Roma 14:22 - U Maganda A Baheta Ni Jesu-Cristo

²² Kanya ányaman u pánniwala mo ti bagayan iye hide, hiko dálla sakay u Diyos u dapat a makatukoy. Mapalad u tolay a awan gágguluwán nu konsensiya na dipo tu pággimet na tu bagay hide a tukoy na a tama.

Roma 14:22 ပူးပေါင်းရင်းမြစ်များ

Gimet 24:16

Kanya gimitán ko u atanan nu makaya ko tán awanák magkasala tu atubang nu Diyos sakay tu tolay hide.

Roma 14:14

Dipo tu pákpágkaessa ko tu Panginoon Jesus, siguraduwák a talaga a awan ti bawal a makan. Pero ni tu akala nu essa a tolay ay bawal u essa a makan, dapat dyan na kanán.

Roma 14:2

Halimbawa, tehhod a tolay a maniwala a atanan a pagkain ay maare a kanán. Tehhod be a mahina ti pánnampalataya sakay para nikuna, atong la u dapat a kanán.

Roma 14:23

Pero u deyaman a kuman a te págduwwa-duwwa ay nagkasala dipo awan ayun tu pánnalig na u gággimitán na. Dipo kasalanan u ányaman a bagay a gimitán tam a awan ayun tu pánniwala tam.

Roma 14:5

Tehhod a tolay a mángisip a mas mahalaga u essa a aldew kasera tu iba. Te tolay be a pare-pareho la u atanan a aldew para nikuna. U balang essa ay magdisisiyon tu sadile tungkul ti bagayan ina.

Roma 2:1

Nadid, makay ni kagiyán mo a dapat la a mahatulan i iye a tolay dipo tu kadukássan na. Pero maski hiko a maghatul ay awan ti medahilan. Dipo tu pághatul mo tu iba ay hinatulan mo dán be u sadile mo. Dipo gággimitán mo labe u konna hod a bagay.

Roma 7:15

Awan ko maintendiyan u sadili ko. Dipo awan ko magimet u mágkaganda hide a bagay a gusto ko a gimitán, sakay u bagay hide a umád ko a gimitán u gággimitán ko.

Roma 7:24

Kakagbi u kalagayan ko! ti deya u mángligtas nikán tu makasalanan a bággi a makapangatád nikán ti kamatayan?

1 Corinto 8:7

Pero awan atanan ay makatukoy ti iye. U agum ay nasanay ti itod a magsamba tu diyos-diyosan, kaya hanggan nadid, kapag ni kuman hide ti konna he ay u akala de ay alay padi tu diyos-diyosan u kákkanán de. Dipo wad a kulang u karunungan de, kaya mabalisa hide tu buung akala de a nagkasala hide.

2 Corinto 1:12

Essa a bagay u mepagmadakál me: nabiyag kame ti matuwid sakay tapat tu atubang nu atanan a tolay, lalu dán nikam. Nagimet mi iye dipo tu kagbi nu Diyos bakán a tu pamamag-itan nu karunungan nu mundu. Sakay mapatunayan nu isip me a tatahoden u ipagmadakál me.

Galacia 6:1

Kákkapatkákka ko hide, ni te nagkasala a kaguman moy, hikam a igággiyya nu Banal a Ispirito ay uhunán moy siya a pasoliyán tu Diyos. Pero magingat kam makay pate hikam ay matokso be.

Santiagu 3:13

Deya nikam u marunung sakay makaintendi? Patunayan moy iye tu pamamag-itan nu matuwid a kákkabiyag sakay u maganda a gimet bunga nu págpakababa sakay karunungan.

1 Juan 3:21

Mahal ko hide a kákkapatkákka, ni awan kitam balisaán nu konsensiya tam, ay mapayapa u isip tam a umadene tu Diyos.