1 Korinto 13:2 - Manobo Sarangani

² Pengkey biyasa a egkeliwat te kagi te Timanem, pengkey doen impetaga-taga te Timanem kanak wedà din petega-tegahi diyà te doma otaw, pengkey netegahan ko se kedita te kebenalan, pengkey ontò a egsalig diyà te Timanem aw yan egpekeinang a te kepelahan, meneng aw wedad kedakel te pedowan ko diyà te doma otaw, wedad ontong kanak.

1 Korinto 13:2 ပူးပေါင်းရင်းမြစ်များ

1 Juan 4:8

Meneng se otaw wedad kedakel te pedowan din, yan se otaw kenà egtaking te Timanem, so ontò dakel se pedowan te Timanem.

1 Korinto 13:3

Pengkey tigkan ko ibegay se kedakel te kedònan ko diyà te doma otaw, pengkey mepakay diyà kanak se pegsonog te lawa ko tandà te pegpemenal ko, meneng aw wedad kedakel te pedowan ko diyà te doma otaw, wedad ontong te peg-inang ko kenyan.

Mat. 17:20

Minikagi si Jesus, “Wedà niyo iyan kebatog so wedà pa kelobos se pegsalig niyo diyà kanak. Mikagi a den diyà kenyo te pengkey deitek pa se pegsalig niyo diyà kanak iling te kedeitek te benì te mostasa, mekebatog kaw mikagi diyà te bontod seini te malin iyan, aw tomolò iyan kenyo, so wedad palos eked niyo kebatog. [

1 Korinto 16:22

Pengkey sinu se wedad pedowan diyà te Pengolo tadon, ipelumun dan. Lomikò se Pengolo tadon te eked kenamay.

Mat. 21:21

Minikagi si Jesus, “Eneng-enengi niyo se kagi ko kenyo seini. Aw somalig kaw diyà te Timanem aw eked kaw pegdowa-dowa, meg-inang kaw te kepelahan labi pa metolos diyà te ininang ko diyà te kayo seini. Aw mikagi kaw diyà te bontod seini te meabat iyan aw mealin doton te dagat, metoman iyan meinang.

Efeso 3:4

Aw megbasa kaw kenyan, ketegahan niyo heman se netegahan ko tepad ki Cristo wedà petega-tegahi gebii.

1 Korinto 13:1

Aw mekeikagi a te doma kagi te otaw wedà ko peg-ilingi, aw pengkey mekeikagi a te kagi te menge anghil, meneng aw wedad kedakel te pedowan ko diyà te doma otaw, wedad ontong te peg-ikagi ko, so iling a te daging te agong selegsagen aw mekebebingel.

Galasya 5:16

Seini se punù ko kenyo. Toloi niyo se Espiritu Santo, amon eked niyo ketolò se medaet ibeg te pedowan niyo.

Kolasas 1:26

Yan se kebenalan wedà din petega-tegahi diyà te menge otaw gebii lamig songkani. Meneng impetaga-taga din den iyan diyà te menge sakop din,

Galasya 6:3

Aw aneng-aneng te otaw eked sikandin keboyo te medaet, yan se lekatan te kedegdagan din pesalo te kededàtan, so neekalan sikandin.

Galasya 5:22

Meneng se otaw egbeyà-beyaan te Espiritu Santo, seini se eg-inangen din. Egkedekelan din se doma otaw te pedowan, ontò egkeluba, doen kelinaw te pedowan din, egpeketayod te kelimahan, mèpiya se eg-inangen din, egkebowasag sikandin diyà te doma otaw, aw egkeseligan sikandin,

1 Korinto 12:28

Se kedita tadon egpemenal ki Cristo, tinapid kidon te Timanem te mèpiya, so doen eg-inangen te teg sebad-sebad kenitadon. Monà te kedita, yan se sogounun i Cristo. Se ikedowa, yan se otaw egkeliwat te kagi te Timanem. Se iketelo, yan se otaw megtoladà te kebenalan. Tondog niyan se mekeinang te metolos inang, aw otaw binegayan te kebiyasa amon megpegolì te menge mesakit, aw otaw egpenabang te doma, aw otaw biyasa egpengolo, aw otaw mekeikagi te menge doma kagi eked din kelebeti.

1 Korinto 7:19

Pengkey tolien se otaw aw eked tolii, kenà niyan se meelagà diyà te Timanem, meneng yan se meelagà aw toloen tadon se punù te Timanem kenitadon.

1 Timoteo 3:16

Netegahan te kedita tadon te ontò mèpiya se kebenalan impetaga-taga te Timanem aw pinemenalan tadon. Migpekeotaw si Jesu Cristo aw dimini te tanà. Impetaga-taga te Espiritu Santo te metòlid sikandin. Kinità sikandin te menge anghil. Inindanan se menge otaw kenà Judiyo tepad kandin. Doen otaw nemenal kandin doton te kebelad te tanà. Inengat sikandin doton te langit.

Efeso 6:19

Pegtawal-tawal kaw heman tepad kanak, amon begayan a te Timanem te kebiyasa te pegtoladà ko te kagi din. Pegtawal-tawal kaw tepad kanak amon wedad lamit ko te pegtoladà ko te Mèpiya Indan tepad ki Cristo, sìyan wedà din petega-tegahi diyà te otaw gebii.

1 Korinto 4:1

Yan keilangan meg-aneng-aneng kaw te sikami si Apolos se insogò i Cristo, aw insalig te Timanem kenami se kebenalan ipegtoladà day kenyo.

Roma 16:25

Na, iduyun tadon se Timanem. Sikandin olò se mekelobos te pegsalig niyo diyà kandin pineokit te Mèpiya Indan ipegtoladà ko tepad ki Jesu Cristo, aw pineokit te kebenalan nenamay wedà petega-tegahi te Timanem gebii.

Roma 11:25

Menge kedowa ko kenà Judiyo, doen kebenalan wedà pa petega-tegahi lamig songkani, meneng ipetaga-taga ko den iyan diyà kenyo amon eked kaw peg-aneng-aneng te sikiyo olò se otaw netaga-taga te kebenalan. Metugul se keditaan te Judiyo songkani. Eked dan taking te Timanem singed aw onà megpesakop se kedita te otaw kenà Judiyo pinemallì te Timanem.

Mat. 21:19

Kinità din se kayo igira medapag te dalan, aw dimoton sikandin amon mahà te pongo niyan. Meneng wedad palos pongo kinità din, olò menge dawen. Minikagi sikandin diyà te kayo, “Eked den palos pongo se kayo seini.” Wedà kenamay, nelanes se kayo sìyan.

Mat. 13:11

Timaba si Jesus, “Sikiyo se pinetega-tegahan te Timanem te kebenalan tepad te peglowan din. Meneng wedà din petega-tegahi se doma otaw te kebenalan tepad te peglowan din.

2 Korinto 12:11

Siak se iling te otaw wedad inenengen so dimuyun a te kanak pegkeotawun, meneng sikiyo se migleges kanak. Mèpiya pa peden aw sikiyo se domuyun kanak. Pengkey doen menge kelomayan ko, meneng kenà melangkaw diyà kanak se menge otaw doton kenyo eg-ikagi te sikandan se benal sogounun i Cristo.

1 Korinto 14:39

Nayan menge kedowa ko, ontò kaw pekeaseb te pegkeliwat te kagi te Timanem, meneng ikà niyo egsagda te peg-ikagi te kagi eked kelebeti.

1 Korinto 8:4

Nayan, tepad te pegkaen te pengelapen imbegay diyà te inotaw, benal se inikagi niyo te kenà ontò timanem se egbegayan dan. Benal heman se inikagi niyo te olò sebad se Timanem.

Ininang 13:1

Doen menge telekeliwat te kagi te Timanem aw menenoladà te otaw egpemenal kidoen te Antyokya. Sikandan si Bernabe, aw si Simeon, se doma ngadan din si Meitem, aw si Lucio tege Sirene, aw si Saulo, aw si Manaen doma i Herod migpetillesay.

Roma 15:14

Menge kedowa ko, netegahan ko den te gayed mèpiya se eg-inangen niyo, aw tinoledaan kaw te kebenalan tepad te Timanem, aw mekebatog kaw heman megpetoledaay.

1 Korinto 11:4

Aw megsimba kaw, aw tedongan te meama se olo din te pegtawal-tawal din aw pegkeliwat din te kagi te Timanem, yan mekeyèyaay sikandin, so kenà din egbesahan si Cristo.

1 Korinto 13:8

Wedad temanan te kedakel te pedowan din. Doen kwani aldaw domateng te wedad komeliwat te kagi te Timanem. Megkewedad heman se peg-ikagi te doma kagi eked kelebeti. Wedad heman meg-indan-indan te toladà diyà te doma otaw amon mekelabet.

1 Korinto 14:4

Aw mikagi se otaw te doma kagi eked kelebeti, olò kandin pegkeotawun se ketebangan din. Meneng aw komeliwat se otaw te kagi te Timanem, yan se meketabang te kedita te doma otaw egsimba.

1 Korinto 14:29

Aw doen otaw kidoen kenyo biyasa komeliwat te kagi te Timanem, mepakay aw dowa aw kenà telo olò se mikagi, aw keilangan menenalan se kedita megsimba, amon ketegahan dan aw metòlid se ikegiyen dan.

1 Korinto 15:51

Nayan, ikegiyen ko den kenyo se kebenalan wedà pa petega-tegahi te Timanem. Eked kematay se kedita tadon, meneng tigbayà se lawa tadon keselilinan te kaling lawa.