Colosas 3:16 - U Maganda A Baheta Ni Jesu-Cristo

¹⁶ U upos hide ni Cristo ay iyasák moy tu isip moy. Mamágpaala-alaan kam sakay mamágtolduwan tu balang essa ayun tu karunungan a kaluub nu Diyos. Mágkansiyon kam ti pang-ispirituwal a kansiyon a gábwat tu Diyos a te págpasalamat.

Colosas 3:16 ပူးပေါင်းရင်းမြစ်များ

Mateo 26:30

Sakay káttapos di a magkansiyon ti essa a pasalamat, immangay hide tu Buked nu Olibo.

Lukas 2:51

Káttapos ay nákkuyog dán ti Jesus tu dáddakál na hide a pasole ti Nazaret, sakay nagin masássunudán siya nide. Pinakatandaan nu ina na u atanan a bagay a nangyare.

Juan 15:7

Ni manatile kam nikán, sakay u upos ko ay manatile be nikam, ay iyatád ko u ánya man a agidán moy.

Roma 10:17

Kanya sumampalataya la u tolay ni masaneg na u mensahe tungkul ni Cristo. Sakay makasaneg la siya ni tehhod a mangaral tungkul ni Cristo.

Roma 15:14

Kákkapatkákka ko hide, maniwalaák a talaga a tunay kam ti kabaitan, te sapat a tukoy sakay marunung a magpaala-alaan tu balang essa.

1 Corinto 14:15

Kaya para nikán, ni magdasalák, bakán la au ispiritu ko u magdasal nan gamitán ku be u isip ko a magdasal. Konna bi hod ni mágkansiyonák. Mágkansiyonák tu pamamag-itan nu ispirito ko, pero gamitán ko be u isip ko a mágkansiyon.

1 Corinto 14:26

Ánya nadid u gusto ko a kagiyán ti iye hide a atanan, kákkapatkákka hide? Ni hikam ay mamággipun-ipun, ay dapat tehhod a mágkansiyon, tehhod a magtoldu, tehhod a magpahayag tu kaluuban nu Diyos, tehhod a magupos ti iba-iba a upos, sakay tehhod be a mángpaliwanag tu kákkagiyán na. Gimitán moy iye a atanan tánni lumagu u mánnampalataya hide.

Efeso 1:17

Sakay u lagi ko a dasal tu Diyos nu Panginoon tam a Jesu-Cristo, u dakila a Ama, ay atádden na kam ti karunungan sakay pángngintendi gabwat tu Banal a Ispirito tánni makilala moy siya ti husto.

Efeso 5:17

Dyan kam umaheg tu mangmang hide. Nan tukuyán moy ni ánya u kaluuban nu Panginoon a gimitan moy.

Efeso 5:19

Tu pággipun-ipun moy ay mágkansiyon kam ti kansiyon a papure para tu Diyos. Buo a puso kam a mágkansiyon sakay magpure tu Panginoon.

Efeso 5:26

Ginimet na iye para hikitam a mánnampalataya hide ay magin banal tu atubang nu Diyos dipo hikitam ay imbilang na a nalinisan dán tu pamamag-itan nu pánniwala tam tu upos na kanya hikitam ay nabawtismuwan dán tu dinom.

Colosas 1:28

Itona u dahilan ni bakin a ipáppangaral me ti Cristo tu katolayan. Ipakapos-pos me sakay táttolduwan me hide tu atanan a tukoy me tungkul ni Cristo para meatubang me u balang essa tu Diyos, a awan ti kapintasan dipo tu pákpagkaessa de ni Cristo.

Colosas 1:9

Kaya sapul a nasaneg me iye, ay tulos-tulos me a idáddasal tu Diyos a nákwa ay ipakapos-pos na nikam ti husto u kaluuban na. Tu pamamag-itan nu karunungan sakay pággintendi a kaluub nu Banal a Ispirito.

Colosas 4:6

Pilitán moy a mawile hide tu pákpágguhon de nikam sakay adalán moy ti maganda ni kodya moy a tábbegán ti tama u balang essa.

1 Tesalonica 1:8

Dipo tu maganda a halimbawa moy ay kimmalat u upos nu Panginoon ti Macedonia sakay ti Acaya. Maske u pánnampalataya moy tu Diyos ay nebaheta be tu atanan a lugar. Kanya ngani awan dán kailangan a magupos kame tungkul nikam.

1 Tesalonica 4:18

Kaya ngani, pabegsákkán moy u isip nu bawat essa tu pamamag-itan ni adalan iye.

2 Tesalonica 3:15

Pero diyan moy be siya ibilang a kadima moy. Nan, tolduwan moy siya, ta dipo siya ay nebilang dán a kapatkákka moy.

1 Timoteo 6:17

Itoldu mo tu mágkayaman a dyan magmadakál sakay dyan umasa tu kayamanan a lumipas. Nan tu Diyos la a mángngatád tu atanan a bagay a ikasaya tam.

2 Timoteo 3:15

Sakay sapul pa a anak ka ay tukoy mo dán u Banal a Kasulatan. Iye u makapangatád niko ti karunungan para magkahod ka ti kaligtasan tu pamamag-itan nu pánnampalataya ni Cristo Jesus.

Tito 3:6

Inyatád na nikitam u Banal na a Ispirito tu pamamag-itan ni Jesu-Cristo a tagapagligtas tam. U Banal a Ispirito u mangatád nikitam tu atanan a kailangan tam tu pánnampalataya tam tu Diyos.

Santiagu 1:5

Ni ti deya man u kulang ti karunungan ay mangaged kam tu Diyos tánni atádden na kam dipo makákkagbiyán siya awan mágkemot sakay awan na ipasanike u magaged nikuna.

Santiagu 3:17

Pero u tolay a te karunungan a gábwat tu Diyos, dipalongo tu atanan, ay te maayus a kákkabiyag, masássohán ti kapayapaan sakay mapagpugád. Awan na ipilit u sadile na a kagustuwan, makákkagbiyán, masipag a maggimet ti maganda, pare-pareho u pangileng na tu atanan a tolay sakay awan mapagkunware.

Santiagu 5:13

Tehhod beman nikam a maghirap? Dapat magdasal siya tu Diyos. Tehhod beman nikam a masaya? Dapat magkansiyon siya ti papure tu Diyos.

1 Juan 2:14

Magsulaták nikam anak hide, dipo kilala moy u Ama. Magsulaták be nikam ama hide, dipo kilala moy siya a tu sapul ay átna dán. Magsulaták nikam áolito hide sakay mámmadiket hide dipo mágkatatag kam; pirme a katoy nikam u upos nu Diyos sakay natalo moy dán ti Satanas.

1 Juan 2:24

Pakaingatan moy tu puso moy u nasássaneg moy tu sapul nikuna summampalataya kam ni Jesus. Ni gimitán moy iye ay manatili kam a kaessa nu Anak sakay tu Ama.

1 Juan 2:27

Pero maski ni magkakonna hod ay katoy dán nikam u Banal a Ispirito a inyatád ni Cristo. Mentaras a katoy nikam u Banal a Ispirito ay awan kamon kailangan a tolduwan ni deya man. U Banal a Ispirito u mángtoldu nikam tu atanan, sakay u atanan a itoldu na ay tatahoden, bakán a kakabuliyan. Kanya manatili kam ni Cristo dipo ina u intoldu nikam nu Ispirito.

2 Juan 1:2

Mahal mikam dipo tu tatahoden a mágyan nikitam sakay katoy nikitam hanggan-hanggan.

Pahayag 14:3

Mágkansiyon u 144,000 a tolay ti bigu a kansiyon tu atubang nu trono, sakay tu áppat a linalang a biyag, sakay tu duwapulo ay ti áppat a tagapangasiwa. Awan ti makaintendi ti kansiyonan itod maliban la tu 144,000 a naligtas tu tolay hide ti munduwáy.

Pahayag 15:3

Mágkansiyon hide tu kansiyon ni Moises, a tagapagserbi nu Diyos sakay kansiyon be nu Tupa: “Panginoon a Diyos a makapangyariyan tu atanan, Dakila sakay makataka-taka u gimet mo hide! Hiko u Diyos nu bansa hide, Banal sakay tama u atanan a pámmalakad mo!

Pahayag 19:10

Limmuhudák tu atubang na para sumamba nikuna, pero kinagi na nikán, “Dyan mo ina gimitán! Dipo kaparehuwák mu labe a tagapagserbi, konna tu kákkapatkákka hide a nagpahayag tungkul ni Jesus. U Diyos u dapat mo a sambaán! Dipo u tatahoden a intoldu ni Jesus ay impahayag nu prupeta hide tu pamamag-itan nu kapangriyan nu Banal a Ispirito.”

Pahayag 5:9

Sakay mágkansiyon hide ti bigu a kansiyon, “Hiko u karapat-dapat a mangalap tu kasulatan a nalukot. Sakay mangibut tu selyo na hide. Dipo nabuno ka sakay tu pamamag-itan nu digi mo, ay tinubus mo para tu Diyos u atanan a tolay, gábwat tu kada lahe, upos, banuwan, sakay bansa.