Ruma 11:20 - Ke meupiya ne tudtul mekeatag ki Hisu Kristu

²⁰ Ne benar ne nekesambì kew kandan. Ugaid ne iyan puunan te kinetempera te Eleteala kandan su warà dan mebperetiyaya ki Hisus, ne ke puunan te kinetuvù niyu guntaani ne ke kineperetiyaya niyu. Ugaid ne kenà niyu ve ibpendekarak, inemulà se ingati niyu nevenar ke ulaula niyu.

Ruma 11:20 ပူးပေါင်းရင်းမြစ်များ

Lucas 18:14

“Igkahi ku keniyu,” ke si Hisus, “ketà te kineulì kayi te ebpevayad te buwis ne kenè en ebpenunduhen te Eleteala ke salà din, ugaid ne kenà iring ketà te mepereyù ne Peresiyu. Su piya entei ne etew ne ebpepurùpurù te hinawa rin ne ibpevavà te eleteala, ugaid ne piya entei ne etew ne mepeembavà te hinawa rin ne ibpepurù sikandin te Eleteala.”

Nenged-ulaula 18:6

Ugaid ne guna su warà dan mebperetiyaya su edsumpalit dà kandin, ne mibpendagdag din ke lipupuk kayi te belegkas din ne tuus te ibpesabut din kandan te kenè en kilid kandin ketà te hewii ne kedtimbang te Eleteala kandan ne migkahi te, “Embiya kenà kew egkiyug ne ebpekeliyu rut te kedusa te Eleteala atag te salà niyu, ne sikiyu rà! Su kenè en kilid kediey! Su guntaani ne ebpendiyà ad te menge kenà Hudiyanen.”

Ruma 11:18

Tembù be sikiyu ne nekesambì ne ingkesumpat dut te midtamped, ne kenà niyu peleviya ke itungan niyu se egkahi te iyan kew pà lavi ne meupiya ketà te nengetamped! Su sikiyu ne subpang kew rà ne insumpat te Eleteala apey ebpeketuvù ketà. Ne kenà niyu lipati te kenà sikiyu se subpang se egenatan te kegkeuyag dut te dalid, ugaid ne ke dalid se egenatan te kegkeuyag dut te subpang ne iring te sikiyu.

Ruma 11:21

Su embiya iring ketà se midtamped te Eleteala ke tunganey ne subpang ne ke menge Hudiyanen, ne iyan kew pè be kenà tempera se mehintelunan dà ne subpang embiya ed-iring kew red kandan.

Ruma 12:16

Ne langun tew ne mibperetiyaya ki Hisu Kristu, ne iyan iya se egkeseveka ki su apey kiyu kenà ebpemekedlewanà. Ne kenà ki ebpebperayù, ne kenà tew igkeyeyai se kebpekiduma tew rut te malù mevavà keytew. Ne kenà tew ebpegitungen te iyan ki pà bereitungan kandan.

Ruma 12:3

Ne geina te ruen ketau ne imbehey kediey te Eleteala te kebpemesabut te lalag din, ne ebuyuen ku te langun niyu ne kenà niyu pegitunga te sikiyu rà se ruen gaga rin. Ugaid ne peketidtuwa niyu ke itungan niyu dut te negaga niyu, ne iyan niyu serihi ne endei rà taman te ketau ne imbehey keykew te Eleteala ketà te kedsarig niyu kandin.

Ruma 3:3

Ne benar ne ruen menge ruma rey ne Hudiyanen ne warà mebperumaruma te penduan te Eleteala. Ugaid ne kenà egketuen te wagib te kenà egkeserihan ke Eleteala te edtuman dut te impasad din dengan.

1 Kurintu 10:12

Ne engketà be ne embiya ruen etew ne iyan din egkepegitung te kenà din ed-ul-ulaan ke meraat su mevaher en se sarig din, ne iluta rin pà lavew su kalu ke ebpekevaal ded sikandin te salà.

1 Kurintu 15:1

Na menge suled ku, ebpetentenuran ku keniyu ke migkahi ku en keniyu mekeatag ki Hisu Kristu. Su arà se Meupiya ne Tudtul ne impesabut ku keniyu, ne mibperetiyaya niyu wey mid-itindehan niyu te mevaher.

1 Kurintu 16:13

Na guntaani ve, menge suled ku, ne uram kew te keduma niyu ki Hisus. Ne itindehi niyu te mevaher ke kebperetiyaya niyu ki Hisu Kristu. Kenà niyu igkeyeyai ne ibpekita niyu ke keduma niyu te kiyug te Eleteala, ne kenà niyu igkeandek te keduma kandin misan egkerehenan kew.

2 Kurintu 1:24

Ne kenà dey iyan itungan ne ebayvayaan dey sikiyu ke engkey se kebperetiyaya niyu mekeatag ki Hisu Kristu, su netuenan dey te nekesuhat ke kebperetiyaya niyu. Ugaid ne iyan dey kiyug ne edtavang key keniyu su apey ebpekeiseg ke kegkehalew niyu te keduma ki Hisu Kristu.

2 Kurintu 10:5

Su ini se ebmeteremen dey ne ibpeketalew rey ketà te tarù ne kebpekidlawan te menge mepereyù ne etew ne kenà eduma te benar ne penduan te Eleteala. Ne edtelawen dey ke langun ne ibpeitindeg dan ne itungan ne ebelavag dut te kegkesebuti ran mekeatag te Eleteala. Ketà be ne edtelawen dey ke kebpekidlawan dan su apey ran egkepeneheewit te kebperetiyaya ki Hisu Kristu.

Pilipus 2:12

Engketà be menge suled ne igkelimù ku, iring dut te kebperumaruma ni Hisu Kristu te Amey rin ne Eleteala ne ebperumaruma kiyu rema. Gewii te keniyan e pà te keniyu ne mibperumaruma kew rut te penurù ku keniyu, ne wey kew pè be maa kenà mebperumaruma dut te penurù ku ke warà ad. Ibpereyun niyu te ed-ulaula ke kedtuman niyu te kiyug te Eleteala keniyu, ne arà se kegkepasad te kebperetiyaya niyu. Ne ul-ulaa niyu ini egenat te dekelà ne adat niyu te Eleteala wey ke kegkeandek niyu te edsurang te lalag din.

Kulasi 2:7

Embiya tidtu se sarig niyu kandin ne iyan pegingawà se ebpekeiring ka te kayu ne ebpekedalid en ne meupiya se kegueyhuey rin. Tentenuri niyu ke impesabut keniyu mekeatag kandin su apey ebpekedalid ke kedsarig niyu ne ed-iseg te meupiya. Ne layun kew peselamat te Eleteala dut te langun ne ibehey rin keniyu.

2 Tiselunika 2:4

Ini se etew ne ketà te kedlepew rin ne igkeepes din ke Eleteala wey langun ne sakup te Eleteala wey misan engkey ne ed-erapen dut te menge etew te Eleteala. Su egkahi te sikandin ne iyan pà mepurù dut te langun ne ed-erapen. Ne misan diyà te Nekebpuru ne Valey te Eleteala riyà te Hirusalim ne ebpinuu ketà ne egkahi te sikandin kun ke tidtu ne Eleteala.

1 Timoteo 6:17

Na Timoteo, kehiyi nu ke menge etew ne kewasa te kenà dan ibpereyùdeyù, ne kenà dan serihi ke kekewesai ran su ini ne edsahad dà. Ugaid ne iyan dan serihi ne Eleteala su ebehayan kiyu nikandin te pengelimuan din ne sesangan apey ki egkehalew.

Hibruhanen 3:12

Engketà be menge suled ku, uram-uram kew nevenar su apey warà seveka keniyu ne eduma te meraatey ne itungan ne ed-awà se peretiyaya rin te Eleteala, su arà se kebpekepekeriyù tew rut te Eleteala ne warà kemetayen din.

Hibruhanen 3:19

Engketà be ne netuenan tew se ayan ne menge etew rengan ne warà en iya mekelusud ketà te inged ne impenehana te Eleteala kandan su warà dan mebperetiyaya kandin.

Hibruhanen 4:11

Engketà be ne ebpenemaran tew su apey kiyu ebpekelusud ketà te inged ne ebpeimelayan ne impasad te Eleteala. Ne ed-uram kiyu su apey kenà kiyu mekeiring dut te menge etew rengan ne warà dan mekelusud su warà dan peretiyayaa ke migkahi te Eleteala kandan.

Hibruhanen 4:6

Su rengan ne ke neuna ne menge etew ne nekerineg dut te Meupiya ne Tudtul mekeatag ketà te inged ne ebpeimelayan, ne warà dan mekelusud su warà den ma mebperetiyaya. Ugaid ne ruen ded lavew ketà se ebpekelusud te inged ne ebpeimelayan ne impenehana rin.

Santiago 2:19

Embiya egkahi ka te mibperetiyaya ke en te sebseveka rà ke Eleteala ne meupiya arà, ugaid ne kunaan nu ke kebperetiyaya nu se ebpekegaga. Misan ke busew ne ebperetiyaya ne egkerkeren dan te kegkeandek dan kandin, su netuenan dan se edusaan dan pà te Eleteala.

Santiago 4:6

Ugaid ne ke kedtavang te Eleteala kenitew ne mevaher pà su apey ki kenà ebpekeruma dut te meraat ne kiyug te lawa tew. Su ruen dema ini se lalag din ne impesurat din ne egkahi te, “Egkunteraan te Eleteala ke etew ne mepereyù, ugaid ne edtevangan din ke etew ne ebpeembavà te hinawa rin.”

1 Pedro 1:17

Ne embiya egkehiyen ta ne Eleteala ke Amey tew ketà te kebpengeningeni tew ne iyan iya se meilut se ked-edati ta kandin taman te ini ki pà te ampew te dunya. Su metidtu se kegkukum din, ne edtuntul te langun ne ed-ul-ulaan tew ne warà ibpelabi rin.

1 Pedro 5:12

Ini se mevavà ne surat ku riyà te keniyu ne impesurat ku ki Silvano. Ruma ta sikandin te mibperetiyaya ki Hisus ne dekelà se kedsarig ku kandin. Iyan ku kedsurat keniyu su apey ebeg-eten ku ke kebperetiyaya niyu wey apey ibpesabut ku keniyu te benar ini se impenurù ku keniyu mekeatag te melimù ne kedtavang te Eleteala keniyu. Tembù be iyan se idsarig niyu iya ke hinawa niyu ketà se melimù ne kedtavang din keniyu.

1 Pedro 5:9

Tembù be ed-iluten ta ke kebperetiyaya ta te Eleteala su apey ebmevaher ke hinawa ta te ed-atu ki Setanas. Ne netuenan ta te kenà sikami rà se egeram te keresayan su langun ne menge ruma ta ne mibperetiyaya te piya endei ne inged.

Imperayag 18:7

Su mibpereyùdeyù sikandin ne midtuman dut te meraat ne kiyug din, ne arà rema se kevehat dut te keresayan wey kemutuwan ne ebpekeuma kandin. Su migkahi arà se meraat ne meritan ne in-upama te arà ne inged, ke sikandin te, ‘Iring a te bai su warè en egkepemengà ku. Kenà a balu, tembù be warè en keresayan ne ebpekeuma kayi te kedì!’

Imperayag 3:17

Egkahi kew te, “Kewasa ki en ne meupiya ini se kebpekesavuk ta ne warè en kurang ta te misan engkey.” Ugaid ne warà niyu rà metueni te mekeyruwiru kew ves. Su iring kew te menge etew ne nepisek, ne egkeayuayu wey etew ne warà belegkas din.