Santiago 4:12 - Ke meupiya ne tudtul mekeatag ki Hisu Kristu

¹² Na seveka rà se ebpuunan te penduan ne ke Eleteala rà, ketà be ne sikandin ded ke egkukum te langun ne menge etew. Ne sikandin dà se ruen gehem din te kedusa etawa kebpeliyu te menge etew. Tembù be sikitew ne warà ketengdanan tew te egkukum wey edsawey te ruma ne etew.

Santiago 4:12 ပူးပေါင်းရင်းမြစ်များ

Mateo 10:28

Ne kenà kew meandek dut te menge etew ne iyan dà egkepatey se lawa niyu, ugaid ne kenà dan ebpekepatey te himukud niyu. Ugaid ne iyan niyu ikeandek ne Eleteala, su kenà lawa niyu rà se egkepatey rin su ruen gehem din te kebpekeantug te himukud niyu riyà te apuy nerakà.

Lucas 12:5

Ugaid, ne idtarem ku keniyu ke engkey se ikeandek niyu. Iyan niyu ikeandek ne Eleteala su kenà lawa niyu rà se egkepatey rin su ruen gehem din te kebpekeantug te himukud niyu riyà te apuy ne rakà. Uya, iyan niyu iya ikeandek sikandin.”

Ruma 14:13

Tembù be kenà kiyu edsawey rut te ulaula te menge ruma tew ne mibperetiyaya. Inemulà se iyan tew ed-ul-ulaan ne endei se kenà tew egkepeneheewit ke menge ruma tew ne mibperetiyaya te kebpekevaal dan te salà.

Ruma 14:4

Tembù be kenà kiyu edsawey te menge ruma tew. Su warà kevenar tew te edsawey te sugsuhuen te ruma ne etew. Su iyan dà edsawey kandin ne ke egelevekan din ke midtuman din be ke mibpeveelan kandin etawa warà. Ne netuenan tew ne ebpekegaga si Hisu Kristu ne edtavang dut te menge sugsuhuen din su apey ran med-ulaula ke meupiya.

Ruma 2:1

Na sikiyu ne ed-isuhat dut te ruma ne menge etew ne ed-ulaula te meraat iring ketà ne med-uram kew. Warà kevenar niyu te ed-isuhat kandan su kenà egkepakey ne egkahi kew te warà salà niyu. Su embiya ed-isuhat kew kandan, ugaid ne mid-ulaula kew te meraat iring dut te mid-ulaula ran, ne timbang te sikiyu red se nesuhat elin kandan.

Ruma 9:20

Ugaid ini se egkehiyen ku keniyu ne maa, egkepakey ve te sikitew ne midlimbag dà te Eleteala ne ebpenavak kandin? Embiya idsempità ta te midiyun ne kuren, ne engkey, egkepakey ne egkahi ke kuren te, “Meambe ke iring kayi se kineriyuna nu kedì?”

Hibruhanen 7:25

Tembù be ebpekegaga nevenar si Hisus te ebpeliyu te langun ne ed-uvey te Eleteala su ebuyù te tavang su atag dut te sarig dan kandin, su warà ma ketepusan din se kebuyù din te tavang kenitew riyà te Eleteala.

Santiago 5:9

Menge suled ku, kenà kew pepempemivihey su apey kew kenà edusai te Eleteala. Mehaan en ebpekeuma ke egkukum su iring te edtiviltivil en an te gumawan.