Ruma 12:3 - Ke meupiya ne tudtul mekeatag ki Hisu Kristu

³ Ne geina te ruen ketau ne imbehey kediey te Eleteala te kebpemesabut te lalag din, ne ebuyuen ku te langun niyu ne kenà niyu pegitunga te sikiyu rà se ruen gaga rin. Ugaid ne peketidtuwa niyu ke itungan niyu dut te negaga niyu, ne iyan niyu serihi ne endei rà taman te ketau ne imbehey keykew te Eleteala ketà te kedsarig niyu kandin.

Ruma 12:3 ပူးပေါင်းရင်းမြစ်များ

Lucas 18:11

Guna su ketà dan en te lusud ne mid-itindeg ini se Peresiyu ne mibpengeningeni te hinawa rin, ke sikandin te, ‘Is Eleteala, ebpenelamat a kenikew ne Eleteala su kenà a iring keniyan te ruma ne menge etew ne tenlimbungen, menge etew ne meraatey se ulaula ran, wey menge etew ne ebpengingniyug. Uya, ebpenelamat a te kenà a iring keniyan te etew ne ebpevayad te buwis.

Juan 3:34

Si Hisus ke midsuhù te Eleteala ne iyan ibpepenudtul ne ke Lalag te Eleteala dut te ebpelumunan sikandin te Kedesenan ne Ebpetuntul te Menusiyà ne imbehey kandin te Amey rin ne Eleteala.

Ruma 1:5

Ibpepevayà ki Hisu Kristu ne midtevangan a te Eleteala te nevaluy a ne kedserihan ni Hisus te ebpesabut mekeatag kandin diyà te langun ne menge etew. Su egkiyuhan din te langun ne menge etew ne ebpekeperetiyaya ki Hisus ne eduma kandin. Ne kayi te keduma ran kandin ne sikandin se edeyuen diyà te kandan.

Ruma 11:20

Ne benar ne nekesambì kew kandan. Ugaid ne iyan puunan te kinetempera te Eleteala kandan su warà dan mebperetiyaya ki Hisus, ne ke puunan te kinetuvù niyu guntaani ne ke kineperetiyaya niyu. Ugaid ne kenà niyu ve ibpendekarak, inemulà se ingati niyu nevenar ke ulaula niyu.

Ruma 11:25

Na menge suled ku ne kenà Hudiyanen, ruen ibpayag ku keniyu ne in-eles rengan. Ne iyan ku kebpayag keniyu su apey kenà niyu igkependekarak ke mid-ulaula te Eleteala keniyu iring te sikiyu se muna pà dut te menge Hudiyanen. Ini ve arà se in-eles, ne ayan se kenà kebperetiyaya te menge Hudiyanen ne edsahad dà. Su embiya ve ke langun niyu ne kenà Hudiyanen ne nepemilì te Eleteala se mibperetiyaya en kandin, ne ketà pà ne egkeawà ke keresen te ulu ran ne ebpekeulit ke itungan dan te kebperetiyaya ran maa.

Ruma 12:16

Ne langun tew ne mibperetiyaya ki Hisu Kristu, ne iyan iya se egkeseveka ki su apey kiyu kenà ebpemekedlewanà. Ne kenà ki ebpebperayù, ne kenà tew igkeyeyai se kebpekiduma tew rut te malù mevavà keytew. Ne kenà tew ebpegitungen te iyan ki pà bereitungan kandan.

1 Kurintu 15:10

Ugaid ne ke raat te nanam te Eleteala kedì se puunan te kenà dineg dà te ebpengumew se kineparin te ulaula ku. Ne ruen nepentahan din ke kineraat te nanam din kedì su mibaluy a rin ne kedserihan din, ne ketà puunan ne iyan pà dekelà se nehelevek ku rut te langun ne kedserihan ni Hisus. Ugaid ne misan iring ketà se helevek ku, ne kenà ku arà egkegaga su arà ne tavang ded te Eleteala kedì.

1 Kurintu 3:10

Ne egenat dut te tavang te Eleteala ne ibehey rin kediey, ne iring a rut te etew ne ebpeitindeg te mevaher ne segkad. Ne ke helevek ku ketà ne meimpit su siak ke neuna ne mibpenurù keniyu atag ki Hisus. Ugaid ne ruen ruma ne etew ne ed-imasad ketà te nerudsuan ku ne helevek, ne uman seveka ne ed-amung te ebevaley ne med-uram dut te kandin ne helevek.

1 Kurintu 7:17

Ne misan engkey se ketau ne imbehey te Eleteala te uman senge etew keytew te warà kiyu pà mebperetiyaya, ne iyan meupiya ne idlaus ta arà dut te kebperetiyaya ta. Ini se ibpenurù ku dut te langun ne egkevurun ne mibperetiyaya te misan endei ne inged ne ebpesineruwan ku.

2 Kurintu 10:13

Ugaid sikami ne kenà dey egkehiyen ne migelevek dey ke warà dey mehelevek. Su arà se imbehey kenami te Eleteala ne ed-ul-ulaan dey, ne arà se egkehiyen dey ne migelevek dey, abpeg din ke helevek dey riyà te keniyu.

2 Kurintu 12:13

Ne ini se kedtavang ku keniyu ne iring ded dut te kedtavang ku rut te menge mibperetiyaya te ruma ne inged. Ugaid ne iyan din dà ebiraan se warà a mebuyù keniyan te keniyu te misan engkey ne kurang ku. Na menu, salà ku ve arà keniyu?

2 Kurintu 12:7

Su kenà egkiyug ke Eleteala ne ibpereyùdeyù ku ke utew meupiya ne impekita rin kedì diyà te langit. Ne inluhut din te sugsuhuen ni Setanas te edresayen a te sakit su apey kenà ad ebpekepereyùdeyù.

Gelasiya 6:3

Embiya ruen etew ne ebpegitung te sikandin mulà ne kenà beledtila, ne midlimbungan din se hinawa rin.

Ipisu 3:2

Nerineg niyu en ma buwa ke helevek te Eleteala ne insarig din kediey te ebpesabut keniyu ne kenà Hudiyanen mekeatag te tavang din ne ibehey keniyu.

Ipisu 3:4

Ne embiya ebesaan niyu ini, ne egketuenan niyu ini se nesebutan ku mekeatag te netahù te itungan te Eleteala ne edtumanen ni Hisu Kristu ne warà pà metueni pehaney.

Ipisu 4:16

ne sikitew ke mibperetiyaya en ne iring te lawa rin. Su langun dut te pepatà te lawa ne nekebpikit, tembù be piya endei dapit kayi te lawa ne ruen gelevek din ne embiya egkeseveka ran se eduma rut te kiyug te ulu ne ebpekeiseg se kebmevaher dut te lawa. Ne iring din ded dema kayi te kenitew su embiya uman senge etew ne edtuman dut te kandin ne helevek ne ed-iseg ke kebmevaher dut te langun kayi te lawa su atag dut te kebpelimlimuey tew.

Pilipus 2:13

Su ke Eleteala ne ed-ubpà diyà te hinawa niyu ne edtavang keniyu, su sikandin se ebehey keniyu te kiyug te ebperumaruma kandin wey ke baher te kedtuman ketà.

Kulasi 1:29

Ini iya se ebpegelepan ku te egelevek ne embiya kediey rà ne kenà ku ini egkegaga, ugaid ne ke baher ni Hisu Kristu se ibpekegaga ku.

Kulasi 2:13

Su pehaney ne iring kew te minatey riyà te etuvangan te Eleteala su warà kew pà mekeliyu dut te salà niyu wey warà netuenan niyu mekeatag te impasad te Eleteala su kenà kew ma Hudiyanen. Ugaid ne gunteani ne nevehayan kew en te Eleteala te behu ne umur iring ki Hisu Kristu, su sabap dut te kedsarig tew kandin ne pinesahad kiyu en dut te langun ne salà tew.

1 Timoteo 1:14

Melimù nevenar si Hisu Kristu ke Kerenan tew su mid-uluhan a rin te raat te nanam, ne pinesarig a rin kandin, ne midtehuan a rin te kegkelimù ku kayi te menge ruma ku egenat dut te kinepekidseveka ku kandin.

1 Timoteo 2:15

Tembù be egkerasey ke meritan ke ed-anak, ugaid ne egketevangan dan te Eleteala su apey ran ebpekeliyu embiya egkamal dan te mevaher te peretiyaya ran kandin wey ebpelimlimuey ran wey ebpeketidtu ran te ulaula ran ne ebpekesuhat te Eleteala.

1 Timoteo 2:9

Ne engketà ded dema ke menge meritan, duen erangan te kebpemedait dan te kebevelegkas dan. Kenà kayi rà te mepurù ne velegkas dan etawa kayi te kebpuputus dan etawa menge rayandayan ne bulawan egketueni se keupiya ran te menge meritan.

Tito 2:12

Ne ini se tavang ne impekita te Eleteala kenitew se mibpenurù en kenitew te ed-engkeran ke ulaula ne kenà ebpekesuhat te hinawa rin, abpeg ke langun ne kiyug te lawa tew kayi te ampew te dunya. Ne ed-erenen tew ke kiyug te itungan wey lawa tew su apey langun ne ulaula tew taman te kayi ki pà te ampew te dunya ne metidtu wey ebpekesuhat te hinawa te Eleteala.

Tito 2:2

Igkahi nu rut te menge lukes ne meama ne ed-erangan dà te ed-ul-ulaan dan, ne ed-ulaula te endei se egkeedatan dan wey med-eren dan te kiyug te lawa ran. Ne mebmetidtu se kebperetiyaya ran te Eleteala, medlimù dan te menge etew, ne mebpekeantus dan se edtigker te kemerehenan.

Tito 2:4

su apey imbe ini se egehuruwan dut te menge menguwed pà ne memeritan te kedlimù te esawa ran wey menge anak dan.

Tito 2:6

Engketà ded dema ke kebpenurù nu te menge kenakan te med-eren dan te kiyug te itungan wey lawa ran.

Santiago 4:6

Ugaid ne ke kedtavang te Eleteala kenitew ne mevaher pà su apey ki kenà ebpekeruma dut te meraat ne kiyug te lawa tew. Su ruen dema ini se lalag din ne impesurat din ne egkahi te, “Egkunteraan te Eleteala ke etew ne mepereyù, ugaid ne edtevangan din ke etew ne ebpeembavà te hinawa rin.”

1 Pedro 1:13

Tembù be iyan iya se ibpenehana tew ke hinawa ta neraan te keduma te suhù te Eleteala. Ne ebpekerumbahat ki rut te langun ne ed-ul-ulaan tew su apey iyan dekelà te hinawa ta ne ini se meupiya ne ibehey te Eleteala keytew ketà te hewii ne edlived si Hisu Kristu kayi te ampew te dunya.

1 Pedro 4:11

Embiya ruen keyta ne nevehayan te ketau te ebpesabut se Lalag te Eleteala, ne iyan iya se edtentenuran din te ini se Lalag te Eleteala ne ibpesabut din. Ne embiya ruen ketau ta te edtavang te menge ruma ta, ne iyan iya se kenà ta egkelipatan ne ini se kevaher ta te edtavang ne riyà ebpuun te Eleteala. Piya engkey en ne helevek ne imbehey keyta te Eleteala ne ebeelan ta, ne iyan iya se ed-ey-eyaran ta te ebaal egenat dut te tavang ne ebpuun ki Hisu Kristu su apey Eleteala se edeyuen dut te menge etew. Su sikandin dà se edait ne edeyuen, ne sikandin dà se warà ebpekerepeng dut te gehem din taman te taman.

1 Pedro 4:7

Mehaan en se kegketapus kayi te dunya, tembù be sikita ne menge etew ne iyan iya se editihel ki rut te egketuenan ta ne ibpevayà ta wey ibmeupiya te hinawa ta su apey warà ebpekealang te kebpengeningeni ta te Eleteala.

1 Pedro 5:5

Ne sikiyu ne menge menguwed, ne iyan iya se pevayàbayà kew rut te pekilukesen. Su iyan meupiya ne langun tew ne mebpeembavà te hinawa ta ne ebpesugsuhuey ki rut te menge ruma ta. Su ruen impesurat ne Lalag te Eleteala ne egkahi te, “Egkunteraan te Eleteala ke menge etew ne mepereyù, ugaid ne edtevangan din te rekelà ke menge etew ne mebpeembavà te hinawa ran.”

1 Pedro 5:8

Ne ed-uram ki ne ebantey ki rut te langun ne ed-ul-ulaan ta su ini se kunterà tew ne si Setanas ke datù te pekaid ne egkiyug ne ebpekesuwey ki te keduma ta te Eleteala. Su edlauglaug sikandin ne ebpemengà te etew ne egkepeneheewit din te ed-ulaula te meraat iring dut te mekeandek ne erimaung ne ebpemengà te egkekaan din.

3 Juan 1:9

Ne ruen insurat ku mekeatag te ini riyà te menge mibperetiyaya ne egkevurun ketà. Ugaid ne si Diyutripis ne kenà din ebpeminehen ini se lalag ku, su iyan din igkesuat ne sikandin se edlingekaan dut te menge mibperetiyaya riyà.