1 Juan 3:24 - Manobo Sarangani

²⁴ Se kedita te otaw egtolò te punù te Timanem, diyà dan te Timanem aw se Timanem heman diyà kandan. Netegahan tadon te diyà kenitadon se Timanem so pineokit te Espiritu Santo imbegay din kenitadon.

1 Juan 3:24 ပူးပေါင်းရင်းမြစ်များ

1 Korinto 3:16

Netegahan niyo den ini. Se kedita niyo egpemenal, iling kaw te balay te Timanem, aw eg-ogpà se Espiritu Santo kidoen kenyo.

2 Timoteo 1:14

Pineokit te tabang te Espiritu Santo eg-ogpà diyà kenitadon, peg-ahà ka te metòlid se pegtoladà no te kebenalan insalig diyà kamno.

1 Juan 2:6

Aw eg-ikagi se otaw te diyà sikandin te Timanem, keilangan inangen din se kandin pegkeotawun iling te pegkeotawun i Jesu Cristo.

1 Korinto 6:19

Nelibelan niyo den besi ini. Se lawa niyo, yan se eg-ogpaan te Espiritu Santo imbegay te Timanem kenyo, aw kidoen lamig songkani. Yan se doun te kenà kenyo se lawa niyo, meneng Timanem se tig-apò kenyan,

1 Juan 4:7

Menge kedowa egkedekelan ko te pedowan, keilangan gayed kidon megpedekelay te pedowan, so Timanem se eglekatan te dakel pedowan. Se otaw doen dakel pedowan din, yan se ininang te Timanem batà din aw egtaking heman te Timanem.

Juan 17:21

Ibeg ko megsebad dan te pedowan, iling te pegsebad te pedowan ta seini, so sikona Amà, diyà ka kanak, aw diyà a heman kamno. Iling heman kenyan, ibeg ko diyà dan kenita, amon memenal se kedita te otaw dini te keneyonan te insogò a nikaw.

1 Juan 3:22

Pengkey eden se pemoyoen tadon diyà kandin, netegahan tadon te mekinawà tadon iyan, so egtolò kidon te menge punù din aw ibeg din.

2 Korinto 6:16

Eked kepakay aw simbahen se inotaw doton te balay te Timanem. Se kedita tadon egpemenal, sikitadon se balay eg-ogpaan te Timanem wedad temanan din. Iling te inikagi te Timanem tepad te menge Judiyo gebii, kagi din, “Meg-ogpà a kidoen kandan. Doen inangen ko kidoen kandan. Siak se simbahen dan, aw siak se megtabang kandan.”

Juan 10:38

Meneng aw yan se eg-inangen ko, pengkey eked kaw pemenal kanak, pemenal kaw te Timanem se eglekatan te kepelahan eg-inangen ko, amon ketegahan niyo pa te diyà kanak se Amay ko, aw diyà a te Amay ko.”

Juan 14:17

Yan se Espiritu Santo egtoladà te kebenalan. Eked sikandin kinewai te menge otaw egtaking te medaet ketanem te keneyonan, so kenà dan egkità kandin, aw kenà dan egketaga-taga aw sinu sikandin. Meneng sikiyo, netaga-taga kaw den kandin, so egdomaan kaw din aw ogpaan kaw te wedad temanan.

1 Tesalonika 4:8

Yan aw doen otaw eked tolò te punù sìyan, kenà otaw se egkuluwan din meneng egkuluwan din se Timanem nemegay kenyo te Espiritu Santo.

1 Juan 2:3

Seini se pengilala amon ketegahan tadon te ontò Timanem se egtekingan tadon. Aw egtolò kidon te menge punù din, yan ketegahan tadon te egtaking kidon kandin.

1 Juan 2:5

Meneng se otaw egtolò te kagi te Timanem, yan se otaw ontò nelobos se kedakel te pedowan din diyà te Timanem. Yan se pengilala te ontò kidon den diyà te Timanem.

1 Juan 2:24

Nayan, keilangan sikopen niyo se pegpemenal niyo diyà te kagi te Timanem intoladà kenyo lekat te pegpemenal niyo ki Jesu Cristo lamig seini, so aw ontò niyo lobosen se pegpemenal niyo diyà te kagi te Timanem, diyà kaw te Timanem Amay aw Batà din.