pineokit te kenaken kebiyasa, meneng pineokit te tabang te Timanem kanak.

Santiago 3:2

Melikit se kedita tadon eg-inang te medaet aw eg-ikagi te medaet. Meneng aw wedad palos medaet ikegiyen te otaw, biyasa sikandin egpengibing te kandin pegkeotawun, aw eked peg-inang te salà.

2 Korinto 13:11

Na, menge kedowa ko, keluba kaw den. Imendayi niyo se peg-ogpà niyo. Toloi niyo se impunù ko kenyo. Pegsebad kaw te pegpemenal aw pedowan niyo. Domaan kaw te Timanem eglekatan te kedakel aw kelinaw te pedowan.

1 Korinto 14:20

Menge kedowa ko, ikà niyo eg-iling te mengisù wedad inenengen. Pengkey mèpiya aw iling kaw te mengisù wedad toig meg-inang te salà, meneng diyà te aneng-aneng niyo, pekitai niyo te metesan kaw den.

1 Korinto 2:13

Yan kenà lekat te kebiyasa te otaw se ipegtoladà day, meneng lekat te Espiritu Santo se kagi day, aw yan egtoladà kay te kebenalan tepad te Espiritu Santo diyà te menge otaw egbeyà-beyaan te Espiritu Santo.

1 Korinto 2:1

Menge kedowa ko, pegdoton ko kenyo kedengan, migtoladà a kenyo te kagi te Timanem, meneng wedà ko iyan peokiti te medalem kagi aw kebiyasa te otaw,

Luc. 16:8

Nayan, pengkey migtostos se sineligan te salà te otaw diyà te amo din, meneng dimuyun se amo kandin, so biyasa sikandin miglalang te kèpiyaan. Pengkey biyasa se menge sakop te Timanem egpengabat te ontong, meneng labi pa biyasa egpengabat te ontong se menge otaw kenà egtaking te Timanem.”

Mat. 19:21

Minikagi si Jesus, “Aw meibeg ka te ontò melobos se pedowan no diyà te Timanem, olì ka den aw beligyai se kedakel te kedònan no, aw begayi se kwarta no diyà te menge otaw nelimahan. Aw yan se inangen no, doen ontong kinewaen no doton te langit. Penga te pegpemegay no te kedakel niyan, likò ka dini aw taking ka kanak.”

Mat. 13:22

Nayan, se benì nesabog diyà te pinonoan te sagbet doen tigis, yan se iling te otaw ontò domineg te kagi te Timanem intoladà. Meneng penga niyan, wedad ontong din so dàgen sikandin te ibeg din tomaking te ketanem te keneyonan, aw ibeg din megkeyaman amon meluba sikandin. Yan se doun te wedad ontong din diyà te kagi te Timanem dinineg din.

1 Korinto 3:1

Menge kedowa ko, doen wedà ko pa toledai kenyo, so kenà kaw iling te otaw ontò egbeyà-beyaan te Espiritu Santo. Iling kaw beling te otaw egtaking te ibeg te kandan pedowan aw otaw kaling timaking ki Cristo.

1 Korinto 12:8

Se sebad otaw, doen imbegay te Espiritu Santo kandin kebiyasa amon megtoladà te kebenalan diyà te doma otaw. Se sebad otaw, doen imbegay te Espiritu Santo kandin kebiyasa amon meg-indan-indan te toladà amon mekelabet se doma otaw.

2 Korinto 4:3

Meneng se Mèpiya Indan tepad ki Cristo intoladà ko, wedà iyan kelebeti te menge otaw egpesalo doton te pelumun,

Kolasas 1:28

Egtoladà kay te kedita te otaw tepad ki Cristo. Gayed kay egsagda te kedita te otaw aw egtoladà kay kandan te kebenalan tepad ki Cristo, so ibeg day ontò melobos se pegtaking te kedita te otaw diyà ki Cristo.

Menge Hebreo 6:1

Yan botong den se kenamay te peg-iling tadon te menge kebenalan onà intoladà diyà kenitadon tepad te pegpemenal tadon ki Cristo, so keilangan meg-iling kidon den te menge kebenalan labi pa medalem. Eked den kepakay aw gayed tadon sobloden se menge kebenalan tapay pig-ilingan tadon tepad te peglengà tadon te inang wedad ontong, aw tepad te pegsalig tadon diyà te Timanem.