Ruma 1:1 - Ke meupiya ne tudtul mekeatag ki Hisu Kristu

¹ Siaken ini se edsurat keniyu ne si Pablo, ne sugsuhuen ni Hisu Kristu. Ne nepemilì a te Eleteala ne kedserihan din ne insuhù din kediey te ibpesabut ku ke Meupiya ne Tudtul ne riyà ebpuun te kandin.

Ruma 1:1 ပူးပေါင်းရင်းမြစ်များ

Marcos 1:14

Guna ve su impevilanggù en si Juan ni Hirudis, ke ratù dut te inged din, ne midlived en si Hisus diyà te lusud te inged ne Geliliya se ebpesabut dut te Meupiya ne Tudtul te Eleteala.

Juan 12:26

Su ke etew ne egkiyug ne eduma te penurù ku,” ke si Hisus, “ne iyan din ibpeuna te hinawa rin te ked-iniyug din te kandin ne kiyug su apey mekeruma kedì, ne piya endei a ne ketà dema ke edsugsuhuen ku. Ne ke etew ne edtuman te penurù ku, ne egkereyù te Amey ku ne Eleteala.”

Juan 15:15

Kenà en be edsugsuhuen ke id-umew ku keniyu su kenà egketuenan dut te edsugsuhuen ke ebeelan dut te edsuhùsuhù kandin. Ugaid ne iyan ku en mulà id-umew keniyu ne menge sepekat ku su langun te nerineg ku riyà te Amey ku ne Eleteala ne impayag ku keniyu.

Juan 15:20

Tentenuri niyu iya ke migkahi ku te, ‘Warà uripen ne iyan en mepurù dut te ebpengunguripen kandin,’ ” ke si Hisus. “Ne embiya midrasey a ran, ne iyan kew pè be kenà resaya ran. Embiya midtuman dan ke penurù ku, ne edtuman dan dema dut te penurù niyu.

Nenged-ulaula 13:9

Ne si Saulo, ne ed-ingaranan dema ki Pablo, ne midlumunan dut te Kedesenan ne Ebpetuntul te Menusiyà ne midtengtengan din arà se metau te malik mata

Nenged-ulaula 20:24

Ugaid ne kenà ku en egkenehunan ini se umur ku su apey ku egkepasad ini se helevek ne impehelevek kedì te Kerenan tew ne si Hisus ne ini se kebpesabut dut te Meupiya ne Tudtul mekeatag te kegkeyru keytew te Eleteala.

Nenged-ulaula 21:40

Ne midtuhut kandin ini se mepurù te menge sundaru. Mid-itindeg ketà si Pablo kayi te eheran te baher ne mid-uyew te belad din te mebpeeneng-eneng ke menge etew. Ne guna su neengked dan se mehurub, ne midlalag si Pablo kandan te kinehiyan te Hibruhanen.

Nenged-ulaula 22:21

Ugaid ne migkahi ke Kerenan tew te, ‘Genat ke en su ibpependiyà ku sikew te meriyù ne menge inged su ibpesabut nu mekeatag kediey diyà te menge etew ne kenà Hudiyanen.’ ”

Nenged-ulaula 22:7

Nepiley a ne ruen suwara ne nerineg ku se egkahi te, ‘Ey, Saulo, Saulo, meambe ke ebpekesekitan a nu?’

Nenged-ulaula 26:1

Ne migkahi si Egeripa riyà te ki Pablo te, “Egkepakey en ne ibpesabut nu kenami ke engkey se idtindeg nu ne kewagib te in-isuhat dan keykew.” Ne migkayew si Pablo te belad din su edlalag en ne midrudsuan din te ed-lalag ne ed-itindeg te kewagib din se egkahi te,

Nenged-ulaula 26:14

Ne ketà ne nepiley key langun ne ruen suwara ne nerineg ku ne edlalag te kinehiyan ne Hibruhanen ne egkahi te, ‘Ey, Saulo, Saulo, meambe ke ebpekesekitan a niyu? Su ini se mid-ulaula nu ne ed-atu kediey, ne sikuna red se egkesekitan.’

Nenged-ulaula 27:23

Su geina te merukilem ne ini se Eleteala ne kemuney kediey ne iyan ku ebpengerapen, ne mibpekitakita kedì ke suluhuen din

Nenged-ulaula 9:15

“Ipanew ka,” ke se Kerenan, “su mibpemilì ku en sikandin ne egelevek kediey. Su sikandin se ebpemenudtul mekeatag kediey riyà te menge etew ne kenà Hudiyanen wey ke menge datù dan abpeg dut ne menge Hudiyanen.

Ruma 1:16

Ne kenà ku en iya igkeyeyai te ebpemenudtul arà, su netuenan ku te misan engkey en ne etew ne ebperetiyaya, egenat te Hudiyanen abpeg ke kenà Hudiyanen, ne ruen gehem te Eleteala te ebpekepeliyu sikandin te kedusa te salà din.

Ruma 1:5

Ibpepevayà ki Hisu Kristu ne midtevangan a te Eleteala te nevaluy a ne kedserihan ni Hisus te ebpesabut mekeatag kandin diyà te langun ne menge etew. Su egkiyuhan din te langun ne menge etew ne ebpekeperetiyaya ki Hisus ne eduma kandin. Ne kayi te keduma ran kandin ne sikandin se edeyuen diyà te kandan.

Ruma 1:9

Su netuenan te Eleteala ne benar ini se egkehiyen ku te uman a ebpengeningeni ne idragkes ku sikiyu. Ne ini ke Eleteala ne id-amin ku ke hinawa ku te egelevek kandin te kebpemesabut ku rut te Meupiya ne Tudtul mekeatag te Anak din.

Ruma 11:13

Ne sikiyu ini se menge etew ne kenà menge Hudiyanen ne ruen egkehiyen ku keniyu. Netuenan niyu ne midsuhù a te Eleteala ne kedserihan din te ebpemenudtul ke Meupiya ne Tudtul keniyan te keniyu, ne edtumanen ku ve ini te mevaher se insuhù din kediey.

Ruma 15:16

su mibeelan a nikandin ne sugsuhuen ni Hisu Kristu te egelevek keniyan te keniyu te menge etew ne kenà Hudiyanen su ebpesabut te Meupiya ne Tudtul ne egenat te Eleteala. Ne kayi te kegelevek ku ne iring a te terebpelengesa ne edrenà te ibehey diyà te Eleteala. Su embiya ruen ebperetiyaya ne sikandan se egketelimà te Eleteala ne iring sikandan dut te idrenà ku ne ibehey diyà te Eletela su midtilak en ke hinawa ran dut te Kedesenan ne Ebpetuntul te Menusiyà.

Ruma 15:29

Ne netuenan ku te embiya ebpekeuma ad keniyan te keniyu, ne dekelà se kedtavang kenitew ni Hisu Kristu su apey ebmevag-et ke kedsarig tew.

Ruma 16:18

Su ke menge etew ne iring kayi ne kenà iyan dan edumaan si Hisu Kristu ke Kerenan tew, ugaid ne iyan den dà edumaan ne ke kiyug diyà te hinawa ran. Metau ran ne edlalag wey metau ran ne edlana dut te hinawa te menge etew su apey ran egkeekali ke menge etew ne kenà pà metau dut te benar ne penurù.

Ruma 16:25

Edeyù kiyu te Eleteala! Su sikandin dà ke ebpekevehey te kebmetihel te kebperetiyaya niyu sabap dut te Meupiya ne Tudtul mekeatag ki Hisu Kristu ne impemenudtul ku wey sabap dut te benar ne ne in-eles te neuhet dà dengan ugaid ne impayag en guntaani.

1 Kurintu 1:1

Siaken ini si Pablo se edsurat kayi diyà te menge etew te Eleteala te inged ne Kurintu egenat te kebperetiyaya ran ki Hisu Kristu. Ne si Sutinis ke suled tew te ebperetiyaya se ed-amung kediey te edsurat kayi. Senge etew a ne kedserihan ni Hisu Kristu ne nepemilì din su arà ke kiyug te Eleteala. Ini se surat ku keniyan te keniyu ne nepemilì te Eleteala ne egkevaluy ne menge etew rin egenat te mibpekidseveka ke hinawa niyu ki Hisu Kristu. Uya, nepemilì kew nikandin ne mibmetilaken ke hinawa niyu su apey sikiyu ne menge etew rin ne edtuman te kiyug din. Ne kenà sikiyu rà se nepemilì din su langun ne etew ne mibperetiyaya ki Hisu Kristu ke Kerenan tew, misan endei ran kayi te ampew te dunya, su si Hisus ke Kerenan tew te langun ne ebpengarap kandin.

1 Kurintu 9:1

Su siaken ne egkepakey ne ebpemilì a ke engkey se egeleveken ku su kedserihan a ni Hisu Kristu ne nekita ku ke Kerenan tew si Hisu Kristu, ne ke kebperetiyaya niyu kandin ne arà imbe ke helevek ku su sabap dut te kebpenurù ku mekeatag kandin.

2 Kurintu 1:1

Siaken si Pablo ki Timoteo ke suled tew te kebperetiyaya se edsurat ini. Edsuratan ku sikiyu ke langun ne mibperetiyaya keniyan te inged ne Kurintu wey riyà te langun niyu ne mibperetiyaya diyà te ruma ne inged ketà te lusud te Gerisya. Su egenat te kiyug te Eleteala ne nepemilì a ne kedserihan ni Hisu Kristu.

2 Kurintu 11:5

Ne ini se uvag kun ne menge kedserihan ni Hisu Kristu ne mibpengkeniyan ne kunaan niyu ke utew ran en ne nekelavew, ugaid ne netuenan ku se kenà dan ebpekelavew kedì.

2 Kurintu 11:7

Ruen id-insà ku keniyu. Menu iyan niyu ve nepegitung ne nekesalà a su geina te warà a mebuyù te sukey ku ketà te impemesabut ku ke Meupiya ne Tudtul mekeatag te Eleteala? Iyan ku kebpeembavà te iring ketà su apey kew egketevangi kayi te ibpenurù ku ne kenà kew egkepesangan te edsukey kedì.

2 Kurintu 12:11

Ne iring a te egkevengùbengù su ingkahi ku keniyu ke kedì ne keeetawi, ugaid ne sikiyu se puunan te kinepekekahi ku kayi. Su iyan dait ne sikiyu perem se edeyù kediey diyà te etuvangan ketà te menge etew ne edlalag te meraatey mekeatag kedì. Su misan ruen keluvey ku, ne ayan se menge etew ne uvag kun te kedserihan ni Hisu Kristu ne kenà dan ded ebpekelavew kedì.

2 Kurintu 2:12

Na guna su nekeuma a te kinependiyà ku te inged ne Teruwas te kebpemesabut ku rut te Meupiya ne Tudtul mekeatag ki Hisus, ne nekita ku se ruen en ralan ne neveelan te Eleteala ketà te kebpevengew ku rut te impehelevek din kedì.

2 Kurintu 4:5

Kenà dey iyan ibpesabut ne mekeatag kenami, ugaid ne mekeatag ki Hisu Kristu su sikandin ke mibpemilì te Eleteala ne egkamal te langun. Ne sikami ne iring te sugsuhuen te kedtavang dey keniyu kayi te kedtuman dey te idsuhù din kenami.

Gelasiya 1:1

Siaken ini se edsurat ne si Pablo. Ne ibpeewit ku ini riyà te menge etew ne mibperetiyaya en ki Hisus ne egkevurun diyà te menge valey te Eleteala diyà te inged ne Gelasiya. Langun dey kayi ne mibperetiyaya en ki Hisus ne ebpenginginsà te sikiyu. Senge etew a ne kedserihan ni Hisu Kristu, ugaid ne ini se kinesuhù kedì ne kenà kiyug dà te etew etawa insuhù dan kedì su suhù a ni Hisu Kristu wey ke Amey ne mibanew ki Hisus dut te kinepatey rin.

Ipisu 1:1

Siaken ini se edsurat ne si Pablo. Ne ibpeewit ku ini riyà te langun niyu ne an te inged ne Ipisu ne mibpesakup te Eleteala ne edlaus te kebperetiyaya rin. Senge etew a ne kedserihan ni Hisu Kristu, ne warà duma ne puunan te kedserihi rin kedì ke kenà ke kiyug te Eleteala.

Ipisu 1:13

Ne sikiyu rema keniyan ne kenà Hudiyanen ne nekeamung ded ketà te itungan din su nerineg niyu rà ke benar ne penurù, ini se Meupiya ne Tudtul mekeatag te kebpekeliyu rut te salà tew, ne mibperetiyaya kew en ki Hisu Kristu. Ketà be ne imbehey keniyu dut te Eleteala ke Kedesenan ne Ebpetuntul te Menusiyà iring te impasad din, su tuus ini te sikiyu rema ne sakup din.

Ipisu 4:11

Su sikandin se mibehey te ketau te langun ne menge etew rin su apey iyan dan ed-ul-ulaan ne ke kiyug din. Ruen mibehayan din te helevek ne egkevaluy ne menge kedserihan din, ruma ne mibaluy rin ne ebpelambas te Lalag te Eleteala. Ruen ruma ne mibehayan din te ketau te ebpesabut dut te Meupiya ne Tudtul mekeatag ki Hisu Kristu. Ne ruen duma rema ne mibehayan din te ketau te ebpeneheewit te menge mibperetiyaya en wey ebpemenurù kandan.

Pilipus 1:1

Sikami ne si Pablo ki Timoteo ne menge sugsuhuen ni Hisu Kristu se edsurat ini riyà te keniyu te menge ebpeneheewit dut te menge mibperetiyaya keniyan te inged te Pilipus abpeg ke ed-amung kandan wey ke langun niyu ne mibpesakup en te Eleteala sabap te mibperetiyaya kew ki Hisu Kristu.

Pilipus 2:11

Ke langun ne edsamasama egkahi te si Hisu Kristu ke Kerenan dut te langun ne ketà ne egkereyù dan ke Eleteala ne Amey tew.

Kulasi 1:1

Siaken ini se edsurat ne si Pablo. Senge etew a ne midsuhù ni Hisu Kristu ne kedserihan din, ne ini se kinesuhù din kedì ne kiyug te Eleteala. Edsurat key ki Timoteo ini se suled tew te ebperetiyaya ki Hisus

Kulasi 1:25

Ne arà be se kinevehey te Eleteala kayi te gelevek ku su ebpeketavang dut te langun ne menge mibperetiyaya, labi en ke sikiyu ne kenà Hudiyanen. Su ruen kiyug din ne ebpesabut a keniyu te langun ne nekahi rin diyà te Lalag din.

1 Tiselunika 2:2

Ne netuenan niyu rema ke egketemanan dey diyà te inged ne Pilipus te warà key pà mekepengkeniyan te keniyu, su mibpekesekitan key nikandan wey mibpegkeyà key. Ugaid ne misan iring ketà ne ke Eleteala se midtavang kenami, su mibag-et din ke hinawa rey te ebpengkeniyan ne ebpesabut keniyu dut te Meupiya ne Tudtul ne riyà ebpuun te kandin.

1 Tiselunika 2:8

Ne geina te dekelà se limù dey keniyu ne kenà ke Meupiya ne Tudtul rà ne egenat te Eleteala se impesabut dey, su nepenehana rey te ebpatey su apey niyu egketueni mekeatag te Eleteala. Su dekelà dey sikiyu te hinawa rey.

1 Tiselunika 2:9

Ne egketenuran niyu red buwa, menge suled, ke ralan te kebpementiyari rey su merukilem meandew ne migelevek key su apey warà keniyu ebpekevayad te kegkeuyag dey te kebpemesabut dey te Meupiya ne Tudtul ne riyà egenat te Eleteala.

1 Timoteo 1:1

Siaken ini se edsurat ne si Pablo. Senge etew a ne kedserihan ni Hisu Kristu igenat dut te suhù te Eleteala ne ebpeliyu keytew wey si Hisu Kristu ke ebpenerengen tew.

1 Timoteo 2:7

Tembù be mibpemilì a ni Hisu Kristu ne kedserihan din ne ibpemenudtul ini se tidtu ne lalag mekeatag kandin diyà te menge etew ne kenà Hudiyanen apey ran ebpekeperetiyaya. Ini ve iya se egkehiyen ku ne kenè en be iya ini egkedtarù su benar!

2 Timoteo 1:11

Ne midtendù a te Eleteala ne kedserihan ni Hisu Kristu te ebpemenudtul kayi te Meupiya ne Tudtul mekeatag kandin wey ibpemesabut ini.

Tito 1:1

Siaken ini se edsurat ne si Pablo. Sugsuhuen a te Eleteala wey senge etew ne kedserihan ni Hisu Kristu. Nepemilì a ne impeewit ne edtavang te menge etew ne mibpemilì te Eleteala apey egkevaget ke sarig dan wey apey ebpekeiseg ke nesebutan dan mekeatag te tidtu ne penduan dut te peretiyaya tew.

Hibruhanen 5:4

Warà etew ne ebpekepemilì te kandin ne hinawa te kegkevehayi te ketengdanen ne Mepurù te Terebpelengesa, su Eleteala rà ke ebpekepemilì ketà te etew iring dut te kinepemilia rin ki Arun ke neuna ne Mepurù te Terebpelengesa rengan.

Hibruhanen 7:26

Engketà be ne si Hisus ke Mepurù ne Terebpelengesa tew riyà te etuvangan te Eleteala ne sikandin se ebpekevehey kenitew te langun ne kurang tew. Metidtu nevenar sikandin, ne warà salà din misan deisek dà ne meraat ne ulaula. Nekebira nevenar sikandin dut te langun tew su belisalà ki. Ne impepurù sikandin te Eleteala dut te langun taman misan diyà te langit.

Santiago 1:1

Siaken ini se edsurat ne si Santiago. Sugsuhuen a te Eleteala wey ke Kerenan tew ne si Hisu Kristu. Edsuratan ku sikiyu, ke langun ne menge Hudiyanen ne mibperetiyaya ki Hisu Kristu ne nekesivurak kayi te ampew te dunya ne ebpenginginsà a keniyu.

1 Pedro 4:17

Su iyan kedtuhut te Eleteala ne egkerasey ki su ini en ke hewii ne edrudsù ke Eleteala te egkukum dut te menge etew ne iyan ed-unaan ke menge etew ne eduma kandin. Ne embiya iring ketà se egketemanan te sikami ne menge anak din ne iyan pè be kenà merasey ke egketemanan dut te menge etew ne kenà ebperetiyaya te Meupiya ne Tudtul te Eleteala.

2 Pedro 1:1

Siaken si Simon Pedro ne edsurat kayi. Sugsuhuen a ni Hisu Kristu wey epustul din dema ne iyan din meana ne kedserihan a nikandin. Edsurat e red maa dut te sikiyu ne menge ruma ta te mibperetiyaya ki Hisus. Ne ini se kebperetiyaya rut te langun tew ne neked-iring su ebpuun ded langun te Eleteala wey si Hisu Kristu ne mibpeliyu keyta. Su sikandin, ne iyan din ed-ul-ulaan ne metidtu, ne warà misan engkey ne etew ne ibpelavi rin.

Hudas 1:1

Siaken ini se edsurat ne si Hudas ne suled ni Santiago wey sugsuhuen ni Hisu Kristu. Ne edsuratan ku sikiyu ne mibpemilì te Eleteala ne Amey tew ne nevaluy ne menge etew rin ne igkelimù din, ne ebentayan dema ni Hisu Kristu.

Imperayag 1:1

Ini se insurat ne imperayag ni Hisu Kristu. Imbehey ini kandin dut te Eleteala su apey igkepesabut diyà te menge mibperetiyaya te Eleteala ke engkey se mehaan ne egkenged-ulaula. Impayag ini ni Hisu Kristu diyà te ki Juan ne sugsuhuen din ibpepevayà te suluhuen din ne midsuhù din diyà te kandin.

Imperayag 22:6

Ketà ne migkahi ke suluhuen te Eleteala kediey, ke sikandin te, “Langun ne menge lalag ne nerineg nu ne benar iya ne egketuman en. Su ke Kerenan ne Eleteala ne mibpelumunan din dut te Kedesenan ne Ebpetuntul te Menusiyà arà se menge mibpelambas te Lalag din dengan ne sikandin se midsuhù te suluhuen din kayi te kediey su apey a ebpesabut dut te langun ne menge sakup din ke engkey se mehaan en ne egked-ulaula.”

Imperayag 22:9

Ugaid ne midawey a nikandin se egkahi te, “Kenà ka ebpengarap kediey. Su siaken ne seveka ne sugsuhuen te Eleteala iring keykew wey ke menge ruma nu ne ebpelambas te Lalag te Eleteala wey iring dut te langun ne eduma rut te insurat kayi te ini se riberù. Iyan dait ne ebpengerapan nu ne ke Eleteala rà.”