1 Juan 3:12 - Manobo Sarangani

¹² Keilangan eked kidon peg-iling ki Cain migpesakop diyà ki Satanas, so nengimatay te adi din. Nengimatay sikandin so medaet se eg-inangen din, aw miningà te adi din eg-inang te metòlid.

1 Juan 3:12 ပူးပေါင်းရင်းမြစ်များ

Menge Hebreo 11:4

Gebii, simalig si Abel diyà te Timanem, aw yan mèpiya se imbegay din diyà te Timanem, kenà iling te imbegay te kedowa din si Cain. Pineokit te pegsalig i Abel, mig-aneng-aneng se Timanem te metòlid sikandin. Impetaga-taga te Timanem te mig-aneng-aneng sikandin te metòlid si Abel pineokit te pegkinawà din te imbegay din. Pengkey nenamay den si Abel nematay, meneng doen pa peg-ilingan tadon diyà kandin tandà te pegsalig din diyà te Timanem.

Genesis 4:25

Nayan, penga te pegkematay i Abel, migpeleyokay si Adam aw esawa din, aw doen batà meama timebaw diyà ki Eva. Iningedanan din se batà din ki Set (kelebadan niyan, imbegay), so minikagi sikandin, “Binegayan a te Timanem te sebad batà inselilin ki Abel, so inimetayan sikandin i Cain.”

Judas 1:11

Mekelelayò dan, so medaet se domateng kandan. Nekesalà dan iling ki Cain kimulu te Timanem gebii. Mig-iling dan heman ki Balaam gebii, so timandù dan heman meg-inang te medaet amon mengewarta dan. Egbolaw dan te menge otaw insogò te Timanem iling ki Kora gebii, aw pegbàtan dan heman te Timanem iling te pegbaet din ki Kora.

Luc. 11:51

lekat te peg-imatay dan ki Abel taman te peg-imatay dan ki Zacarias kidoen te dowangen te dakel simbahan medapag te sonoganan te ayam-ayam ibegay diyà te Timanem. Mikagi a den diyà kenyo te metoman ipelumun te Timanem se kedita niyo songkani tandà te pegpengimatay kandan.

Mat. 23:35

Yan se metoman niyo inangen amon ipelumun te Timanem se kedita niyo tandà te pegpengimatay te kemonaan niyo te menge otaw eg-inang te metòlid, lekat te peg-imatay dan ki Abel, pengkey wedà peg-inang te salà, taman te peg-imatay dan ki Zacarias batà i Barakia kidoen te dowangen te dakel simbahan medapag te sonoganan te ayam-ayam ibegay diyà te Timanem.

1 Pedro 4:4

Nepela den se menge medaet otaw tinekingan niyo kedengan, so kenà kaw den egtaking kandan te peg-inang dan te pengkey eden se medaet ibeg dan, aw yan egtompuyus dan kenyo.

Menge Hebreo 12:24

Migpedapag kidon den diyà ki Jesus mig-inang te kaling peokit amon mekepedapag kidon diyà te Timanem. Lininisan kidon te dipanog din lekat te salà, aw yan se pengilala te doen keido te Timanem kenitadon. Labi pa iyan mèpiya diyà te dipanog i Abel, so yan se pengilala te keilangan ipelumun se kedowa din nengimatay kandin.

1 Juan 3:8

Meneng sakop i Satanas se otaw gayed megpedeleg te peg-inang te salà, so gayed migpedeleg si Satanas te peg-inang te salà lekat te gebii te wedà pa inangi se keneyonan lamig songkani. Yan migpekeotaw se Batà te Timanem si Jesus amon pegbàtan din se kedita te medaet inang i Satanas.

Ininang 7:52

Pinemilang te kemonaan tadon se kedita te telekeliwat te kagi te Timanem, so inimetayan dan se otaw mig-indan kandan te domateng se isogò te Timanem wedad salà din. Pegdateng din, migtolok aw nemonò kaw kandin.

Juan 10:32

Meneng minikagi si Jesus, “Medita se mèpiya ininang ko aw kinità niyo, so insogò a te Amay ko Timanem. Eden lay se ininang ko te imetayan a niyo?”

Mat. 27:23

Mig-insà si Pilato, “Nengà lay? Eden lay se salà ininang din?” Meneng labi pa dakel se kagi dan aw migbelobansag dan, “Imetayi sikandin. Lensangi diyà te kros.”

Mat. 13:38

Se pawà, yan se keneyonan. Se mèpiya benì, yan se menge otaw migpesakop diyà te peglowan te Timanem. Meneng se sagbet, yan se menge sakop i Satanas.

Mat. 13:19

Se benì nesabog diyà te dalan, yan se iling te otaw domineg tepad te peglowan te Timanem meneng eked sikandin pekelabet. Penga niyan, doen inangen i Satanas amon kelibelan din se kagi te Timanem dinineg din.

Impekità 17:6

Kinità ko heman te nelasing den se bayi sìyan, so ininem din se dakel dipanog te menge sakop te Timanem inimetayan din tandà te pegsalig dan diyà ki Jesus. Pegkità ko kandin, ontò a nepela.

1 Tesalonika 2:14

Menge kedowa day, neinang kaw den iling te menge sakop te Timanem egpemenal ki Jesu Cristo doton te Judiya. Pinemilang dan te menge doma dan Judiyo, aw iling kaw kandan so pinemilang kaw heman te menge doma niyo kenà Judiyo.

Mat. 5:37

Aw keseligan se kagi niyo, botong aw olò kaw tomaba, ‘Ee,’ aw ‘Eked.’ Aw keilangan isogpat niyo se sapà diyà te kebenalan, medaet iyan, so lekat iyan ki Satanas.”

Juan 8:40

Meneng pengkey migtoladà a kenyo te kebenalan impetaga-taga te Timanem kanak, meneng ibeg niyo mengimatay kanak. Kenà niyan se ininang i Abraham.

Juan 8:41

Yan iling kaw te amay niyo.” Minikagi dan, “Kenà kay batà te lowà. Sebad olò se Amay day, aw yan se Timanem.”