Ruma 2:27 - Ke meupiya ne tudtul mekeatag ki Hisu Kristu

²⁷ Su ke menge etew ne warà etusi su kenà Hudiyanen, ugaid ne mibperumaruma te penduan te Eleteala, ne sikandan se puunan te ked-isuhata te Eleteala keniyu te kewagib dut te warà niyu merumai ke penduan. Su sikiyu ma perem ke midtahakan dut te penduan ne mibpemeetusan.

Ruma 2:27 ပူးပေါင်းရင်းမြစ်များ

Mateo 3:15

Ne midtavak si Hisus kandin te, “Ed-iringen ta en kayi ne bunyahi ad nikuna su apey ta metuman ke langun ne insuhù te Eleteala.” Ne ketà ne migkiyug si Juan ne mibunyahan din en si Hisus.

Nenged-ulaula 13:22

Guna su in-awà sikandin te Eleteala ne si David en maa se imperatù te Eleteala kandan. Ne ini se migkahi te Eleteala mekeatag ki David, ke sikandin te, ‘Si David ini, ke anak ni Isai, se ebpekesuhat te hinawa ku. Su edtumanen din ke langun ne idsuhù kandin.’

Ruma 13:10

Su embiya igkelimù tew ke menge ruma tew, ne kenà egkepakey ne edèdeetan tew sikandan. Tembù be embiya igkelimù tew ke ruma tew, ne netuman tew ke langun ne insuhù te Eleteala dut te penduan.

Ruma 2:15

Su kayi te meupiya ne menge ulaula ran ne egketuusan ta te nekahi te penduan ne neketitik ded diyà te atey ran se ebpenurù kandan. Su netuenan dan te ebpedsusun ke meupiya wey rut te meraat ne ed-ul-ulaan.

Ruma 2:20

Iyan niyu pegitungan te sikiyu se ebpekepenurù dut te menge etew ne warà utew egketùtuenan dan mekeatag te Eleteala, wey ke menge etew ne iring pà te menge vatà. Su iyan niyu pegitungan ne ke penduan te Eleteala ne intahak keniyu ne dutun intahù ke langun ne ketau wey ke benar.

Ruma 2:25

Sikiyu menge suled ku ne menge Hudiyanen, iyan niyu pegitungan ne rekelà te pantag din ke kinepeetus niyu, ne ruen iya rema pantag din embiya eduma kew red dut te penduan te Eleteala. Ugaid ne embiya kenà kew eduma te penduan din, ne ke kinepemeetus niyu ne warà pantag din.

Ruma 2:26

Su misan ke etew ne kenà Hudiyanen, embiya edumaan din ke penduan te Eleteala ne riyà te etuvangan te Eleteala ne iyan din kedtengteng ne arà se etew ne neetusan.

Ruma 2:29

Ugaid ne iyan tidtu ne Hudiyanen diyà te etuvangan te Eleteala ne ke etew ne eduma te insuhù din ne ebpuun te lunsey te hinawa rin. Su riyà te etuvangan te Eleteala ne ke benar ne egkeetusan ne kenà ketà dà te ebpelian ke lawa te etew iring te insurat te penduan, ugaid ne ke kebmetilak te hinawa te menge etew ne riyà ebpuun dut te Kedesenan ne Ebpetuntul te Menusiyà. Ke etew ne iring kayi, ne kenà iyan edeyù ne etew, ugaid ne iyan edeyù kandin ne ke Eleteala.

Ruma 3:30

Su sebseveka rà ke Eleteala, ne sikandin ke Eleteala dut te langun ne menge etew. Ne seveka rà se ralan te ebmetidtu ke langun ne menge etew su kayi rà ini ebpuun dut te kedsarig dan ki Hisu Kristu, Hudiyanen sikandin etawa kenà.

Ruma 8:4

Ini ke mid-ulaula te Eleteala su apey langun tew te mibperetiyaya kandin ne ebpekeliyu rut te salà ne ebayàbayà te lawa tew, su apey tew egketuman ke metidtu ne nekahi rut te penduan. Ne egketuman tew ini su kedumai keytew rut te Kedesenan ne Ebpetuntul te Menusiyà ne edtavang keytew.

1 Kurintu 7:19

Su riyà te etuvangan te Eleteala ne misan neetusan ka, etawa warà, ne warà ded pulus din. Ugaid ne iyan dekelà diyà te hinawa te Eleteala ne ke kedtuman niyu te kiyug din.

2 Kurintu 3:6

Ne sikandin ded be ke mibehey kenami te ketau te kebpemesabut dey dut te behu ne pasad din. Ne ini se behu ne pasad ne kenà iring dut te neuna ne penduan ne imbehey te Eleteala ki Moises, ugaid ne imbehey ini impepevayà dut te Kedesenan ne Ebpetuntul te Menusiyà. Su arà te neuna ne penduan ne insurat ne netuenan tew se nekesalà ki ne riyà ki egkepeneheewit te kepepatey ne warà edtemanan din. Ugaid ne ke Kedesenan ne Ebpetuntul te Menusiyà se ebehey keytew te umur ne warà edtemanan din.

Gelasiya 5:14

Su ke langun ne menge penduan ne intahak ni Moises ne nevagkes kayi te seveka ne penduan ne egkahi te, “Ikelimù nu ke ruma ne etew iring dut te kegkelimù nu te hinawa nu.”

Ipisu 2:11

Sikiyu ne menge etew ne kenà Hudiyanen ne ed-ingaranan te Hintil, ne tentenuri niyu ke pehaney te warà kew pà mebperetiyaya ki Hisu Kristu. Ne edsusudian kew te menge Hudiyanen su egkehiyen dan ne kenà kew sakup te Eleteala su warà kew meduma rut te betasan dan te ebpeetus. Ne sikandan kun ke benar ne sakup te Eleteala su mibpeetus dan, ugaid ne ke lawa ran dà se ruen tuus din su ke itungan dan ne warà mesembii.

2 Timoteo 3:15

Ne netuenan nu te reisek ke pà taman te rekelà ke en ne nepenurù ke en dut te impesurat te Eleteala ne lalag din. Ini ve imbe se impesurat te Eleteala se nekevehey keykew te itungan su apey ka ebpekehaked ketà te umur ne wara edtemanan din embiya si Hisu Kristu se mibperetiyaya nu.

Hibruhanen 11:3

Ne sikitew rema, ne egenat dut te kedsarig tew ne netuenan tew te ini se kelibutan wey ke langun ne nekeriken kayi ne nelimbag te Eleteala egenat te lalag din dà. Engketà be ne ke langun ne egkekita tew kayi te dunya ne riyà ebpuun dut te kenà egkekita.