Ruma 13:1 - Ke meupiya ne tudtul mekeatag ki Hisu Kristu

¹ Langun tew, menge suled, ne iyan iya se ebperumaruma kiyu rut te menge kumekamal te gubirnu te inged tew, su warà senge etew ne nevaluy ne egkamal ke kenà ke Eleteala se midtendù kandin ne egkamal.

Ruma 13:1 ပူးပေါင်းရင်းမြစ်များ

Mateo 6:13

Ne ipekeriyù key nikuna dut te menge mevaher ne penggeram, ne pekelangi key dut te datù te pekaid.’

Juan 19:11

Ne midtavak si Hisus te, “Warà bayàbayà nu kediey embiya kenà Eleteala se mibehey keykew. Tembù ke etew ne mibpeewit kediey kayi te keykew ne muna pà ke salà din dut te keykew.”

Nenged-ulaula 2:41

Ne merakel se mibperetiyaya dut te lalag ne impesabut ni Pedro ne mibpebunyag dan tuus te ebperetiyaya ran en ki Hisus. Ne arà ne hewii ne menge tetelu ne ngivu se menge mibperetiyaya ne nekeuman dut te menge etew ne mibperetiyaya ki Hisus.

Ruma 12:21

Embiya ruen duma tew ne ed-ulaula te meraat keytew, ne kenà tew edsureren, su embiya edsurer ki ne egkeewit ki riyà te meraatey. Ugaid ne iyan timbang ne idsurer tew kandin ne ibpekita tew kandin ke meupiya ne ulaula tew, su apey rin egkemuhudmuhud ne ketà ne ebpekeruma sikandin te meupiya.

Ruma 13:2

Ketà be ne misan engkey se kenà eduma rut te menge egkamal te inged, ne iring te iyan din kenà edumaan ne ke Eleteala su ke Eleteala ma se mibpebaluy kandan ne egkamal. Tembù be ke etew ne iring ketà ne edusaan te Eleteala.

Ipisu 5:21

Layun kew pekita te kebpeed-edatey niyu su geina te iyan niyu ibpeuna te hinawa niyu ne si Hisu Kristu.

1 Timoteo 2:2

Ibpengeningeni tew te Eleteala ke menge mepurù ne ebayàbayà kenitew wey langun ne menge ruma ran ne ruen gaga ran te ed-ewit kenitew. Ibpengeningeni tew te Eleteala sikandan apey meupiya se ked-ewit dan keytew su apey ebmelinandang se ketemanan tew wey apey ruen kesig tew te eduma te Eleteala wey ed-ulaula te metidtu.

Tito 3:1

Igkahi nu, Tito, rut te menge mibperetiyaya keniyan te med-adat dan dut te menge mepurù te inged dan wey ke menge ruma ne ruen ketengdanan din. Medtuman dan dut te menge suhuan kandan, ne layun dan mebpenehana te ulaula ne meupiya.

Hudas 1:8

Iring ded be iya ketà ke egketemanan dut te menge etew ne ebpenurù te kenà benar diyà te keniyu. Edtumanen dan dà ke meraat ne kiyug te lawa ran su ingkahi kun kandan te tehinep dan. Ne edsumpeliten dan su kenà dan eduma te lalag te Eleteala, ne edsudian dan ke ketulusan ne suluhuen diyà te langit.

Imperayag 17:14

Ne ebpekibunù dan dut te Nati te Bilibili, ugaid ne ini se Nati te Bilibili wey ke menge sakup din se edtavan kandan. Su sikandin dà ke Mepurù dut te langun ne kerenan wey sikandin se Mepurù dut te langun ne menge datù. Ne langun ne sakup din ne ke menge etew ne mibpemilì te Eleteala ne mibpeperetiyaya wey metinumanen kandin.”

Imperayag 19:16

Iyan insurat diyà te kumbalà din wey diyà te buvun din ne, “Datu dut te langun ne menge datù wey Mepurù dut te langun ne ruen bayàbayà din.”