Pahayag 20:2 - U Maganda A Baheta Ni Jesu-Cristo

² Dinakáp na u dragon, iye u biklat tu itod a panahun, siya u Diyablo oni Satanas. Sakay inggapus na tu alay nu sanglibu a taon,

Pahayag 20:2 ပူးပေါင်းရင်းမြစ်များ

Mateo 19:29

Sakay ni deya man u manglakad tu bilay na, kapatkaka na hide, ama sakay ina na hide, anak na hide, oni u luta na hide para nikán ay makatanggap be ti pendatos a beses tu linakaden na. Sakay pagkalooban siya ti biyag a awan ti katapusan.

Mateo 8:29

Pagdaka hide a pinumakhaw “Anak nu Diyos ánya u gimitán mo nikame? Inumangay ka beman he para parusaan kami maski awan padla odas nu pághirap me?”

Markos 4:15

sakay u bine hide a netákneg tu dilan ay u tolay hide a nakasaneg tu Upos nu Diyos. Pero tu káddemát ni Satanas ay inagew na u Upos nu Diyos a nasaneg de.

Markos 5:7

Sakay pinumákhaw siya ti mabegsák, kinagi na, “Jesus, Anak nu Kataas-taasan a Diyos, ánya i pákalam muway nikán? Ipananto mo tu ngahan nu Diyos a awanák mo pahirapan!”

Juan 12:31

Dummemát dán u odas a hatulan u mundu. Sakay palayasán ti Satanas a maghare tu mundu.

Juan 16:11

Sakay male be hide tungkul tu pághatul nu Diyos dipo ti Satanas a mángdipalongo he ti munduwáy ay nahatulan dán a awan dán ti karapatan a maghare.

Roma 16:20

U Diyos a pinaggábwatan ni kapayapaan ay adene nadán a puksaán u kapangyariyan ni Satanas tu pamamag-itan moy. Pagpalaán kam nu Panginoon Jesus.

Hebreo 2:14

Dipo u anak hide nu Diyos ay tolay, kaya nagin tolay be ti Jesus a konna nide a tehhod a pilas sakay dige. Nagin tolay siya tánni tu pamamag-itan nu kákkatay na ay matalo na u kapangyariyan ni Satanas, a tehhod a kapangyariyan tu kamatayan.

1 Pedro 5:8

Pirme kam a humanda sakay magbantay dipo u kadima moy a ti Satanas ay dumahi-dahengding a kumán a liyon a magtágguwang a magehyok ti sangwabán na.

2 Pedro 2:4

Dipo maski u anghel hide ay awan pinatawad nu Diyos nikuna nagkasala hide. Nan, intápduk na hide tu madisalad sakay madiham a ábbut tánni he di dán hod a uhayán u Aldew nu Pághatul.

Judas 1:6

Isipán moy be u anghel hide a awan nagtulos-tulos tu tungkulin de sakay inwahak u lugar a inyatád nide nu Diyos. Kaya ingapus hide nu Diyos ti kadena a awan mababágsot sakay impireso na hide tu tunay ti diklám a lugar hanggan tu káddemát nu Aldew nu Pághatul.

Pahayag 12:13

Nikuna ketan nu dragon a nebut dán siya ti lutaáy ay hinagad na u bábbey a náng-enak tu lállake a anak.

Pahayag 12:15

Kanya náng-obla ti dinom u biklat a konna tu konayan tánni meanod u bábbey.

Pahayag 12:17

Dipo tu iyamut nu dragon ay binalingan na a geraán u nabuhay a lahe nu bábbey. Iye u tolay hide a sumássunud tu utus nu Diyos sakay nagtulos-tulos a nagin tapat tu tatahoden a inhayag ni Jesus.

Pahayag 12:3

Sakay tehhod pa a essa a senyal a limmitaw ti langet: essa a dragon a madideg. Tehhod siya a pitto a ulo sakay sapulo a saduk sakay tehhod a kurona u bawat ulo na.

Pahayag 12:4

Kinahed nu ipos na u katállo a parte nu biton hide ti langet sakay insapwag na itod ti lutaáy. Káttapos ay timmaknág siya tu áoyadan nu bábbey a adene dán a magenak tánni itálmok na u anak tu kálluwas na.

Pahayag 12:9

U dragon, a dáddulawán be a biklat tu itod a panahun, u ngahan na ay Diyablo oni Satanas. Siya u nangdaya ti buuwáy a mundu. Imbut siya ti munduway, kaguman u nasakupan na hide.

Pahayag 13:2

U hayup a netan ko ay kumán a idsura ni leopardo, u tika-tikád na ay kumán a tikád ni oso sakay u labi na ay kumán a labi ni liyon. Inyatád nu dragon nikuna u kapangyariyan na, u trono na, sakay u malawak na a karapatan a mamuno.

Pahayag 13:4

Sinamba nu atanan a tolay u dragon dipo inyatád na u kapangyariyan na tu makaánteng a hayup. Sakay sinamba di be u makaánteng a hayup kinagi de, “Deya makapangpantayay tu makaánteng a hayup? Deya makakayaay a lumaban nikuna?”

Pahayag 20:10

Sakay u Diyablo a nangdaya nide ay ibut tu kumán a diget a apoy sakay tu asupre, a nángbutan labe tu makaánteng a hayup sakay tu mágkabule a prupeta. Aldew ay ti gibi ay mamágkaguman hide a pahirapan hod hanggan-hanggan.

Pahayag 20:7

Sakay káttapos nu sanglibu a taon ay palayaán ti Satanas tu kákkepiresu na.

Pahayag 9:11

U hare de ay u anghel a mágbantay tu ábbut a tunay ti kadsalad. U ngahan na tu upos a Hebreo ay Abadon, sakay ti Griego ay Apolion; u gusto na a kagiyán ay Tagapagsida.