Ruma 14:1 - Ke meupiya ne tudtul mekeatag ki Hisu Kristu

¹ Na embiya ruen duma niyu ne mibperetiyaya en ki Hisu Kristu ugaid ne meluvey pà se peretiyaya rin, ne telimaa niyu sikandin te meupiya ne kenà kew pekidlawanà kandin embiya ke peretiyaya rin ne warà pà mekeiring dut te keniyu.

Ruma 14:1 ပူးပေါင်းရင်းမြစ်များ

Mateo 12:20

Embiya idsempità ta ke ulaula rin kayi te menusiyà, ne kenà din ebedtien en ke etew ne iring te subpang ne migerì en, ne edtulengeran din ke etew ne iring te ebmelatmelat ne sulù ke sarig din, ne kenà ed-engked ke tavang din taman te egketalew rin langun ne kenà metidtu.

Mateo 14:31

Arà dà ne migeweran ni Hisus sikandin ne migkahi en te, “Kurang bes ke kebperetiyaya nu kediey! Meambe ke ruen keduwaruwa nu?”

Mateo 18:10

“Urami niyu,” ke si Hisus, “te kenà kew edsudì kayi te eduma kediey ne iring te vatà se kedsarig dan. Su ke menge suluhuen ne ebantey kandan ne layun diyà te etuvangan te Eleteala ne Amey ku diyà te langit. [

Marcos 7:19

Su kenà ini edlusud te hinawa rin, ugaid ne kayi ebpevayà te hetek din ne edlihawang en diyà te kandin.” (Ne ini se lalag ni Hisus ne iyan din ibpesabut ne egkepakey ne egkeenen se misan engkey en ne egkekaan.)

Lucas 17:2

Iyan pà tumù ne ebperiwetuwan ke lieg din te mevehat ne batu ne id-antug diyà te rahat su apey kenà sikandin se puunaan te kebpekedsalà dut te mevavà ne etew ne edsarig kediey.

Juan 13:20

Sebenarvenar ini se egkehiyen ku,” ke si Hisus, “misan entei ne etew se edtelimà dut te edsuhuen ku, ne siaken se midtelimà din dema. Ne ke etew ne edtelimà kediey ne midtelimà din dema ke Amey ku ne midsuhù kediey.”

Nenged-ulaula 28:2

Ne ke menge etew ketà ne midtelimà dan kenami te meupiya ne midtetavun dan su ed-uran ne meadsil.

Ruma 11:15

Su ketà te mid-engkenà te Eleteala ke menge Hudiyanen, ne ini se menge etew ne kenà Hudiyanen se mibpekid-ulit kandin. Ne wey pè be kenà muna pà se kerekelà te penaub dut te Eleteala ketà te ebpekid-ulit en maa ke menge Hudiyanen te kebperetiyaya. Su iring te menge etew ne minatey ne nevanew en maa.

Ruma 14:2

Su uman senge etew ne nekebira se itungan din. Su ruen senge etew ne iyan din pegitungan ne egkepakey ne egkeenen din ke piya engkey en, ugaid ke etew ne meluvey pà se kebperetiyaya rin ne iyan din pegitungan ne kenà idluhut kandin se kegkaan te usa, ne tuved dà se egkeenen din.

Ruma 14:21

Tembù be kenà ki ed-ulaula te piya engkey en ne ulaula ne ebpekepeneheewit te menge suled tew ne mibperetiyaya te kebpekevaal te salà. Su embiya kayi te egkeenen tew ne usa, etawa ke ebpenginumen tew ne ebpeketevereg se puunan te kegkepeneheewit kandan te kebpekevaal te salà, ne kenà tew en arà ed-ul-ulaan.

Ruma 14:3

Ne ini se etew ne misan engkey en ne egkeenen din, ne kenà mebpegitung sikandin se muna pà dut te etew ne tuved dà se egkeenen din. Ne engketà ded dema ke etew ne iyan din dà egkeenen se tuved, kenà mebpegitung te sikandin se muna pà dut te etew ne egkaan te misan engkey en su elin dan midtelimà te Eleteala.

Ruma 15:1

Na sikitew se mevaher en se peretiyaya tew, ne iyan iya se edtulengeran tew ke menge ruma tew ne meluvey pà se peretiyaya rin. Ne kenà iyan tew rà ebpegitungen ne ke hinawa tew.

Ruma 15:7

Peteltelimeey kew iring te kinetelimaa ni Hisu Kristu keniyu, ne embiya ve ini se ed-ul-ulaan niyu ne igkereyù ini te Eleteala.

Ruma 4:19

Su arà ne hewii ne mehatus en ke rahun ni Abraham ne netuenan din se mehurang en nevenar sikandin ne warè en kearus din ne ebpekeanak pà sikandin. Ne netuenan din dema se kenà en ebpekeanak ke esawa rin si Sara, ugaid ne misan pà te iring dutun ne warà medtakas sikandin se edsarig te Eleteala.

1 Kurintu 9:22

Ne embiya riyan a te menge etew ne meluvey pà se kebperetiyaya ran ki Hisus, ne kenà ku ed-ul-ulaan te iyan dan pegitungan ne salà. Iyan ku ked-ul-ulaa te iring ketà su apey ku egketevangi sikandan te ebpeiseg dut te kebperetiyaya ran. Tembù be kayi te kebpemesabut ku te Meupiya ne Tudtul dut te langun ne menge etew, ne ebpemengaan ku ke ralan te kebpeneheewit ku kandan te kebperetiyaya ki Hisus.

Pilipus 2:29

Ne ketà te kebpekeuma rin ne gelhelawa niyu sikandin su tidtu ne suled tew sikandin egenat te kebperetiyaya rin te Kerenan tew. Ipekita niyu te ked-adat niyu te menge etew ne iring ki Ipapruditu.

1 Tiselunika 5:14

Ne ebuyuen ku lavew, menge suled, te suhua niyu ke pehulen ne egelevek. Beg-eta niyu ke hinawa dut te menge etew ne egkeandek, ne tevangi niyu ke menge etew ne melemu ne egkegaga te penggeram dut te datù te pekaid. Ne iyan iya se menanew se kedlalag niyu dut te kedtevangi niyu te menge etew.

Hibruhanen 5:14

Ugaid ke etew ne nekekaan en te mekehal ne ke etew ne midsukud en ne midtua en se itungan din, su netuenan din en te kebpedsusuna rin dut te meraat wey meupiya ne ed-ul-ulaan din.

2 Juan 1:10

Tembù be embiya ruen ebpekeuma riyà te keniyu ne kenà ebpenurù te ini se tidtu ne penurù ni Hisu Kristu, ne kenà niyu ipepemenayik diyà te baley niyu. Ne kenà niyu rema gelhelawa sikandin.