1 Corinto 14:4 - U Maganda A Baheta Ni Jesu-Cristo

⁴ U magupos ti iba-iba a upos ay pabegsákkán na u sadile na, pero u mángpahayag tu upos nu Diyos ay pabegsákkan na u mánnampalataya hide.

1 Corinto 14:4 ပူးပေါင်းရင်းမြစ်များ

Markos 16:17

U sumampalataya hide ay atádden ti kapangyariyan a maggimet ti makataka-taka a bagay: tu ngahan ko ay magpalayas hide ti mágkadukás a ispirito sakay makapagupos hide ti iba-iba a upos.

Roma 14:19

Kanya pilitán tam a gimitán a palagi u bagay hide a makapangatád ti kapayapaan sakay makapángpatibay tu balang essa.

1 Corinto 12:10

Tehhod a pinagkaluuben ti kapangyariyan a makagimet ti makataka-taka a bagay; sakay u agum be ay pinagkaluuban ti kakayanan a magin prupeta. Tehhod be a pinagkaluuben ti kakayanan a makatukoy ni u kapangyariyan nu tolay ay gábwat tu Banal a Ispirito oni tu mágkadukás hide a ispirito. U agum be ay tehhod a kakayanan a makapagupos ti iba-iba a upos, sakay u agum ay u kakayanan a makapángpaliwanag ti upussan itod hide.

1 Corinto 12:28

Sakay nángdatton u Diyos tu mánnampalataya hide ti kaluub. U dipalongo ay u apostol hide; u kaduwwa ay u propeta hide, sakay u katallo ay u tagapagtoldu hide tu upos nu Diyos. Nángdátton be siya ti tolay a makagimet ti makataka-taka, makapagpapiyya tu te saket, te tagatulong, te taga pangasiwa, sakay tehhod be a makapagupos ti iba-iba a upos.

1 Corinto 13:1

Nadid, ni makapagupusák man tu iba-iba a upos sakay tu upos nu anghel hide, ni awanák ti págmahal ay kumánnák la a bating-tingan oni pompiyang a makán tánnugán.

1 Corinto 13:2

Sakay ni tehhodák a kakayanan a mángpahayag tu upos nu Diyos, sakay umintendi tu atanan a lihim, maski ni hed dán nikán u atanan a karunungan sakay mepaagton ko man u buked hide dipo tu grabi't kadakál nu pánnampalataya ko, ni awanák labe ti págmahal ay awanák ti kabuluhan.

1 Corinto 14:12

Dipo tu hangad moy tu kaluub hide nu Banal a Ispirito, dapat sikapán moy a sumagana kam tu kaluub a makapangpalagu tu mánnampalataya hide.

1 Corinto 14:22

Ni konna hod, u kaluub a makapagupos ti iba-iba a upos ay essa a tanda para ipeta u kapangyariyan nu Diyos tu awan hide mánnampalataya, bakán a tu mánnampalataya hide. Pero u kaluub a magpahayag tu upos nu Diyos ay tanda para ipeta u kapangyariyan nu Diyos tu mánnampalataya hide, bakán a tu awan hide mánnampalataya.

1 Corinto 14:26

Ánya nadid u gusto ko a kagiyán ti iye hide a atanan, kákkapatkákka hide? Ni hikam ay mamággipun-ipun, ay dapat tehhod a mágkansiyon, tehhod a magtoldu, tehhod a magpahayag tu kaluuban nu Diyos, tehhod a magupos ti iba-iba a upos, sakay tehhod be a mángpaliwanag tu kákkagiyán na. Gimitán moy iye a atanan tánni lumagu u mánnampalataya hide.

1 Corinto 14:3

Pero u mágpahayag tu upos nu Diyos ay tu tolay u pángkagiyan na tán lumagu u pánnampalataya de sakay pabegsákkán u isip de tán sumaya hide.

1 Corinto 14:5

Nadid, gusto ko nakwan a makapagupos kam a atanan tu iba-iba a upos, pero mas gusto ko a makapagpahayag kam tu upos nu Diyos. Dipo u tolay a mágpahayag tu upos nu Diyos ay mas mahalaga nan makapagupos ti iba-iba a upos, maliban dálla ni tehhod a mágpaliwanag tu kahulugan nu kákkagiyán na tánni bumegsak u mánnampalataya hide.