Ruma 12:9 - Ke meupiya ne tudtul mekeatag ki Hisu Kristu

⁹ Ne ke limù ne ibpekita tew te menge ruma tew ne kenà kayi rà te ampew ugaid ne ibpetuneb tew te hinawa tew. Ne ebpekeriyuan tew ke meraat ne ulaula, ne egeweran tew te mevaher ke meupiya.

Ruma 12:9 ပူးပေါင်းရင်းမြစ်များ

Mateo 26:49

Nekeuma rà si Hudas ne mid-uvey rin en si Hisus se egkahi te, “Mebmelinew se egketemanan nu, Meyterù!” Ne arà pà ne mid-erekan din.

Juan 12:6

Kenà iyan din kinekahi te iring ketà ne ke kegkeyru rin dut te menge ayuayu, ugaid ne tekawen sikandin. Su sikandin ke ebpetugenuren dut te edtehuan te kureta en ni Hisus, ugaid ne ebpengpenguan din mulà.

Nenged-ulaula 11:23

Guna su nekeuma sikandin ne nekita rin arà se rekelà ne penaub te Eleteala ketà te menge etew. Ketà ne nehalew nevenar sikandin wey mibag-et din sikandan te egkahi te geweri ran te nevaher arà se kebperetiyaya ran ki Hisu Kristu ke Kerenan.

2 Kurintu 6:6

Ne impekita rey te benar ne sugsuhuen key te Eleteala kayi te ketilak te ulaula rey wey ke kedsebuta rey rut te Meupiya ne Tudtul ne ibpemesabut dey wey ke kedtigker dey wey ke kedtulanged dey. Ne egkekita red dema te ke Kedesenan ne Ebpetuntul te Menusiyà se ebpetuntul kenami, ne ke limù dey te ruma rey ne kenà kayi rà te bèbà dey su benar.

2 Kurintu 8:8

Kenà ku suhù ini keniyu, ugaid ne ebpeketuenan ku rà keniyu te rekelà dema se kiyug dut te ruma ne mibperetiyaya te kebpeketavang dan te ruma ran su apey ku egkekita embiya benar se sarig niyu te Eleteala.

1 Tiselunika 2:3

Su ini se impesabut dey keniyu ne kenà egenat te tarù etawa iyan dey lakew se meraat, ne kenà dema ralan te ked-akal dey keniyu su impesabut dey ke benar ne penurù.

1 Tiselunika 5:15

Embiya ruen ed-ulaula keniyu te meraat ne kenà kew edsulì kandan, ugaid ne iyan niyu ul-ulaa ke engkey se meupiya diyà te langun ne menge etew.

1 Tiselunika 5:21

ugaid ne surimana niyu embiya benar ne ebpuun ini diyà te Lalag te Eleteala, ne dumai niyu ke langun ne meupiya,

1 Timoteo 1:5

Iyan ku idsuhù ini su apey ran ebpelimlimuey. Ini se kebpelimlimuey ne egenat te hinawa ran ne midtilak te Eleteala su apey warà ebpekesawug ne meraat te itungan dan wey kenà alang-alang se kedsarig dan ki Hisu Kristu.

Hibruhanen 1:9

Su iyan nu kiyug ke metidtu ne ulaula, ne igkeepesi nu ke ulaula ne meraat. Tembù be siaken ke Eleteala nu se mibpemilì kenikew, ne imbehey ku keykew ke kehelawan su mid-edatan ku sikew muna pà dut te menge ruma nu.”

Hibruhanen 12:14

Ne uram kew te kenà kew ebpekevaal te kewahaan su apey ke itungan niyu dut te langun ne menge etew ne ebmelintad. Ne heleveka niyu te mevaher se kebmetidtu te ulaula niyu ne ebpekesuhat te hinawa te Eleteala, su embiya kenà iring ketà se ulaula tew ne kenà ki egkekita te Eleteala.

Santiago 3:17

Ugaid ne ke etew ne riyà ebpuun te Eleteala se ketampas din, ne arà se etew ne metidtu diyà te etuvangan te Eleteala. Mehalewhalew se hinawa rin dut te menge ruma rin, melimù sikandin, ne laus ne edsepekat. Igkelimù din ke menge ruma rin, ne layun meupiya se ed-ul-ulaan din diyà te kandan. Warà ebpelebien din su negidsan se ulaula rin dut te langun. Ne kenà asal-asal dà se peretiyaya rin su tidtu se hinawa rin.

1 Pedro 1:22

Na geina te mibperumaruma ki en dut te tidtu ne penurù ne egkepakey ne meilut se limù tew rut te menge ruma tew te ebperetiyaya su mibmetidtu ke itungan tew. Tembù be ebpelimlimuey ki egenat te hinawa ta ne kenà kayi rà te bèbà ta.

1 Pedro 4:8

Ne iyan ta ibpeuna te hinawa ta ne egeweran ta te meilut ini se kedlimù ta dut te menge ruma ta ne menge mibperetiyaya. Su embiya tidtu se limù ta dut te menge ruma ta ne misan duen salà dan keyta ne egkepakey ne ebpeseharen ta.