Ruma 12:12 - Ke meupiya ne tudtul mekeatag ki Hisu Kristu

¹² Ne egalewhalew ki ve kayi rut te ebpenerengen tew keuremà, ne kenà ki ebpemivig ke embiya ruen kemeresayan tew, ne layun ki ebpengeningeni te Eleteala.

Ruma 12:12 ပူးပေါင်းရင်းမြစ်များ

Mateo 5:12

Kehalew kew misan iring kayi te ini kew te ampew te dunya su dekelà se idlalew keniyu diyà te langit. Su iring ded dema ke impekaid dan dut te menge mibpelambas te Lalag te Eleteala rengan.”

Lucas 10:20

Ugaid ne kenà iyan niyu igkehalew se ebperumaruma ke vusew keniyu,” ke se Hisus, “ugaid ne iyan niyu ikehalew ne impesurat en te Eleteala ke menge ngaran niyu riyà te langit.”

Lucas 21:19

Itindehi niyu ve te mevaher ke sarig niyu kediey su kayi kew ve ebpekeangkun te umur ne kenà edtaman.”

Lucas 8:15

Ne ke meupiya ne tanà ne neuluhan te benì, ne arà ke menge etew ne nekerineg te Lalag te Eleteala ne midtelimà dan ne warà dan midsanggel se ebperetiyaya. Ne mibpenemtemanan dan te edtuman taman te nekeuma ran te kebehas.”

Nenged-ulaula 1:14

Langun dan ne lelayun eburun su ebpengeningeni diyà te Eleteala, ne mid-amung dema ke menge meritan, elin dutun si Maria ke iney ni Hisus wey ke menge meama ne ari ni Hisus.

Nenged-ulaula 12:5

Ketà ne diyà si Pedro te bilengguan, ugaid ne ke menge mibperetiyaya ki Hisus ne meilut ne ebpengeningeni diyà te Eleteala mekeatag kandin.

Nenged-ulaula 2:42

Uman gewii ne ebpemineg dan dut te ibpenurù te menge kedserihan, ne neseveka ke hinawa dut te langun ne menge mibperetiyaya ki Hisus. Langun dan ne mid-amung te egkaan te pan su kedtenuri ran dut te kinepatey ni Hisus, ne mid-amung dan lavew te kebpengeningeni te Eleteala.

Nenged-ulaula 6:4

Ketà,” ke sikandan, “ne sikami ke menge kedserihan ne kenà en egkeseletan ke hewii te kebpengeningeni rey wey kebpemesabut dey dut te Lalag te Eleteala.”

Ruma 15:13

Ne ke Eleteala se ebpuunan te langun ne keupianan ne ebpenerengen tew, ne kiyug ku ne menu ma ke mevehayi kew nikandin te rekelà ne kehelawan wey ke kebmelintad te hinawa niyu. Su embiya iring ketà se egked-ulaula, ne ke kedsarig niyu kandin mekeatag te ebpenerengen niyu ne ebmevag-et riyà sabap dut te gehem te Kedesenan ne Ebpetuntul te Menusiyà.

Ruma 15:4

Ne netuenan tew te langun ne impesurat ne Lalag te Eleteala rengan ne keytew ne keupianan su apey ki egkepenurù. Su ini se impesurat ne lalag din ne ini se ebpeketavang keytew te kebmetigker tew ketà te kemeresayan tew, wey idtihel te hinawa tew gewii te kedtahad tew rut te ebpenerengen tew keuremà.

Ruma 2:7

Ruen menge etew ne iyan dan ebpeisehen ne ke meupiya ne ed-ul-ulaan, su iyan netahù te itungan dan ne egkeuma ke hewii ne ebpekelusud dan en diyà te ed-ubpaan te Eleteala ne kenà igkeupama se keupiya rin. Ne ketà dan egkekita se nekesuhat dan te hinawa te Eleteala, ne riyà dan en ebpekeubpà taman te taman. Su ketà dan en egketelimà ke umur dan ne warà edtemanan din.

Ruma 8:25

Ugaid ne geina te warà pà med-ulaula arà se egkepenareng tew, ne kenà ki egkeperà gewii te edtehad ki pà.

1 Kurintu 13:13

Na, ruen ini se tetelu ne kenà egkeawà kayi te keyta: ini se kebperetiyaya ta te Eleteala, ini se kebpenareng ta te kegketuman dut te impasad te Eleteala kenita wey ini se limù ta te menge ruma ta. Ugaid ne iyan ebpekeuna kayi ne ke limù ta te menge ruma ta.

2 Kurintu 12:8

Ne ketetelu ku en impengeningeni riyà te Eleteala te ebuyuen ku ne id-awà din.

Pilipus 3:1

Na menge suled, ruen pà ebpetentenuran ku keniyu, layun kew kehalew te mibpekidseveka kew en ki Hisu Kristu ke Kerenan tew. Kenà ku igkebungas te misan egkesulit ku en ke neuna ne lalag ku keniyu su embiya edumaan niyu ini ne baag keniyu ne kenà kew egkeekalan.

Pilipus 4:4

Ne layun kew mebmehalew su atag dut te mibpekidseveka kew ki Hisu Kristu ke Kerenan tew. Ne egkesulit ku pà maa te egkahi te layun kew mebmehalew.

Kulasi 1:11

Ebpengeningeniyen dey rema ne ke gehem te Eleteala ne warà repeng din ne ebeheren kew rin su embiya ebpekeanuyanuy kew te kemerehenan ne igalewhalew niyu rà se kedtigker niyu.

Kulasi 1:27

Ne sikiyu rema ne kenà menge Hudiyanen ne nekeamung ketà te mibpeyahan din. Ne warà pasar din ne keupianan ini se netahù te itungan din te ibpeubpà din si Hisu Kristu kayi te hinawa tew, ne ini se tuus te sikita ne id-amung din dut te kepurù te Eleteala diyà te langit.

Kulasi 4:12

Si Ipapras ini ne senge etew ne ruma niyu red keniyan te inged niyu ne ebpenginginsà dema mekeatag te sikiyu. Sugsuhuen dema sikandin ni Hisu Kristu ne layun ebpengeningeni te mevaher mekeatag keniyu. Ebpemuyuen din te Eleteala se ebmeilut ke sarig niyu kandin ne igkehat niyu te tivang se kedtindeg niyu embiya ruen ebpesuwey keniyu su apey warà duma ne ed-ul-ulaan niyu su ke kiyug dà te Eleteala.

Kulasi 4:2

Na layun niyu ibpelevundus ke kebpengeningeni niyu ne kenà kayi rà te bèbà niyu su egenat imbe te hinawa niyu, ne kenà kew lipat se ebpeselamat te Eleteala.

1 Tiselunika 1:3

Su uman key ebpengeningeni mekeatag keniyu diyà te Amey tew ne egketenuran dey ke meupiya ne ed-ul-ulaan niyu su tuus te mibperetiyaya kew iya ki Hisu Kristu. Ne egketenuran dey rema ke dekelà ne limù niyu kandin ne egkekita te meilut se gelevek niyu kandin. Ne kenà dey egkelipatan ke kedtigker niyu te keresayan su dekelà ne ebpenerengen niyu ne edlived si Hisu Kristu ke Kerenan tew kayi te ampew te dunya.

1 Tiselunika 5:8

Ugaid ne nekevira en ke sikita ne mibperetiyaya ki Hisus su mibmerayag en ke itungan ta. Tembù be ed-uram ki su apey ke kedsarig ta ki Hisus wey ke kebpelimlimuey ta ne arà ke iring limbutung ta ne ebpekealang keyta dut te kebpenggeram keyta te datù te pekaid. Ne ke penerengen ta te kebpekeliyu ta rut te kedusa te Eleteala ne arà ke iring sepiyu ta ne putew ne ebmelinew ke itungan ta wey ebpekeiseg ke kebperetiyaya ta.

2 Tiselunika 1:4

Tembù be diyà te langun ne menge kevurunan te menge ruma tew ne mibperetiyaya te Eleteala ne indantal dey ke kegkehalew rey mekeatag keniyu. Uya, indantal dey mekeatag te kebperetiyaya niyu ne mibmeilut misan egkerasey kew dut te kebpekesekiti keniyu.

2 Tiselunika 3:5

Iyan dey ebuyuen te Kerenan tew ne edtavang keniyu su apey ke nesebutan niyu mekeatag dut te kerekelà te limù te Eleteala keniyu wey ke kedtigker niyu rut te keresayan ne ebpekeiseg.

1 Timoteo 6:11

Ugaid ne geina te sikuna ini, Timoteo, ne etew ne eduma te Eleteala, ne uram ka apey kenà ka ebpekeiring kayi te menge etew ini. Penamantaman ka te kebmetidtu te ulaula nu wey itungan ne ebpekesuhat te Eleteala. Ilaus nu ke kedsarig nu te Eleteala. Ikelimù nu ke menge ruma nu, ne misan engkey en kerehen din ne tigkeri nu, ne ipekita nu ke ketulengeran nu kandan.

2 Timoteo 3:10

Ugaid ne sikuna, Timoteo, netuenan nu en te kenà a iring ketà su netuenan nu en ke engkey ke impenurù ku wey ke ed-ul-ulaan ku wey engkey se mibpegelepan ku te egelevek. Netuenan nu en ke kedsarig ku te Eleteala, ne netuenan nu rema ke kebpenginum ku te meadsil wey ke kinepekita ku te limù dut te ruma ne menge etew wey ke kedtigker ku te merasey.

Tito 2:13

Ini rà be se ed-ul-ulaan tew te kedtahad tew ketà te meupiya ne Hewii ne ebpenerengen tew ne egkekita ta ke ed-andlag ne raman din dut te kedlived te Eleteala ne mekegehem ne si Hisu Kristu ke ebpeliyu kenitew.

Tito 3:7

Ne ketà be te tavang din kenitew impepevayà te kinepatey ni Hisus se kinemetidtu tew riyà te etuvangan din, ne nevaluy ki nikandin ne menge anak din. Tembù be ebpekehaked ki te umur ne warà edtemanan din ne ke ebpenerengen tew.

Hibruhanen 10:32

Tentenuri niyu ke hewii te behu kew pà ne mibperetiyaya ki Hisus ne nerayahan en ke itungan niyu. Su ruen merakel ne keresayan niyu, ugaid ne warà meawà ke kerinew te hinawa niyu.

Hibruhanen 10:36

Iyan ungayà se edtigker kew te kemerehenan apey niyu egketuman ke kiyug te Eleteala ne ebpeketelimà kew rut te keupiya ne impasad te Eleteala.

Hibruhanen 12:1

Ne sikitew ke edsarig te Eleteala, ne ini se keduma tew kandin kayi te ampew te dunya ne ebpekeiring te egkuya ki te ebpelelahuy. Ne ke merakel ne menge mibperetiyaya rengan se mibpesabut kenitew te egkeserihan nevenar ke Eleteala, ne iring te sikandan ke edtengteng kenitew kayi te kegkuya tew. Tembù be ed-engked kiyu en iya te piya engkey en ne ebpekeungen dut te keduma tew te Eleteala, ne ed-engked kiyu te piya engkey en ne meraat ne ulaula ne ebpengunguripen kenitew. Uya, ed-engkeran tew ke langun ne ebpekevangen kenitew su apey meabet se kebpelelahuy tew taman dut te edtemanan.

Hibruhanen 3:6

Ugaid ne si Hisu Kristu, ne sikandin ke Anak te Eleteala ne ebpengemuney dut te valey, ne mid-up-upianan din dema se kinetumana rin dut te langun ne mibpeveelan kandin te Amey rin. Ne sikitew ve ke duma ki Hisus, ne ebpekeiring kiyu te sakup te lusud te valey te Eleteala embiya mevaher se kineperetiyaya tew kandin wey kenà kiyu eduwaruwa atag te ebpenerengen tew ne impasad te Eleteala.

Hibruhanen 5:7

Gewii pà ni Hisus kayi te ampew te dunya ne miguriper se luwà din te kegkulayì din dut te pengeningeni rin diyà te Eleteala, su Eleteala rà se ebpekegaga te kebpeliyu kandin dut te kemetayen din. Ne nerineg ke pengeningeni rin te Eleteala su ke kinepeembavà din te hinawa rin wey ke kebperumaruma rin dut te kiyug te Eleteala.

Hibruhanen 6:12

Tembù be kenà kew ebpepepehul te keduma niyu te Eleteala, ugaid ne iringi niyu ke ulaula te menge etew ne mevaher se sarig dan te kedtehad dan dut te impasad te Eleteala kandan.

Hibruhanen 6:15

Ne warà medtakas si Abraham te kedtahad din dut te impasad te Eleteala kandin, tembù be netelimà din ke langun ne impasad te Eleteala kandin.

Santiago 5:7

Na menge suled ku, tigkeri niyu ke menge kemerehenan taman te kedlived te Kerenan tew. Pegitunga niyu ke etew ne ebasuk su edtigkeran din se edtahad taman te edsebpet arà se impemula rin su berepantag diyà te kandin. Edteharan din ke uran ne ebpetuvù te pinemula rin, ne edteharan din dema se kebmetesan te pinemula rin su apey rin ed-eheniyen.

1 Pedro 4:13

Ne iyan meupiya ne egkehalew ki kayi te keresayan ta te keduma ta ki Hisu Kristu su iring te ebpekeamung ki te egeram dut te ingkerasey rin. Ne embiya edtigkeran ta iring te sikandin, ne ebpekeamung ki rema te kehelawan din ketà te akir din ne hewii ne ibpekita te Eleteala ke raman dut te kinepepurù din ki Hisus.

1 Pedro 4:7

Mehaan en se kegketapus kayi te dunya, tembù be sikita ne menge etew ne iyan iya se editihel ki rut te egketuenan ta ne ibpevayà ta wey ibmeupiya te hinawa ta su apey warà ebpekealang te kebpengeningeni ta te Eleteala.

2 Pedro 1:6

su apey edtihelan te hinawa ta, abpeg ke kedtigker ta dut te keresayan. Ne kenà arà dà su igkesumpat ta te id-amin te hinawa ta te keduma te kiyug te Eleteala.

Imperayag 13:10

Ke etew ne ibpepevayà te Eleteala te egkesigkem, ne edsigkemen iya. Ne ke etew ne ibpepevayà te ebpatey te sundang, ne sundang iya se ibpatey rin. Tembù be langun tew ne sakup te Eleteala ne iyan iya se edtigker kiyu te keresayan wey idsarig ke egked-ulaula tew te Eleteala.