1 Korinto 15:2 - Manobo Sarangani

² Aw dimasel se pegpemenal niyo, aw nelobos se pedowan niyo, nekelowà kaw den lekat te salà pineokit te pegpemenal niyo te kebenalan intoladà ko kenyo.

1 Korinto 15:2 ပူးပေါင်းရင်းမြစ်များ

Menge Hebreo 3:6

Meneng kenà sineligan te Timanem si Jesus, so Batà din sikandin. Insalig te Timanem kandin se pegpengibing te kedita te menge sakop te Timanem. Aw gayed kidon somalig diyà te egpelimanan tadon, ipetaga-taga tadon te sakop kidon din.

Menge Hebreo 2:1

So ontò melangkaw si Cristo, yan se doun te netegahan tadon den te keilangan ontò kidon menenalan te menge kebenalan intoladà kenitadon, amon eked kidon soway lekat kenyan.

Menge Hebreo 3:14

so aw gayed kidon somalig diyà ki Cristo lekat te keteboan lamig te temanan, meinang kidon menge doma din.

2 Timoteo 1:9

Impelowà kidon din lekat te salà aw tinawal kidon din amon inangen kidon din menge sakop din. Yan se ininang din kenà tandà te peg-inang tadon te mèpiya, meneng tandà te kandin ibeg aw tabang din kenitadon. Gebii te wedad pa palos ininang din, miglalang sikandin megtabang kenitadon pineokit ki Jesu Cristo.

Kolasas 1:23

Meneng keilangan gayed kaw somalig diyà ki Jesu Cristo, aw keilangan lobosen niyo se pegpemenal niyo kandin. Ikà niyo egsoway lekat te kagi te Timanem pinemenalan niyo tepad ki Cristo, so doen den egpelimanan niyo. Yan se Mèpiya Indan intoladà den diyà te menge otaw doton te kebelad te keneyonan, aw yan heman se ipegtoladà ko.

Efeso 2:8

Pineokit te tabang te Timanem, impelowà kaw din lekat te salà te pegpemenal niyo ki Cristo kenà pineokit te inang niyo, meneng pineokit te bowang te Timanem kenyo.

1 Korinto 1:18

Pengkey eg-aneng-aneng se otaw kenà egpemenal te wedad ontong te kebenalan ipegtoladà ko tepad te pegkematay i Cristo doton te kros, meneng sikitadon egpemenal se netaga-taga te egpelowà den se Timanem te otaw lekat te salà pineokit te pegkematay i Cristo.

Santiago 2:26

Eneng-enengi niyo ini. Wedad ontong te lawa aw wedad pedowan. Iling heman kenyan, wedad ontong te otaw memenal aw wedad mèpiya inang din.

Santiago 2:14

Menge kedowa ko, aw doen otaw mikagi te egpemenal sikandin ki Cristo, meneng wedad mèpiya eg-inangen din, wedad ontong din, so eden din aw nekelowà lekat te salà.

Menge Hebreo 10:23

Keilangan megpekagsen kidon se egpeliman diyà te pakang te Timanem pinemenalan tadon, so egkeseligan sikandin aw tomanen din se kedita te impakang din.

Luc. 8:13

Nayan, se benì nesabog diyà te tanà kebeto-betowan, yan se iling te otaw domineg te kagi te Timanem, aw meluba dan, aw tomolò dan kenyan te eked kenamay. Meneng aw meboyo dan, tenanan dan se pinemenalan dan, so iling dan te tinanem wedad nael dalid.

Santiago 2:17

Aw wedad mèpiya eg-inangen te otaw, wedad ontong te pegpemenal din.

Menge Hebreo 4:14

Nayan, keilangan lobosen tadon se pegsalig tadon diyà ki Jesus pinemenalan tadon. Doen melangkaw Telekagon tadon dimoton den diatas te langit eg-ogpaan te Timanem, aw yan se Batà te Timanem si Jesus.

2 Tesalonika 2:15

Yan menge kedowa day, ikà niyo egdowa-dowa te pegsalig niyo ki Cristo, aw ikà niyo egsoway lekat te menge kebenalan intoladà day kenyo te peg-ogpà day doton kenyo kedengan aw pineokit heman te pegsolat day kenyo.

Galasya 3:4

Eked kepakay aw wedad ontong te kedita neokitan niyo te pegpemenal niyo.

2 Korinto 6:1

Egtoloen ko se Timanem simogò kanak aw seini se ipegtoladà ko. Aw nekekinawà kaw te tabang te Timanem, pekitai niyo te doen ontong niyo pineokit te peg-inang niyo te metòlid.

Roma 1:16

Nayan, ontò dakel se pegsalig ko diyà te Mèpiya Indan sìyan, so yan se tolos te Timanem mekepelowà te kedita te otaw lekat te salà aw memenal dan kenyan. Nekeonà se menge Judiyo dimineg kenyan, aw penga niyan se menge otaw kenà Judiyo.

2 Korinto 2:15

Meluba se Timanem aw megtoladà a tepad ki Cristo diyà te menge otaw nemenal aw diyà heman te menge otaw ipelumun.

1 Korinto 15:14

Simpana wedà keantay si Cristo lekat te nematay, yan wedad ontong te pegtoladà day, aw wedad heman ontong te pegpemenal niyo kandin.

1 Korinto 1:21

Wedad otaw metaga-taga te Timanem pineokit te kebiyasa dan. Meneng lekat te kebiyasa te Timanem, miglalang sikandin te ipelowà din se otaw memenal te kebenalan ipegtoladà kandan, pengkey doen otaw eg-aneng-aneng te wedad ontong kenyan.

Roma 11:22

Pineokit kenyan, netegahan tadon den te doen otaw keidowan te Timanem, aw doen heman otaw ipelumun din. Ipelumun din se otaw nekesalà, meneng keidowan kaw din aw tomayod kaw tomaking kandin. Meneng aw lomengà kaw tomaking kandin, inangen kaw din heman iling te panga tinepò.

Ininang 8:13

Nemenal heman si Simon. Penga te pegbonyag kandin, timaking ki Felipe, aw nepela sikandin diyà te kepelahan ininang i Felipe.

Ininang 2:47

Gayed dan ipegduyun se Timanem. Sinagman dan te menge doma otaw. Kelikit te aldaw, dinogangan te Pengolo se otaw nemenal.

1 Korinto 11:2

Na, mèpiya se ininang niyo, so gayed a niyo egkeeneng-enengan, aw egtekingan niyo heman se ketanem intoladà ko kenyo.