1 Korinto 1:23 - Manobo Sarangani

²³ Meneng se ipegtoladà day, yan se kebenalan tepad ki Cristo inlansang diyà te kros, pengkey egkebensi se menge Judiyo kenyan, aw eg-aneng-aneng se menge Griego te wedad ontong niyan.

1 Korinto 1:23 ပူးပေါင်းရင်းမြစ်များ

1 Korinto 2:14

Meneng se otaw kenà egbeyà-beyaan te Espiritu Santo, yan se otaw eked pekekinawà te ibegay te Espiritu Santo, so aneng-aneng din wedad ontong niyan. Eked din iyan kelebeti, so kelebetan iyan olò aw tebangan kidon te Espiritu Santo.

1 Pedro 2:8

Doen heman kagi te Timanem insolat, “Yan se bato mekebangkil kandan. Yan se bato kedogsoan dan.” Yan se dimateng kandan so wedà dan penenalan te kagi te Timanem, aw yan se pelumun impetagad din kandan.

1 Korinto 2:2

so ibeg ko, sebad olò se itoladà ko kenyo, yan si Jesu Cristo aw pegkematay din kidoen te kros.

Galasya 5:11

Migkebolalaw dan so minikagi dan te egtoladà a te keilangan tolien kidon aw tomolò te punù ingkeliwat i Moises amon meg-aneng-aneng se Timanem te metòlid kidon. Meneng kenà iyan benal. Simpana yan se ipegtoladà ko, eked a den pemilangi te menge Judiyo, aw eked a dan heman kebensihi te pegtoladà ko tepad te pegkematay i Cristo doton te kros.

1 Korinto 1:18

Pengkey eg-aneng-aneng se otaw kenà egpemenal te wedad ontong te kebenalan ipegtoladà ko tepad te pegkematay i Cristo doton te kros, meneng sikitadon egpemenal se netaga-taga te egpelowà den se Timanem te otaw lekat te salà pineokit te pegkematay i Cristo.

Luc. 2:34

Migtawal-tawal si Simeon te ketebangan dan te Timanem, aw minikagi sikandin diyà te inay te batà si Maria, “Na, meinang se batà seini pengilala kitaen te medita bowad-bowad i Israel. Aw komità dan kandin, medita se otaw komulu kandin aw ipelumun dan, meneng medita se doma otaw somalig diyà kandin aw mekelowà dan lekat te pelumun,

Galasya 6:14

Meneng se kanak, eked a keibeg domuyun te kanak pegkeotawun. Sebad olò se iduyun ko, yan se Pengolo tadon si Jesu Cristo. Nematay sikandin doton te kros amon megpelowà kenitadon lekat te salà. Pineokit te pegkematay din, kenà a den egkeallang te medaet ibeg te keneyonan, aw eked a den heman keibeg taking te mekeboyo.

Mat. 13:57

Yan nebensi dan kandin. Meneng minikagi si Jesus, “Gayed egsegmanen te doma otaw se telekeliwat te kagi te Timanem, meneng kenà sikandin egsegmanen te otaw te kandin lonsod aw menge kedowa din.”

Mat. 11:6

Indani niyo heman sikandin te doen keluba te otaw eked pegdowa-dowa te pegsalig din kanak.”

Efeso 3:8

Pengkey siak se ontò medanà diyà te kedita te sakop te Timanem, meneng pinemallì a din amon megtoladà kenyo menge otaw kenà Judiyo tepad te ontò mèpiya tabang i Cristo kenitadon eked tadon ontò kelebeti.

Galasya 3:1

Tay law kenyo menge otaw kidoen te Galasya, iling te wedad inenengen niyo. Impesoway kaw den te menge doma otaw kenà egtolò te kebenalan intoladà ko kenyo kedengan. Impesoway kaw dan pengkey tapay niyo dinineg se intoladà ko kenyo, pengkey tapay ko den sikiyo inindanan tepad te pegkematay i Cristo kidoen te kros.

2 Korinto 4:5

Sikandin se Pengolo eglowan aw yan se gayed ko ipegtoladà. Kenà ibeg ko iduyun se kanak pegkeotawun, meneng neketabang a kenyo pineokit te pegtoladà aw tandà te kedakel te pedowan ko ki Cristo.

1 Korinto 1:28

Pinemallì din heman se menge otaw wedad kelangkaw aw eglindoan te doma aw wedad ontong, amon ipekità din te wedad ontong te aneng-aneng tadon doen ontong.

1 Korinto 1:21

Wedad otaw metaga-taga te Timanem pineokit te kebiyasa dan. Meneng lekat te kebiyasa te Timanem, miglalang sikandin te ipelowà din se otaw memenal te kebenalan ipegtoladà kandan, pengkey doen otaw eg-aneng-aneng te wedad ontong kenyan.

1 Korinto 4:10

Pengkey wedad ekon inenengen day so egtaking kay ki Cristo, meneng aneng-aneng niyo doen inenengen niyo so egtaking kaw ki Cristo. Pengkey wedad ekon mebatog day inangen, meneng aneng-aneng niyo mebatog niyo inangen se kedita pengkey eden. Sikiyo se nedengeg, meneng sikami se eglindoan.

Menge Hebreo 12:2

Keilangan tomaking kidon ki Jesus, so sikandin se ontò tadon peg-ilingan te pegsalig tadon diyà te Timanem, aw meinang heman melobos se pegsalig tadon diyà te Timanem pineokit te tabang i Jesus. Timayod sikandin te kelimahan te peglansang kandin doton te kros. Wedà sikandin keyàyà te neinang diyà kandin, meneng timayod sikandin te peg-imatay kandin, so netegahan din te meluba sikandin aw mepenga se kedita niyan. Egpenenoo den sikandin kidoen te tangkil te Timanem Amay din aw eglowan doma din.