1 Korinto 14:4 - Manobo Sarangani

⁴ Aw mikagi se otaw te doma kagi eked kelebeti, olò kandin pegkeotawun se ketebangan din. Meneng aw komeliwat se otaw te kagi te Timanem, yan se meketabang te kedita te doma otaw egsimba.

1 Korinto 14:4 ပူးပေါင်းရင်းမြစ်များ

1 Korinto 14:22

Yan ketegahan tadon ini. Se peg-ikagi te kagi eked kelebeti, yan se petaga-taga te Timanem diyà te otaw egpengela te metoman dan detengan te pelumun, aw kenà ini petaga-taga diyà te otaw egpemenal. Meneng se pegkeliwat te kagi te Timanem, yan se tabang te Timanem diyà te otaw egpemenal, so kenà ini tabang diyà te otaw egpengela.

1 Korinto 14:26

Nayan menge kedowa ko, aw metipon kaw megsimba, seini se mèpiya inangen niyo. Doen megdelangan tepad te pegduyun te Timanem. Doen heman doma megtoladà. Doen heman doma meg-indan te kebenalan impekità te Timanem kandin. Se doma mikagi te kagi eked kelebeti, aw meg-obad heman se doma kenyan. Inangi niyo ini amon ketebangan se kedita niyo egtaking ki Cristo.

Mar. 16:17

Seini se menge pengilala inangen te menge otaw egpemenal kanak. Megpelowà dan te bosaw lekat te otaw pineokit te ngadan ko. Mikagi dan heman te kagi eked kelebeti.

1 Korinto 14:12

Sikiyo heman, aw meibeg kaw te kebiyasa ibegay te Espiritu Santo, yan mèpiya aw keibegan niyo se kebiyasa meketabang te menge doma niyo egsimba.

1 Korinto 14:5

Pengkey ibeg ko mekeikagi se kedita niyo te doma kagi eked kelebeti, meneng labi pa mèpiya aw mekekeliwat kaw te kagi te Timanem amon ketebangan se doma otaw egsimba. Labi pa mèpiya se pegkeliwat te otaw te kagi te Timanem diyà te peg-ikagi te otaw te kagi eked kelebeti aw wedad otaw mekeobad te ikegiyen din.

1 Korinto 14:3

Meneng aw komeliwat se otaw te kagi te Timanem, doma otaw se ikegiyan din kenyan, amon ketebangan din se pegsalig dan te Timanem, aw amon entagen din heman se pedowan dan, aw amon meketayod dan heman te kelimahan.

1 Korinto 13:2

Pengkey biyasa a egkeliwat te kagi te Timanem, pengkey doen impetaga-taga te Timanem kanak wedà din petega-tegahi diyà te doma otaw, pengkey netegahan ko se kedita te kebenalan, pengkey ontò a egsalig diyà te Timanem aw yan egpekeinang a te kepelahan, meneng aw wedad kedakel te pedowan ko diyà te doma otaw, wedad ontong kanak.

Roma 14:19

Nayan, pengkey eden se inangen tadon, keilangan eneng-enengen tadon amon eked kebàti se kelinaw te pedowan tadon, amon megpetebangay kidon te pegtaking tadon ki Cristo.

1 Korinto 12:10

Doen heman doma binegayan te Espiritu Santo te kebiyasa amon mekeinang te metolos inang diyà te doma otaw. Doen doma otaw mekekeliwat te kagi te Timanem. Se sebad otaw, doen imbegay kandin kebiyasa amon ketegahan din aw kenan lekat se tolos, aw lekat iyan te Timanem aw lekat te bosaw. Se sebad otaw, doen imbegay kandin amon mekeikagi te menge doma kagi eked din kelebeti. Se sebad otaw, doen imbegay kandin kebiyasa amon mekeobad te kagi eked kelebeti.

1 Korinto 12:28

Se kedita tadon egpemenal ki Cristo, tinapid kidon te Timanem te mèpiya, so doen eg-inangen te teg sebad-sebad kenitadon. Monà te kedita, yan se sogounun i Cristo. Se ikedowa, yan se otaw egkeliwat te kagi te Timanem. Se iketelo, yan se otaw megtoladà te kebenalan. Tondog niyan se mekeinang te metolos inang, aw otaw binegayan te kebiyasa amon megpegolì te menge mesakit, aw otaw egpenabang te doma, aw otaw biyasa egpengolo, aw otaw mekeikagi te menge doma kagi eked din kelebeti.

1 Korinto 13:1

Aw mekeikagi a te doma kagi te otaw wedà ko peg-ilingi, aw pengkey mekeikagi a te kagi te menge anghil, meneng aw wedad kedakel te pedowan ko diyà te doma otaw, wedad ontong te peg-ikagi ko, so iling a te daging te agong selegsagen aw mekebebingel.