1 Pedro 3:20 - U Maganda A Baheta Ni Jesu-Cristo

²⁰ Iye hide u ispirito nu tolay a umád a sumunud nikuna tu panahun ni Noe tu itod. Matiyaga a naguhay u Diyos a sumampalataya hide mentaras a gimitán ni Noe u dakál a abang pero awan maski essa ti tolayan iye hide u simmampalataya. Walo la a tolay u nakaligtas tu lonso.

1 Pedro 3:20 ပူးပေါင်းရင်းမြစ်များ

Mateo 7:14

Pero mapiit u pintuwan sakay mahirap u dilan a tamo ti langet. Kanya sasangan la a tolay u maketa ti iye.”

Lukas 12:32

“Hikam a disepulus ko hide, dyan kam manteng, maski sasangan kam la dipo gugusto nu Diyos a kaguman nakam tu kahariyan na.

Gimet 2:41

Makpal u naniwala tu mensahe na sakay nagpabawtismo hide a agad. Ti itod a aldew ay mga tállo a libu a tolay u nedagdag tu mánnampalataya hide.

Roma 9:22

Konna pa man hod, gusto nu Diyos a ipeta u iyamut na sakay u kapangyariyan na, pero pinagtiyagaan na sakay pinagtiisan u tolay hide a dapat dán nakwa a parusaan sakay puksaán.

Efeso 5:26

Ginimet na iye para hikitam a mánnampalataya hide ay magin banal tu atubang nu Diyos dipo hikitam ay imbilang na a nalinisan dán tu pamamag-itan nu pánniwala tam tu upos na kanya hikitam ay nabawtismuwan dán tu dinom.

Hebreo 11:7

Dipo tu pánnampalataya ay sinaneg ni Noe u babala nu Diyos tungkul tu bagay hide a mangyare a awan na palla netan. Kanya naggimet siya ti essa a dakál a abang tán maligtas siya sakay u pamilya na. Dipo hod ay nahatulan u tolay hide ti munduway, pero ti Noe ay nebilang a matuwid dipo tu pánnampalataya na tu Diyos.

1 Pedro 1:22

Nadid ay malinis kamon tu kasalanan moy hide dipo tu kássunud moy tu tatahoden sakay nagin tapat kamon tu págmahal moy tu kákkapatkákka moy hide. Nakwa ay tatahoden u págmahal moy.

1 Pedro 1:9

Dipo magtanggap kamon tu bunga nu pánnampalataya moy, iye ay u kaligtasan moy.

1 Pedro 2:25

Dipo kumán kam a tupa a nágketawtaw pero nadid ay inipun kamon a huway nu Diyos tu pamamag-itan ni Jesus a pastol tam a mággalaga tu kaliduwwa tam.

1 Pedro 3:19

Sakay tu pamamag-itan nu Ispirito ay immangay siya tu lugar a páppiresuwan nu ispirito hide nu tolay a nágkatay dán sakay impakapospos na hod u tungkul tu kaligtasan.

1 Pedro 4:19

Kanya hikam a maghirap hide dipo tu kagustuwan nu Diyos ay dapat itulos-tulos moy la u pággimet moy ti maganda sakay magtiwala kam tu Diyos a Nanglalang, dipo tapat siya tu pananto na hide.

2 Pedro 2:5

Awan be kinagbiyan nu Diyos u tolay hide tu itod dipo tu kadukássan de. Awan siya ti inligtas maliban la ni Noe a nángpakapospos tungkul tu malinis a kákkabiyag, sakay tu pitto na a kaguman.

2 Pedro 3:15

Alalahanán moy a kaya awan palla dumemát u Panginoon ay para atádden na pa ti pagkakataun a maligtas u tolay hide, konna tu insulat nikam nu kapatkákka tam a ti Pablo tu pamamag-itan nu karunungan a inyatád nikuna nu Panginoon.