Tito 2:12 - Ke meupiya ne tudtul mekeatag ki Hisu Kristu

¹² Ne ini se tavang ne impekita te Eleteala kenitew se mibpenurù en kenitew te ed-engkeran ke ulaula ne kenà ebpekesuhat te hinawa rin, abpeg ke langun ne kiyug te lawa tew kayi te ampew te dunya. Ne ed-erenen tew ke kiyug te itungan wey lawa tew su apey langun ne ulaula tew taman te kayi ki pà te ampew te dunya ne metidtu wey ebpekesuhat te hinawa te Eleteala.

Tito 2:12 ပူးပေါင်းရင်းမြစ်များ

Mateo 12:32

Ne misan engkey en ne etew ne edlalag te meraatey mekeatag dut te Impeanak te Menusiyà ne egkepesahad te Eleteala te salà din, ugaid ne misan engkey ne etew ne edlalag te meraatey mekeatag dut te Kedesenan ne Ebpetuntul te Menusiyà, ne kenà en vulug egkepesahad te Eleteala ke salà din taman te taman.”

Mateo 16:24

Ne migkahi si Hisus dut te menge edumdumaan din te, “Embiya ruen etew ne egkiyug ne eduma kediey, ne iyan iya se pekelipati rin ke kandin ne kiyug wey tianga rin ke kandin ne pinebelavag ne kayu ne ed-ingaranan te krus ne iyan din meana ne tumana rin ke menge suhù ku misan ibpatey rin pà se keduma rin kediey.

Mateo 28:20

Ne penurua niyu sikandan te kedtuman dut te langun ne impenurù ku keniyu. Ne ini se idtahù niyu te hinawa te layun a eduma keniyu taman te taman.

Lucas 1:6

Ne ini se senge tiwelayan ne metidtu se hinawa ran diyà te etuvangan te Eleteala ne warà igkesawey kandan dut te kedtuman dan te langun ne suhù wey penduan te Eleteala.

Lucas 1:75

su apey egkelunsey se ked-erapa tew kandin wey metidtu kiyu riyà te etuvangan din taman te biviyag kiyu pà.” Ne migkahi maa si Zacarias kayi te anak din te,

Juan 14:30

Kenà en utew meuhet se kebitiyara ku keniyu su ebpekeuma en si Setanas ke datù te pekaid ne egkamal kayi te ampew te dunya,” ke si Hisus. “Ne warà ma bayàbayà din kediey,

Juan 6:25

Guna su nekerunggù dan ne netuen dan en si Hisus. “Meyterù,” ke sikandan “keenu ka mekeuma kayi?”

Nenged-ulaula 24:16

Tembù be ebpegelep a te ed-ulaula te meupiya su wey warà igkesewayi kediey te Eleteala wey misan engkey en ne etew.

Nenged-ulaula 24:25

Ne ketà te kebpesabut ni Pablo mekeatag te metidtu ne ulaula, wey kedtigker te hinawa rin, wey ke hewii ne ebpekeuma ne kedtimbanga te Eleteala dut te menge etew, ne neandek si Felix ne migkahi te, “Kayi pà taman su ibpetawag ku rà sikew ke embiya ruen en lakey ku.”

Ruma 12:2

Ne kenà niyu peun-unuti ke menge ulaula kayi te ampew te dunya ne egkunterà te Eleteala, ugaid ne ivehey niyu te Eleteala ke itungan niyu su apey ke daan ne perangey niyu ne egkevehuwan din. Ketà be ne egkesebutan niyu ke kiyug te Eleteala kayi te keniyu, ne egkesebutan niyu ke ulaula ne ebpekesuhat te hinawa rin su apey warà igkesewayi keniyu.

Ruma 6:12

Tembù be kenà niyu en iluhut se iyan pà ebpekevayàbayà dut te lawa niyu ne ke ulaula ne meraat. Su embiya ini se ed-ul-ulaan niyu, ne ebpekeruma kew red dut te egkiyuhan niyu ne meraat.

Ruma 6:19

Iyan ku insempità ke egked-ulaula te uripen su apey niyu melemu mesebuti ke impenurù ku keniyu, su ini se kebperetiyaya niyu ne warà pà mekedalid. Su rengan ne iring te mibpeuripen kew te meraat su inrumakan niyu ke lawa niyu te ed-ulaula te meredsik wey ke meraat ne ed-isab pà. Ugaid ne guntaani ne iyan iya se ivehey niyu ke lawa niyu riyà te Eleteala te edtuman te ulaula ne metidtu su apey kew metilak diyà te etuvangan din.

Ruma 8:13

Su embiya iyan tew edumaan ke meraat ne kiyug ne neketahù te itungan tew, ne edusaan ki te kemetayen ne warà edtemanan din. Ugaid ne embiya kayi ebpuun dut te tavang te Kedesenan ne Ebpetuntul te Menusiyà ne ed-engkeran tew en te eduma ke meraat ne kiyug ne neketahù te itungan tew, ne egkevehayan ki en te behu ne kegkeuyag tew.

2 Kurintu 1:12

Nehalew key te netuenan dey ne warà meraat ne mid-ulaula rey diyà te menge etew, labi en kayi te keniyu. Ini se ed-ul-ulaan dey ne metidtu su iyan dey edtumanen ke kiyug te Eleteala. Ne kenà kememenusiyai rà ne ketau se edumaan dey, su iyan dey edserihan ne ke tavang te Eleteala kenami su apey iyan dey ed-ul-ulaan ne ke ebpekesuhat.

2 Kurintu 7:1

Na menge suled, geina te iring ketà ke impasad te Eleteala keytew, ne id-awà ta ke langun ne meraat ne ulaula ta wey langun ne meraat ne neketahù te itungan ta. Ne egenat kayi te ked-adat ta te Eleteala ne idtepeney ta ke hinawa ta te keduma rut te kiyug din.

Gelasiya 1:4

Su si Hisus ne midtuman din ke kiyug te Eleteala ke Amey tew rut te kinepatey rin su apey sikandin ke ralan te kebpekeliyu tew rut te nekeiket keytew te langun ne salà tew kayi te ampew te dunya.

Gelasiya 5:24

Su ke etew ne tidtu se kebpesakup din ki Hisu Kristu, ne mid-awaan din ke langun ne meraat ne mid-ulaula rin dengan, su apey kenà en eduma rut te kiyug te lawa rin.

Ipisu 1:4

Su misan ketà te warà pà melimbag te Eleteala ini se dunya, ne raan kiyu en ne mibpemilì nikandin ne kandin ne tuney ne anak. Mibpemilì kiyu rin su apey egkevaluy ke hinawa tew ne metilak atag dut te kebpekidseveka tew ki Hisu Kristu su apey warà salà ne idsawey rin kenitew. Su sabap dut te dekelà ne limù din kenitew,

Ipisu 2:2

Su rengan ne iyan niyu midumaan ke meraat ne betasan dut te menge etew ne iyan dan edumaan ke kiyug den dà kayi te ampew te dunya. Ne ketà ne iyan niyu nerumaan ne ke datù te pekaid, ini se unuten dut te langun ne busew, su sikandin imbe ke egawed te hinawa rut te menge etew ne kenà eduma te Eleteala.

Kulasi 1:22

Ugaid ne gunteani ne imped-ulit kew en te Eleteala su sabap dut te kinepatey rut te Anak din diyà te pinebelavag ne kayu. Ne egenat ketà ne ebpekeuvey kew en te Eleteala su nelùluan en ke salà niyu, ne midtilak din en ke hinawa niyu, ne warè en igkesawey keniyu.

1 Tiselunika 4:7

Su ke Eleteala ne kenà din iyan kebpemilì keyta ne egkevaluy ki ne menge anak din ne ed-ulaula te meraat, ugaid ne apey ta iyan ed-ul-ulaan ne ke metilak diyà te etuvangan din.

1 Tiselunika 4:9

Na mekeatag be dut te kebpelimlimuey niyu te menge ruma niyu ne mibperetiyaya, ne kenà en dait ne edsurat a pà keniyu su ke Eleteala se mibpenurù keniyu mekeatag te kedlimù niyu.

1 Timoteo 4:12

Na Timoteo, kenà nu idluhut se kedsudian ka misan engkeniyan te menguwed ke pà, ugaid ne iledawan nu rut te langun ne menge ruma niyu ne mibperetiyaya. Ipekita nu ke keupiya ne egkeiringan dan kayi te lalag nu wey ke ed-ul-ulaan nu. Pekita ka te limù dut te menge ruma nu wey ke tidtu ne sarig nu te Eleteala, ne ipekita nu kandan te warà meraat ne netahù te itungan nu su apey sikuna se egkeiringan.

1 Timoteo 6:17

Na Timoteo, kehiyi nu ke menge etew ne kewasa te kenà dan ibpereyùdeyù, ne kenà dan serihi ke kekewesai ran su ini ne edsahad dà. Ugaid ne iyan dan serihi ne Eleteala su ebehayan kiyu nikandin te pengelimuan din ne sesangan apey ki egkehalew.

1 Timoteo 6:9

Ugaid ne ke menge etew ne egkesuat ne egkewasa ne merakel se ibpenggeram kandan. Su ini se kegkesuat dan ne warà rantek din ne ebpekekaid kandan ne iring te telebpì kandan ne kenà dan ebpekeliyu. Ne kayi te ini ne egkevinasa ran dut te kedusa ne kenà edtaman.

2 Timoteo 3:12

Ne sikuna ne warà nu kepensevi te misan engkey ne etew se ebpenunuhat ki Hisu Kristu egenat te kinepekidseveka rin kandin ne ebpekesekitan.

2 Timoteo 4:10

Su mid-awà en si Demas kayi te kedì ne mibpendiyà te Tiselunika. Su iyan din pinedlabi ke keupianan din kayi te ampew te dunya. Si Kirisin se mibpendiyà te Galasiya wey si Tito se mibpendiyà te Dalmasiya.

Tito 3:3

Su sikitew ne menge mibperetiyaya ne rengan ne menge merupangdupang ki, kenà ki meperumaruma, ne warà ki meketuntul ke tidtu ne penurù. Nengeuripen ki rut te langun ne kiyug tew rà, ne iyan dà neketahù kayi te hinawa ta ne meraat ne ebpekesakit te hinawa te ruma ta wey ebpesigsihiyey. Neepesan ki te menge etew, ne neepes ki red dema kandan.

Hibruhanen 8:11

Su ketà be ne hewii ne kenà en ebpegingewaan te ebpenuruen den pà ke menge ruma ran mekeatag kediey. Su langun dan egenat te kevevaan taman te kepuruan ne egketau en kediey.

Santiago 1:27

Su ke etew ne edtelimà dut te Amey tew ne Eleteala ne metidtu nevenar se kebperetiyaya rin ne arà imbe ne etew ne metau ne edtavang te menge ilu wey ke menge balu ne egkerehenan. Ne kenà dema sikandin eduma rut te meraat ne ed-ul-ulaan te menge etew kayi te ampew te dunya.

2 Pedro 2:9

Ne iring te kebpeliyu te Eleteala ki Lut se ed-ul-ulaan te Eleteala dut te menge etew ne eduma kandin su metau sikandin te ibpevayà din te kedtavang kandan ketà te keresayan dan. Ne ini se menge etew ne kenà eduma kandin, ne impenehana en ke kedusa rin kandan ketà te Hewii ne Egkukum kandan.

2 Pedro 3:11

Na embiya netuenan tew te ruen hewii ne edereetan te Eleteala ke langun ne egkekita ta, ne iyan se nasì ne ke meupiya se ed-ul-ulaan tew. Iyan iya se eduma ki te Eleteala su apey ini se ulaula ta ne metidtu diyà te etuvangan din

1 Juan 2:27

Ugaid ne sikiyu, ne midtelimà kew en dut te Kedesenan ne Ebpetuntul te Menusiyà ne keniyan ded te keniyu. Tembù be kenà kew ebpekepemengà te ebpenurù keniyu su sikandin ne keniyan ded te keniyu se ebpenurù keniyu te langun ne egkiyuhan te Eleteala ne ebpesebutan keniyu. Ne iyan din ibpenurù ne kenà tarù ugaid ne tidtu nevenar. Tembù be dumai niyu ini se ibpesabut din keniyu su apey kew ebpekidseveka ki Hisu Kristu.

1 Juan 2:6

Piya engkey en ne etew ne egkahi te mibpekidseveka sikandin te Eleteala, ne iyan iya se metidtu se ed-ul-ulaan din iring te ketidtu ne ed-ul-ulaan ni Hisus te kayi pà sikandin te ampew te dunya.

1 Juan 5:19

Netuenan tew ne menge anak ki en te Eleteala. Ugaid ne ini se menge etew dè duen kayi te ampew te dunya, ne ebeyveyaan sikandan ni Setanas.

Hudas 1:18

Su migkahi ran te, “Ketà te egketketapus en ini se kelibutan ne ruen menge etew ne egemew ne edsumpalit keniyu ini te ebperetiyaya ki Hisus. Menge etew ini ne iyan dan edtumanen ke kiyug te lawa ran ne igkeepes te Eleteala.”

Imperayag 14:12

Tembù be sikiyu ne menge sakup te Eleteala ne eduma en te suhù din wey egeweran te mevaher ke kebperetiyaya niyu ki Hisus, ne iyan iya se tigkeri niyu se keresayan.