Pahayag 3:21 - U Maganda A Baheta Ni Jesu-Cristo

²¹ U magtagumpay ay paetnudán ko a kasadát nu trono ko. Konna nikán a nagtagumpay, kaya nadid ay mággetnudák tu sadát nama ko tu trono na.

Pahayag 3:21 ပူးပေါင်းရင်းမြစ်များ

Mateo 19:28

Kinagi nide ni Jesus, “Pakatandaan moy iye: ni maghare dán u Anak nu Tolay tu kapangyariyan na tu paddemát a mundo a itatag nu Diyos, hikam a sumunod nikán ay maatádden labe ti kapangyariyan para hatulan u sapulo ay ti duwwa a lahi ni Israel.

Mateo 25:21

Kinagi nikuna nu amo na, ‘Malalaki! Tapat sakay mabait a utusan! Dipo nagin matapat ka tu badit a halaga, mamahala ka tu dakal a halaga. Sumáddáp ka sakay mákpagkasayaan ka nikán!’

Mateo 28:18

Ummadeni ti Jesus sakay kinagi na nide,” Inyatád dán nikán u atanan a kapangyariyan ti langit sakay ti lutaáy.

Lukas 22:30

Kapisan takam a kuman sakay uminom tu kahariyan ko, sakay mággetnod kam tu trono hide para mamahala tu sapulo ay ti duwwa a lahe ni Israel.”

Juan 13:32

Ni mehayag u karangalan nu Diyos dipo nikán ay ihayag be a pagdaka nu Diyos u karangalan tu Anak sakay gimitán na itod a pagdaka.”

Juan 16:33

Kinagi ko dán iye hide a bagay nikam, tán magkahod kam ti kapayapaan tu pákpagkaessa moy nikán. He ti munduway pahirapan dikam, pero pabegsákkán moy u isip moy dipo nagtagumpayák dán kontara tu kapangyariyan ni munduway.”

2 Timoteo 2:12

Ni pagtiisan tam u hirap sakay awan kitam umimang tu kássunud ni Jesus, Ay maghare kitam be a kaguman na. Ni ikasanike tam siya tu atubang nu tolay hide, Ay ikasanike na kitam be.

Pahayag 1:6

Sinakup na kitam tu kahariyan na, para makaguman na kitam a maghare a kaguman na. Imbilang na kitam be a saserdote a magserbi tu Diyos a Ama. U kapuriyan sakay u kapangyariyan a awan ti kahád ay para la ni Cristo! Amen.

Pahayag 12:11

Tinalo de u Diyablo tu pamamag-itan nu dige nu Tupa, sakay tu upos nu Diyos a impahayag de sakay awan hide nanghinayang tu biyag de maski hanggan tu kákkatay.

Pahayag 17:14

Geraán de u Tupa pero taluwán na hide, dipo siya u Panginoon nu atanan a panginoon sakay Hare nu atanan a hare. Kaguman na tu tagumpay u dinulaw sakay pinile na a nagin tolay na, a matapat a palagi a magserbi nikuna.”

Pahayag 2:7

Ni makaintendi kam, ay pakasanigán moy u kákkagiyán nu Banal a Ispirito tu gurupo nu mánnampalataya hide. “U magtagumpay ay atádden ko ti karapatan a kuman tu bunga nu kayo a makapangatád ti biyag a katoy tu kahariyan nu Diyos.”

Pahayag 20:4

Káttapos ay naketaák ti makpal a trono, sakay u mággetnod hide hod ay naatádden ti karapatan a maghatul. Sakay netan ko be u kaliduwwa nu pinutulan hide dipo tu págpatunay de tungkul ni Jesus sakay tu págpahayag de tu Upos nu Diyos. Awan hide simmamba tu makaánteng a hayup sakay tu rebulto na, sakay awan hide nagpatatak tu tatak nu makaánteng a hayup tu kidáp de oni tu kamát de. Biniyag hide tán mákapaghare hide a kaguman ni Cristo tu alay nu sanglibu a taon.

Pahayag 20:6

Pinagpala sakay Banal u makaguman hide tu purumero a págbiyag. Awan ti kapangyariyan nide u kaduwwa a kákkatay; magin saserdote hide nu Diyos sakay ni Cristo, sakay maghare hide a kaguman na tu alay nu sanglibu a taon.

Pahayag 5:10

Sakay pinagin hare mo hide sakay saserdote para magserbi tu Diyos. Sakay maghare hide ti lutaáy.”

Pahayag 6:2

Sakay káileng ko ay naketaák ti kabayo a mapudew sakay u mágkabayo ay te tatawed a pana. Inatádden siya ti kurona sakay limmakad tán mákpaglaban sakay tulos-tulos a magtagumpay.

Pahayag 7:17

Dipo u Tupa a katoy tu bállog nu trono u magin tagapag-alaga de. Iyangay na hide tu bukal a makapangatád ti biyag; sakay pahidán nu Diyos u luwa tu mata de, dipo awan dán ti dahilan para malungkut hide.”