Luk Tiratna Kam Wembaŋ Laŋ 22:20 - Raraŋ Aetaniacna Kam Wembaŋ Laŋ

²⁰ Karica mina amba maiatke, ma kabena wain pukna kab aŋgɨca, anmo, an kirar kabea moca, aindopatna, “Gan kab wainna, anna aukna racaindpaik, an mbuŋ Raraŋ Aetaniacap kam ŋgam leacrina, an racaindpaikca nena moca ruŋkinande.

Luk Tiratna Kam Wembaŋ Laŋ 22:20 ပူးပေါင်းရင်းမြစ်များ

Matiu 26:28

Anna aukna racaindpaik, na an mbuŋa ne Raraŋ Aetaniacap kam leacrina. Na aukna racaindpaikca aku meikramtaɨr wɨt muruŋna tɨpemb ŋgorikta makukara mo kecarina.

Mak Tiratna Kam Wembaŋ Laŋ 14:24

Ri, ma minmo gaindopatna, “Ganna aukna racaindpaik, na an mbuŋa Raraŋ Aetaniacap kam leacrina. Na aku ruŋkinande, te, meikramtaɨr wɨtmo otacnandet.

1 Korin 11:25

Na mina amba maiatke, ma wainna kab aŋgɨca, an iro kabe mac moca, ma aindopatna, “Gan wain kabna pukca anna aku nenap kam ŋgam leacrina, ndona racaindpaik mbuŋ. Na memetmbaca, ne an kab mbuŋ ŋgamraŋ, na ne ainda moraŋ te, ne aukna ndamŋiraŋnandet.”

2 Korin 3:6

Na ma ndo aimo moa mɨnna tɨkca, aia an leacatna kam ŋgamna aiŋa mona ramtaɨr ndeacrena. Na an leacatna kam ŋgamma anna mina Tɨp Wandɨkna timbigta kapna inikca mba tirrinan, wanaiŋ. Anna Ŋeroŋ Ratna reac. Na Tɨp Wandɨkna kambca ma meikramtaɨra moa menacrenan, na Ŋeroŋ Ratnanna ma meikramtaɨrmo eteacna watta neaŋrenan.

Iburu 12:24

Ainda moca ne Iesus ndambuŋmo malaruat, na ma leacatna kam ŋgamca mo gagarana rɨkca wɨtɨkca eacrena ramoot. Na Iesusna racaindpaikca atua ma nemo kerinan, na an leacatna kammo, mo gagarananmo ne malaruat. Na an racaindpaikca ma aimo wiwitina kam ndoprinan, na an atua Abolna racaindpaikca wiwitia mbopatna kamna kirara wanaiŋ. Na Iesusna racaindpaikca ma kam laŋmo wiwitirenan ŋgoin.

Iburu 13:20

Na aina Kacoot Iesus, ma sipsiparta ŋginaŋa morena ramoot gargar. Na ma ndona racaindpaikmo neaŋga, an leacatna kammo, moa gagraca ma memetmbaca eacraŋnandet. Aintik Raraŋ Aetaniaca manmo mukca tɨkca mac nda aŋgɨatnan. Na mandeaca Raraŋ Aetaniaca ma nikinik iro wetwetna tɨp kirarna mɨnɨŋ. Na aku nikinik iro wetwetna Raraŋ Aetaniacmo mbendei digica, ma nenmo otaca, reik laiŋ neaŋ te, ne mana toŋtoŋa raŋgairaŋ. Na ma Iesus Karaisna aiŋ mbuŋa an tɨpemb kirarir muruŋa ma toŋgorinanmo, aia muruŋ naaŋgɨnandet. Te, memetmbaca aia iarwara mana i aniacmo aŋgɨ ŋgepraŋ. Na anna gidik.

Iburu 9:15

Ainda moca Karaisna racaindpaikca aimo Raraŋ Aetaniacna lamnɨac ŋgoutmo moca rat ŋgoin. Aintik Iesusa ma rɨkca wɨtɨkca eacrena ramoot ndarurina, te, ma leacatna kam ŋgammo, mo gagranan. Na ma menacatke, meikramtaɨrmo mac nda oikrina, na mina tɨpemb ŋgorikta makukarmo mo kecarina, an kɨdrɨkca an outna leacatna kamma eacari, mina moatnan. Na meikramtaɨra Raraŋ Aetaniaca acatna kamma waraca raŋgai te, mina an iarwarna eteacna watta atua Raraŋ Aetaniaca ndona mombonikmo neaŋ ndoprinanna, mina aŋgɨnandet. Te, mina iarwara laŋ ndeacnandet.

Iburu 9:17

Na an ramootta menac te, an leacatna kamma ma gargarap. Na an ramootta ma leacatna kamma ma menac ŋgocor ndeac te, mana an leacatna kamma ma wanaiŋ ndeacnandet.