1 Timoteo 1:17 - U Maganda A Baheta Ni Jesu-Cristo

¹⁷ Nadid, U Diyos a Hare a awan ti kahad, awan ti kamatayan, awan ketan sakay maggeessa a Diyos siya u puriyán tam sakay parangalan hanggan-hanggan Amen!

1 Timoteo 1:17 ပူးပေါင်းရင်းမြစ်များ

Mateo 25:34

Sakay kagiyan ko tu atoy hide tu kawanan ko, ‘Kamon he, hikam a pinagpala nu Ama ko! Mágyan kam tu kaharian a inhanda para nikam sapul pa nikuna ginimet u mundo.

Mateo 28:20

Sakay tolduwan moy hide a sumunud tu atanan a inyutus ko nikam. Pakatandaan moy: Hikán ay kakaguman moy hanggan tu katapusan nu mundo.

Mateo 6:13

Sakay dyan ka pumayag a matoksu kame tu kasalanan nan iyadeyo mu kami ni Satanas. Dipo u kahariyan sakay u kapangyariyan ay kao mo hangganhanggan. Sakay hiko u mapuri tu atanan hangganhanggan. Amen.”

Juan 1:18

Maski nikan ay awan palla ti naketa tu Diyos Ama, pero impakilala siya nikitam nu Diyos Anak, u kaessa-essa a Anak a minahal nu Ama.

Juan 5:44

Kodya kam a maniwala nikán, ni u papure la nu bawat essa u gusto moy, sakay bakán a u papure a gábwat tu eessa a Diyos?

Roma 1:20

Sapul pa nikuna a lalangán nu Diyos i munduway, u katangian na a awan ketan, u awan ti kahád a kapangyariyan na sakay u pagka-Diyos na ay maliwanag a ketan tu bagay hide a linalang na, kanya awan hide ti medahilan.

Roma 1:23

Nikuna a inadággen de u kadakilaan nu Diyos a awan ti kamatayan, nagsamba hide tu ribulto nu tolay a te kamatayan, tu manok hide sakay tu hayup hide a tehhod a áppat a tikád, sakay tu hayup hide a magahakas.

Roma 11:36

Dipo u atanan a bagay ay gábwat nikuna, sakay linalang na iye hide tu pamamag-itan na sakay para nikuna. Puriyán u Diyos a magpakahanggan! Amen.

Roma 16:27

Puriyán tam u eessa a Diyos u marunung tu atanan. Puriyán tam siya a hangga-hanggan tu pamamag-itan ni Jesu-Cristo! Amen.

Roma 2:10

Pero atádden nu Diyos ti karangalan, papure sakay kapayapaan u atanan a maggimet ti maganda, purumero u Judio hide sakay u bakán a Judio.

Roma 2:7

Atádden na ti biyag a awan ti kahád u tolay hide a magsumikap a maggimet ti maganda, a u gusto de ay maalap u karangalan, papure a gábwat tu Diyos sakay biyag a awan ti kamatayan.

Colosas 1:15

U Diyos ay awan ketan pero ketan u Diyos ni Cristo. Siya u tehhod a kapangyariyan tu atanan a nilalang.

Hebreo 11:27

U pánnampalataya be u nánggiya ni Moises a lakaden na i Egipto maski ni magingál u hare. Mabegsák u isip na dipo kumán na a ketan u Diyos.

Hebreo 2:7

Ginimet mo u tolay a mas mababa tu anghel mo hide tu sabadit a panahun, pero pinagkaluuben mo siya ti kadakilaan sakay karangalan.

1 Pedro 5:11

Katoy nikuna u atanan a kapangyariyan hanggan-hanggan. Amen!

2 Pedro 3:18

Pero lumagu kam tu kagbi nu Diyos sakay tu pákkatukoy moy tu Panginoon tam sakay Tagapagligtas a ti Jesu-Cristo. Puriyán siya nadid sakay magpakahanggan! Amen.

1 Juan 4:12

Maski nikan ay awan palla ti naketa tu Diyos, pero ni magmahalan kitam ay katoy siya nikitam sakay magin ganap nikitam u págmahal na.

Judas 1:25

Siya la u eessa a Diyos a Tagapagligtas tam tu pamamag-itan ni Jesu-Cristo a Panginoon tam, para la nikuna u kapuriyan, karangalan, kaluwalhatian, sakay kapangyariyan, sapul pa tu itod, nadid sakay hanggan-hanggan! Amen.

Pahayag 15:3

Mágkansiyon hide tu kansiyon ni Moises, a tagapagserbi nu Diyos sakay kansiyon be nu Tupa: “Panginoon a Diyos a makapangyariyan tu atanan, Dakila sakay makataka-taka u gimet mo hide! Hiko u Diyos nu bansa hide, Banal sakay tama u atanan a pámmalakad mo!

Pahayag 17:14

Geraán de u Tupa pero taluwán na hide, dipo siya u Panginoon nu atanan a panginoon sakay Hare nu atanan a hare. Kaguman na tu tagumpay u dinulaw sakay pinile na a nagin tolay na, a matapat a palagi a magserbi nikuna.”

Pahayag 19:1

Nadid, káttapos ni iye ay nasaneg ko u mabegsák a boses a kumán a pinagessa a makpal a tolay ti langet a mágkansiyon ti konna he, “Puriyán tam u Panginoon tam! Siya ay karapat-dapat a parangalan dipo siya u makapangyariyan a Diyos a nagligtas nikitam!

Pahayag 19:16

Sumássulat tu badu na sakay tu pengkel na u ngahan a, “Hare nu atanan a hare sakay Panginoon nu atanan a panginoon.”

Pahayag 19:6

Káttapos ay nasaneg ko u kumán a pinagessa a boses nu makpal a tolay. Kumán a tánnog nu dakál a tapaw sakay tánnog ni kádduh, kinagi na, “Puriyán u Panginoon! Dipo mághare u Panginoon, u Diyos tam a makapangyariyan tu atanan!

Pahayag 7:12

Kinagi de, “Amen! U Diyos tam ay karapat-dapat a puriyán, sambaán, pasalamatan sakay parangalan. Hod nikuna u kadakilaan, karunungan, kapangyariyan, sakay begsák. Puriyán siya hanggan-hanggan! Amen!”