Ruma 5:12 - Ke meupiya ne tudtul mekeatag ki Hisu Kristu

¹² Geina te mibaal te salà si Adan rengan, ne arà se puunan te etew ne ebaal te salà kayi te ampew te dunya. Ne geina te nekevaal sikandin te salà ne mibehayan te Eleteala sikandin te kemetayen. Tembù be langun ne menge etew ne ebpatey su langun ne mibelidsalà.

Ruma 5:12 ပူးပေါင်းရင်းမြစ်များ

Ruma 3:23

Su langun ne menge etew ne mekesesalà. Ne warè misan seveka rà ne ebpeketuntul te ibayà te Eleteala, su langun en ne nekesuwey.

Ruma 5:18

Ketà be ne netuenan tew te sabap dut te salà te senge etew ne si Adan ne nesuhat te kukuman te kedusaa te langun ne menge etew. Iring din ded dema arà te metidtu ne mid-ulaula te senge etew ne si Hisu Kristu te mibpeimatey, ne ibpeliyu rin ke langun ne menge etew te kedusa kandan te Eleteala su apey ran meketelimà te umur ne warà edtemanan din.

Ruma 5:19

Su sabap dut te senge etew ne warà miduma rut te insuhù kandin te Eleteala, ne nevaluy ke langun ne menge etew ne mekesesalà. Ne engketà ded dema ne riyà ebpuun te senge etew ne si Hisu Kristu ne miduma rut te insuhù te Eleteala kandin, ne ke langun ne menge etew ne mibperetiyaya kandin ne iyan din kedtengteng kandan ne metidtu diyà te etuvangan din.

Ruma 5:21

Ketà ne nesebutan tew te neuripen ki te salà rengan ne ebpekepeneheewit keytew riyà te kepepatey. Ugaid guntaani ne sabap dut te raat te nanam te Eleteala te mibpebpatey ke Anak din si Hisu Kristu ke Kerenan tew, ne iyan kedtengteng te Eleteala keytew ne metidtu ne ibehey rin keytew ke umur ne warà edtemanan din riyà te etuvangan te Eleteala.

Ruma 6:21

Maa, engkey se keupianan ne netelimà niyu ketà te meraat ne ulaula niyu rengan ne igkeyeyai niyu guntaani? Warà! Su embiya ibpeiseg niyu pà ne menge ulaula arà, ne warà duma ne edungguan din ke kenà kemetayen ne warà edtemanan din.

Ruma 6:23

Su iyan bayad te kebpekedsalà ne kemetayen ne warà edtemanan din, ugaid ne iyan ibehey te Eleteala rut te menge etew ne mibperetiyaya ki Hisu Kristu ke Kerenan tew ne umur ne warà edtemanan su sabap dut te pengelimuan din ne imbehey rin dà dè duen.

1 Kurintu 15:56

Iyan kegkeandek te menge etew te kepatey su netuenan dan te embiya ebpatey ran en ne edusaan dan dut te salà dan. Ne ke kevaher dut te salà ne idusa te menge etew su sabap dut te midlangkad dan ke penduan te Eleteala.

Ipisu 2:3

Ne langun tew ne neked-iring ded pehaney, su iyan tew rà edumaan te kiyug tew. Iyan ebayàbayà kenitew ke kebpatà te nanam tew wey piya engkey ne meraat ne ebpekepemula te itungan tew ne arà se edtumanen tew. Ne ketà ne warà ded mibiraan tew dut te ruma, su warà duma ne ebpesineruwan tew ke kenà edusaan kiyu te Eleteala iring dut te langun ne menge etew ne kenà eduma kandin.

Santiago 1:15

Ne embiya edumaan din arà se kiyug din ne meraat, ne ebpekevaal sikandin te salà. Ne embiya edsaup pà maa ebaal te salà, ne iyan din egketemanan se edusaan sikandin te Eleteala taman te taman.

Santiago 3:2

Na sikitew ne menge etew, merakel se ibpevayà te kegkesayep tew su layun ki ed-ulaula te meraat wey ebpengahikahi te meraat. Ugaid ne embiya ruen etew ne kenà egkesayep se kebpengahikahi rin ne warè en idsawey kandin su metau en sikandin ne ed-erangan te langun ne ed-ul-ulaan din.