1 Pedro 4:13 - U Maganda A Baheta Ni Jesu-Cristo

¹³ Nan magsaya kam tu pághirap moy dipo nákpaghirap kam ni Cristo, tán masaya kam a tahod káddemát nu aldew a ketan tam u kadakilaan na.

1 Pedro 4:13 ပူးပေါင်းရင်းမြစ်များ

Mateo 16:27

Dipo pademát u Anak nu Tolay a te kapangyariyan a gábwat tu Ama na sakay kaguman na u anghel hide. Ti panahunan itona ay hatulan na u kada tolay ayun tu ginimet na.

Mateo 25:21

Kinagi nikuna nu amo na, ‘Malalaki! Tapat sakay mabait a utusan! Dipo nagin matapat ka tu badit a halaga, mamahala ka tu dakal a halaga. Sumáddáp ka sakay mákpagkasayaan ka nikán!’

Mateo 25:23

Kinagi nu amo na, ‘Malalaki! Tapat sakay mabait a utusan! Nagin matapat ka tu badit a halaga kanya mamahala ka tu dakal a halaga. Sumáddáp ka sakay mákpagkasayaan ka nikán!’

Mateo 25:31

Sakay kinagi pa ni Jesus “Dumemát u Anak nu Tolay bilang Hari, kaguman na u atanan a anghel. Sakay maghare siya tu atanan.

Mateo 25:34

Sakay kagiyan ko tu atoy hide tu kawanan ko, ‘Kamon he, hikam a pinagpala nu Ama ko! Mágyan kam tu kaharian a inhanda para nikam sapul pa nikuna ginimet u mundo.

Mateo 5:12

Konna labi hod u ginággimet nu tolay hide tu propeta ko hide tu itod. Magkasayaan kam a tahod dipo dakál u gantimpala moy ti langet.”

Markos 8:38

Ni ikasanikiyák moy sakay ni ikasanike moy be u upos ko tu tolay hide a makasalanan nadid a panahun, sakay ni awan kam tapat tu Diyos ay ikasanike kam be nu Anak nu Tolay káddemát na a tehhod a kapangyariyan a gábwat tu Ama na, kaguman na u anghel hide.”

Lukas 17:30

Konna labi hod i mangyariyay tu káddemát nu Anak nu Tolay.

Gimet 16:25

Pero nikuna bállog dán ni gibi ay nagdasal di Pablo sakay ti Silas sakay nágkansiyon hide ti papure sakay págsamba tu Diyos. U agum a pireso ay mágsaneg nide.

Gimet 5:41

Tunay ti saya a limmakad u apostol hide tu atubang nu Sanedrin dipo pinagustuwan nu Diyos a magdanas hide ti págseste alang-alang ni Jesus.

Roma 5:3

Sakay masaya kitam maske ni maranasan tam u hirap hide, dipo matuto kitam a magtiis.

Roma 8:17

Sakay bilang anak hide nu Diyos, hikitam ay tagapagmana nu Diyos sakay kaguman ni Cristo a magmana tu págpapala hide a inhanda na. Dipo ni magtiis kitam a konna ni Cristo tu itod ay dumemát u aldew a parangalan na kitam a kaguman na.

Roma 8:18

Para nikán, u paghihirap tam nadid hide ay awan mekompara tu maganda a kalagayan a makao tam káddemát nu aldew.

2 Corinto 1:5

Dipo ni sa kodya ti kadágge u táttiisán me a hirap tu pákpágkaessa ni Cristo, ay konna bi hod u kasayaan a natanggap me a gábwat nikuna.

2 Corinto 1:7

Kaya matibay u pag-asa me para nikam dipo tukoy me a ni kodya a nagin kaguman mi kam tu pághirap ay konna labi hod kaguman mikam tu kasayaan me.

2 Corinto 4:10

Lagi kame a dumanas ti kahirapan konna tu pághirap a dinanas ni Cristo nikuna a natay siya; para ipareho me u biyag me tu biyag ni Cristo a siya u mángpeta a biyag pade ti Jesus a atoy nikame.

2 Corinto 4:17

Dipo u pághirap a nadanas me nadid, ay pangsandaliyan la sakay awan masiyadu a madágge. Dipo tukoy me a tehhod a inhanda a dakál a gantimpala u Diyos para nikame. Iye ay manatile a magpakahanggan sakay awan mapantayan.

Filipos 3:10

U gusto ko nadid ay matengge ku pa ti husto ti Cristo, maranasan u kapangyariyan nu kákkabiyag na a huway sakay mákhate tu tinággád na a hirap sakay pumareho nikuna pati tu kákkatay na.

Colosas 1:24

Masayaák tu pághirap ko nadid dipo tukoy ko a para iye tu ikapiya moy. I pághirap ni bággi kuwáy nadid ay pángtulos-tulos tu pághirap ni Cristo para tu mánnampalataya hide a magebággi na.

2 Timoteo 2:12

Ni pagtiisan tam u hirap sakay awan kitam umimang tu kássunud ni Jesus, Ay maghare kitam be a kaguman na. Ni ikasanike tam siya tu atubang nu tolay hide, Ay ikasanike na kitam be.

1 Pedro 1:13

Kanya ngani dapat kam a handa a gimitán u kaluuban nu Diyos. Magin mahinahun kam sakay ituun moy u pag-asa moy tu págpapala hide a tanggapán moy ni mehayag dán ti Jesu-Cristo.

1 Pedro 2:21

U págtiis ti hirap ay kaguman tu pángpile nikam nu Diyos; dipo maski ti Cristo ay nagtiis ti hirap para nikam, I págtiis naan iye ay essa a halimbawa a dapat moy a ahigán.

1 Pedro 5:1

Hikam a pinuno hide nu mánnampalataya hide, mákkekagbiyák nikam bilang essa be a konna nikam. Tistiguwák tu pághirap ni Cristo, sakay kabahagiyák be tu karangalan na a adene dán a mehayag. Mákkekakagbiyák nikam

1 Pedro 5:10

U Diyos a naggábwatan nu Págpapala, siya u nangpile nikam tu pamamag-itan ni Jesu-Cristo tánni makabahagi nakam tu kapuriyan na a awan ti kahád, kaguman ni Cristo. Pero ipakultad napa a magtággád kam ti hirap tu sabadit a panahun, tánni gimitán nakam a ganap, sakay siya u mangpabegsák ti isip moye, sakay mangpatatag tu pánnampalataya moy nikuna.

Judas 1:24

Puriyán tam nadid u kaessa-essa a Diyos tam a Tagapagligtas! Siya u mangtáttawed nikitam tánni awan kitam magkasala sakay siya u makapáng-adene nikitam tu atubang na a awan ti kapintasan sakay makapangatád ti kasayaan.

Pahayag 1:7

Tandaan moy! Dumemát siya a huway a napalebutan nu diklam, sakay ketan nu atanan a tolay maski u nangpika hide ni kuna tu wahes na tu itod. Sakay u atanan a tolay ti munduway a awan sumampalataya nikuna ay magsanget dipu tu ánteng de tu págparusa na nide. Talaga a konna he u mangyare! Amen.

Pahayag 1:9

Hikán u kapatkákka moy a ti Juan tu pánnampalataya sakay kaguman moy tu pághirap sakay págtiis a danasán nu kaguman hide tu kaharian nu Diyos dipo tu pákpagkaessa tam ni Cristo. Neangayák tu puduk a Patmos dipo inpakapospos ko u upos nu Diyos sakay u tatahoden a inpahayag ni Jesus.