Efeso 6:17 - U Maganda A Baheta Ni Jesu-Cristo

¹⁷ Lagi kambe a manalig a natanggap moy dán u kaligtasan moy a gábwat ni Cristo kanya hikam ay ligtas dán, konna tu essa a sundalo a manalig dipo tukoy na ate helmet siya a pangdipensa na tu ulu na. Sakay dapat lagi kam a handa a magpahayag tu upos nu Diyos a itoldu nikam nu Banal a Ispirito, dipo iye u kumán moy a áttak.

Efeso 6:17 ပူးပေါင်းရင်းမြစ်များ

Mateo 4:4

Pero timmábbeg ti Jesus “Umádko, dipo nesulat tu Upos nu Diyos a ‘Bakán la a tu makan a mabiyag i tolayay pero kailangan na pa u atanan a upos nu Diyos.’ ”

Mateo 4:7

Pero timmábbeg ti Jesus “Nesulat be a ‘Dyan ka maggimet ti essa a bagay para la purbaan mo ni talaga a gimitán nu Panginoon a Diyos u panantu na hide.’ ”

Efeso 5:26

Ginimet na iye para hikitam a mánnampalataya hide ay magin banal tu atubang nu Diyos dipo hikitam ay imbilang na a nalinisan dán tu pamamag-itan nu pánniwala tam tu upos na kanya hikitam ay nabawtismuwan dán tu dinom.

1 Tesalonica 5:8

Pero hikitam a sakup dán nu demlag ay dapat kitamon a magisip ti maayus. U pannampalataya sakay pagmahal u kuman a pangsangga a Isulot tam. Sakay u pag-asa nu kaligtasan a gimitán nikitam nu Diyos u kuman a helmet a mang-ingat nikitam.

Hebreo 4:12

Dipo u upos nu Diyos ay biyag sakay makapangyariyan sakay mas matalas nan u áttak a magdiluputan ti tadám, ladássán na hanggan tu paghiwalayan nu kaliduwwa sakay ispirito, kasukasuwan hanggan tu uták nu tulang. Sakay tukoy na u katoy tu isip sakay plano nu tolay.

Hebreo 6:5

Nadanas di dán be u kagandaan nu upos nu Diyos, sakay u kapangyariyan nu Diyos a maghare tu dumemát a panahun.

Pahayag 1:16

Táttawed na u pitto a biton tu kawanan na a kamát sakay magluwas tu labi na u ispada a magdiliputan ti ngahab. Sakay makasile u hupa na a konna tu mainit a tanghale.

Pahayag 12:11

Tinalo de u Diyablo tu pamamag-itan nu dige nu Tupa, sakay tu upos nu Diyos a impahayag de sakay awan hide nanghinayang tu biyag de maski hanggan tu kákkatay.

Pahayag 19:15

Tehhod a magluwas tu labi na a matalas a áttak; gamitán na iye para pangdaig tu bansa hide. Paghariyan na hide ti sampilitan sakay awan ti sumuway nikuna. U tolay hide ti munduway a komontara tu Diyos ay iparanas na nide u págparusa nu Diyos a makapangyariyan tu atanan. Iye u gusto a kagiyan nu pagbulusán na tu págpáspássán ti ubas u alak nu iyamut nu Diyos.

Pahayag 2:16

Kaya magsise kamon sakay adággen u kasalanan moy hide! Ta ni awan ay angayák hina a pagdaka sakay labanan ko i tolayan hiden na tu pamamag-itan nu ispada a lumuwas ti labi kuwáy.