Ruma 12:6 - Ke meupiya ne tudtul mekeatag ki Hisu Kristu

⁶ Ne geina te warà memeked-iring ke imbehey te Eleteala ne ketau rut te sikitew, ne iyan tew rà egeleveken ke imbehey rin keytew. Upama ini, embiya iyan ingkevehey te senge etew rut te sikitew se ebpemenudtul ke engkey se impesabut kandin te Eleteala, ne arà en imbe se geleveka rin te endei taman se sarig din.

Ruma 12:6 ပူးပေါင်းရင်းမြစ်များ

Mateo 23:34

Ne ebpeketuenan ku keniyu te ruen etew ne edsuhuen ku kayi te keniyu ne ebpelambas te Lalag te Eleteala, menge etew ne dekelà se netuenan din mekeatag te Eleteala, wey menge etew ne ebpenurù. Ugaid ne ruen ed-imetayan niyu, ne ruen idlansang niyu riyà te kayu, ne ebpembedasan niyu ke ruma diyà te lusud te baley ne ebpengedian te penduan niyu, wey ke ruma ne ebpenuntulen niyu riyà te menge inged su ebpemekeiran niyu.

Mateo 25:22

“Ne midlusud en maa ke edsugsuhuen ne midserihan te deruwa nengivu ne migkahi te, ‘Kerenan, ini en ke deruwa nengivu ne insarig nu kedì, ne ruen pà ini deruwa nengivu ne neuntung ku keniyan te kureta nu ne impemuunan ku te kedtitindàtindà ku.’

Lucas 11:49

Ne geina te metmetau ke Eleteala ne ruen migkahi rin dengan mekeatag ini, ke sikandin te, ‘Edsuhù a te menge etew diyà te kandan te ebpelembasen ku te Lalag ku wey kedserihan ku te ebpemenudtul mekeatag kediey, ne ruen duma ne ed-imeteyan dan ne ruen duma ne ebpendreseyan dan.’

Nenged-ulaula 13:1

Diyà te menge mibperetiyaya ne riyà te Antiyuka ne ruen menge ebpelambas te Lalag te Eleteala wey ebpenurù te Lalag din. Ketà ne si Bernabe, si Simeon (ke ed-imukuen te Meitem), si Lucio (ne riyà ebpuun te Sirini), ne si Menain (ne riyan en medekelà te ki Hirudis ne gubinedur) wey si Saulo.

Nenged-ulaula 15:32

Ne si Hudas ini ki Silas ne menge etew rema ne ebpelambas te Lalag te Eleteala ne meuhet se kinepekidlalag dan dut te menge mibperetiyaya su mibpenurù dan su apey ke kebperetiyaya ran ne mevag-et wey meilut.

Nenged-ulaula 2:17

‘Ne ibpelumun ku te langun ne menusiyà ke Kedesenan ne Ebpetuntul te Menusiyà ketà te mehaan en egkeuma ke mewri ne hewii. Ne ke inenakan niyu ne menge meama wey meritan ne ibpesabut te menge etew ini se lalag ku. Ke menguwed ne menge meama ne ruen ibpekita ku kandan, ne ke lukes ne menge meama ne ruen ibpetehinep ku kandan.

Nenged-ulaula 21:9

Ne ruen epat ne menge anak din ne raha ne mibehayan te Eleteala te helevek te ebpayag dut te Lalag te Eleteala diyà te menge etew.

Ruma 1:11

Su rekelà te hinawa ku se kebpenumbaley ku riyà te keniyu su apey ruen dalan te kebpekepenurù ku keniyu rut te impenurù kediey te Kedesenan ne Ebpetuntul te Menusiyà su apey ed-ilut pà se kebperetiyaya niyu te Eleteala.

Ruma 12:3

Ne geina te ruen ketau ne imbehey kediey te Eleteala te kebpemesabut te lalag din, ne ebuyuen ku te langun niyu ne kenà niyu pegitunga te sikiyu rà se ruen gaga rin. Ugaid ne peketidtuwa niyu ke itungan niyu dut te negaga niyu, ne iyan niyu serihi ne endei rà taman te ketau ne imbehey keykew te Eleteala ketà te kedsarig niyu kandin.

1 Kurintu 12:18

Ugaid ne kenà iring ketà se kinelimbag te Eleteala te etew, su ke lawa te etew ne kenà senge susun ne pepatà dà ugaid ne merakel su uman seveka ne ruen egkeetahan din su arà ma ke kiyug te Eleteala.

1 Kurintu 13:2

Ne misan metau a ne ebpelambas te Lalag te Eleteala, ne misan ruen impayag te Eleteala kediey ne in-eles din dut te ruma ne etew, ne misan nesebutan ku ke langun ne benar ne penurù, ne misan engkey pà se kerekelà te sarig ku te Eleteala su apey ku egkekehiyan ke buvungan te ibpearat, ugaid ne embiya warà limù ku rut te menge ruma ku ne warà egkepentehan ku riyà te etuvangan te Eleteala.

1 Kurintu 14:1

Engketà be arà, ne iyan niyu ipeuna te hinawa ne arà se kegkelimù te menge ruma niyu. Ugaid ne meupiya rema ke ebuyù kew te menge ketau te Kedesenan ne Ebpetuntul te Menusiyà, ne muna pà ke ketau te kebpenurù niyu rut te impesabut keniyu te Eleteala ne kenà ke kebpekelalag te kinehiyan ne kenà egkesebutan.

1 Kurintu 14:24

Ugaid ne embiya iyan niyu ed-ul-ulaan se ebpesabut dut te impesabut keniyu te Eleteala ne ruen midlusud ketà te kegkevurun niyu ne kenà pà ebperetiyaya ne egkerineg dan ke Lalag te Eleteala ne ibpesabut niyu, ne ketà puunan ne egketuenan dan te ruen mid-ulaula ran ne meraat, ne egketuenan dan dema te edusaan dan te Eleteala dut te salà dan.

1 Kurintu 14:29

Ne embiya ruen ebpesabut dut te impesabut kandan te Eleteala, ne iyan meupiya se deruwa etawa tetelu se edlalag. Ne langun dan ne mebpemineg su pegpegitunga ran arà se edlelahen.

1 Kurintu 3:5

Na maa engkey key? Su sikami ki Epulus ne etew red ne midsuhù te Eleteala su apey kew ebpekeperetiyaya kandin. Su sikami ne edtuman key rà dut te ibpehelevek te Eleteala kenami.

1 Kurintu 7:7

Embiya egkepakey, ne iyan ku egkiyuhan ne ebpekeiring kew kedì te kenà ebpengesawa. Ugaid ne netuenan ku te warà pemed-iringa te Eleteala ke langun tew, su mibehayan din ke senge etew te ketigker te kenà ked-esawa, ne keseveka ne senge bias dema se imbehey rin.

2 Kurintu 8:12

Embiya dekelà se hinawa niyu te kebehey niyu te tavang ne endei rà se taman ne egkegaga ne arà dà ke ibehey niyu ne igkehalew te Eleteala. Su kenà din ebuyuen keniyu ke kenà niyu igkevehey, ugaid ne iyan din ebuyuen ne endei rà se egkegaga niyu te ebehey.

Ipisu 3:5

Warà pà impayag te Eleteala ini diyà te menge apù tew, ugaid ne guntaani ne impesabut din en dut te menge kedserihan din wey ke menge ebpelambas te lalag din ibpepevayà dut te Kedesenan ne Ebpetuntul te Menusiyà.

Ipisu 4:11

Su sikandin se mibehey te ketau te langun ne menge etew rin su apey iyan dan ed-ul-ulaan ne ke kiyug din. Ruen mibehayan din te helevek ne egkevaluy ne menge kedserihan din, ruma ne mibaluy rin ne ebpelambas te Lalag te Eleteala. Ruen ruma ne mibehayan din te ketau te ebpesabut dut te Meupiya ne Tudtul mekeatag ki Hisu Kristu. Ne ruen duma rema ne mibehayan din te ketau te ebpeneheewit te menge mibperetiyaya en wey ebpemenurù kandan.

Pilipus 3:15

Arà ne itungan ne iyan din dait te langun ne sikitew ne midtamel en se peretiyaya rin. Ugaid ne embiya ruen keniyan te keniyu ne kenà egkeuyun, ne ke Eleteala se ebpesabut kandin dut te benar.

1 Tiselunika 5:20

kenà niyu sudii ke egkehiyen dut te menge ebpelambas te Lalag te Eleteala,

2 Pedro 1:20

Na, itahù niyu nevenar ini te itungan niyu su apey kenà niyu melipati. Warà misan senge etew rà ne metau ne ebpesabut te lalag te ebpelambas te Lalag te Eleteala rengan embiya kayi rà te itungan din dà su iyan iya se medsarig sikandin dut te Kedesenan ne Ebpetuntul te Menusiyà te ebpesabut kandin.