Pilipus 4:8 - Ke meupiya ne tudtul mekeatag ki Hisu Kristu

⁸ Na ini rè be, menge suled, se mewri ne igkahi ku keniyu. Iyan niyu pegpegitunga ke menge ulaula ne meupiya ne dait ne egkereyù, ke menge ulaula ne benar, ke menge ulaula ne ruen atag din, ke menge ulaula ne metidtu, ke menge ulaula ne metilak su warà amut din ne meredsik, ke menge ulaula ne igkeeyami wey menge ulaula ne egkeedatan su metinevangen.

Pilipus 4:8 ပူးပေါင်းရင်းမြစ်များ

Mateo 22:16

Ne ruen en midsuhù dan diyà te ki Hisus ne menge edumdumaan dan wey menge sakup ni Hirudis. “Meyterù,” ke sikandan, “netuenan dey te edlalag ka te benar. Ne ibpenurù nu ke benar mekeatag te kiyug te Eleteala rut te menge etew. Ne kenà ka egkepeneheewit dut te lalag te menge etew su warà etew ne ebpelebiyen nu.

Marcos 6:20

Su neandek si Hirudis ki Juan su netuenan din ne metidtu sikandin ne iyan ebpelupandù kandin ne Eleteala. Tembù be kenà din ebpeimetayan si Juan. Ne ingkesuati rin te ebpemineg ke penurù ni Juan misan ebpekevehey te kemutuwan te hinawa rin.

Lucas 16:15

Ne migkahi si Hisus kandan te, “Sikiyu ne engkungkun ne menge metidtu kew kayi te sineruwan te menge etew, ugaid ne netuenan te Eleteala ke netahù te hinawa niyu. Su ini se rekelà te hinawa te menge etew ne warà pantag din diyà te etuvangan te Eleteala.

Lucas 2:25

Duen senge etew ne meama ne ed-ubpà ketà te Hirusalim ne ed-ingaranan ki Simeon. Metidtu se ulaula rin wey in-amin din ke hinawa rin te egelevek te Eleteala. Ne ebpemematì sikandin ke keenu ibpeliyu te Eleteala ke menge etew rin ne menge kevuwaran ni Israyil. Ne ke Kedesenan ne Ebpetuntul ne Menusiyà ne midlumun en ki Simeon.

Lucas 23:50

Duen senge etew ketà ne ed-ingaranan ki Jose ne riyà ebpuun te inged ne Eremetiya lusud te Hudiya. Meupiya ne etew sikandin wey metidtu se ulaula rin. Senge etew sikandin dut te menge Hudiyanen ne edtahad dut te kebpekeuma te Edetuan te Eleteala kayi te ampew te dunya. Senge etew rema sikandin dut te menge egkeunutan te Hudiyanen te Perekukum, ugaid ne warà meeyuni sikandin dut te kineimasad en ki Hisus.

Juan 7:18

Su ke etew ne ebpenurù te kandin dà dèduen ne hinawa, ne ebpemengà dà te kegkevantug din. Ugaid ne ke etew ne iyan din ebpemengaan se kegkevantug dut te midsuhù kandin, ne egkeserihan ke lalag din su kenà tarù ini se ibpenurù din.

Nenged-ulaula 10:22

Midtavak dan te, “Impepengkayi key rut te Kepitan ne si Cornelio. Metidtu ne etew sikandin ne ebpengarap te Eleteala wey ed-edatan sikandin dut te langun ne menge Hudiyanen. Ne ruen suluhuen te Eleteala ne migkahi kandin te ibpeangey ka, Simon Pedro, su apey mekerineg sikandin dut te ibpesabut nu.”

Nenged-ulaula 22:12

“Ne rutun te inged ne Demasku ne ruen etew ne ed-ingaranan ki Ananias. Ne meperumaruma sikandin te menge penduan tew wey ed-edatan te langun ne menge Hudiyanen ketà.

Nenged-ulaula 6:3

Tembù be menge suled,” ke sikandan, “pemilì kew te pitu ne etew kayi te keniyu, ke etew ne midlumunan dut te Kedesenan ne Ebpetuntul te Menusiyà wey ruen ketau rin. Ne ini ne helevek ne idsarig dey riyà te kandan.

Ruma 13:13

Uya, ed-upianan ke menge ulaula tew su ini ke dait ne ed-ul-ulaan dut te menge etew ne ed-ubpà te kerayahan. Ne kenà ki en ebpemekiduma dut te kevurunan te menge etew ne ebpengasak te temperasà wey ebpenginum te ebpeketevereg, ne kenà ki ebpengingniyug etawa ed-ulaula te misan engkey en ne mekeyeyà ne kenà ki ebaal te kewahaan etawa egkeima.

Ruma 13:3

Su ke menge etew ne iyan dan ed-ul-ulaan ne metidtu, ne kenà dan egkeandek dut te egkamal. Ugaid ke menge etew ne ed-ulaula te meraat, ne dait ne egkeandek dan. Ne embiya kenà ki egkiyug ne egkeandek dut te menge egkamal, ne iyan tew ed-ul-ulaan ke metidtu ne ketà ne egkereyù ki nikandan.

Ruma 14:18

Su embiya iring ketà se kegkerumai tew ki Hisu Kristu ne ebpekesuhat ki te hinawa te Eleteala, ne egkesuatan dema rut te menge ruma tew ke menge ulaula tew.

Ruma 2:29

Ugaid ne iyan tidtu ne Hudiyanen diyà te etuvangan te Eleteala ne ke etew ne eduma te insuhù din ne ebpuun te lunsey te hinawa rin. Su riyà te etuvangan te Eleteala ne ke benar ne egkeetusan ne kenà ketà dà te ebpelian ke lawa te etew iring te insurat te penduan, ugaid ne ke kebmetilak te hinawa te menge etew ne riyà ebpuun dut te Kedesenan ne Ebpetuntul te Menusiyà. Ke etew ne iring kayi, ne kenà iyan edeyù ne etew, ugaid ne iyan edeyù kandin ne ke Eleteala.

1 Kurintu 4:5

Engketà be ne kenà kew edsawey te ruma niyu su warà pà mekeuma ke hewii te kegkukum. Ne ketà te hewii ne edlived si Hisu Kristu ne sikandin se ebpayag te langun ne ulaula te menge etew ne in-eles dan te merusirem. Ne ibpekita rin dema ke nekeeles ne itungan te menge etew ne warà pà metueni, ne ketà be ne egketuenan te uman senge etew ke embiya egkereyù be sikandin te Eleteala etawa kenà.

2 Kurintu 13:7

Ne ibpengeningeni ku riyà te Eleteala te warà meraat ne ed-ul-ulaan niyu. Kenà be iyan ku kebpengeningeni ini keniyu su apey metueni te menge etew te edtumanen niyu ke impenurù ku keniyu. Su kemenu ve ke kenà niyu idtahù te hinawa te siaken iya ne kedserihan ni Hisu Kristu, asal su iyan niyu ed-ul-ulaan ke endei se metidtu.

2 Kurintu 6:8

Edlaus key te egelevek te Eleteala misan ed-edatan key etawa ebpegkeyaan key, misan edeyuen key etawa edsudian key. Ne misan ruen egkahi te teruen key, ne iyan benar ini se ibpemesabut dey.

2 Kurintu 8:18

Ne ibperuma rey kandin ini se senge etew te suled tew ne menge mibperetiyaya ne ed-edatan nevenar dut te langun ne mibperetiyaya su sabap dut te kebpemesabut din dut te Meupiya ne Tudtul.

2 Kurintu 8:21

Su kiyug dey ne ini se ebeelan dey ne metidtu riyà te etuvangan te Eleteala, ne kenà sikandin dà su egkekita rema te menge etew se metidtu ke langun ne ebeelan dey.

Gelasiya 5:22

Melemu tew rema ne egkekilala ke ulaula te etew ne egkepeneheewit dut te Kedesenan ne Ebpetuntul te Menusiyà. Su ke etew ne egkepeneheewit te Kedesenan ne Ebpetuntul te Menusiyà ne melimù te ruma rin, mehalew sikandin, melintad se hinawa rin, metigker te ruma rin, metiyakapen te ruma rin, metulanged te ruma rin, egkeserihan te ruma ne etew,

Ipisu 4:25

Tembù be kenà kew edtarùtarù. Ne iyan niyu rà kehiya te ruma niyu ne ke benar su langun tew te mibperetiyaya en ne nekeamung dut te lawa ni Hisus.

Ipisu 5:9

Su embiya nereyahan en ke itungan niyu, ne egkekita kayi te ulaula niyu ke langun ne meupiya wey ketidtu wey arà se benar.

Ipisu 6:14

Ketà be ne layun kew ebpenehana. Iring te sundaru ne insebitan din ke adir te ebpekibunù, ne iyan niyu sebitan ne layun niyu edumai ke benar. Ne ke ed-ul-ulaan niyu ne metidtu ne iyan iring te limbutung ne id-alang te kumeng niyu.

Pilipus 3:1

Na menge suled, ruen pà ebpetentenuran ku keniyu, layun kew kehalew te mibpekidseveka kew en ki Hisu Kristu ke Kerenan tew. Kenà ku igkebungas te misan egkesulit ku en ke neuna ne lalag ku keniyu su embiya edumaan niyu ini ne baag keniyu ne kenà kew egkeekalan.

Kulasi 4:5

Na up-upiya kew te ulaula niyu keniyan te menge etew ne warà pà mibperetiyaya ki Hisus, kenà kew alang-alang se ebpemenudtul kandan dut te Meupiya ne Tudtul.

1 Tiselunika 4:12

Su embiya ini se ed-ul-ulaan niyu ne kenà kew ebpekevuyù te igkeuyag niyu diyà te menge ruma niyu, ne egkereyù kew rut te menge etew ne warà pà mibperetiyaya.

1 Timoteo 2:2

Ibpengeningeni tew te Eleteala ke menge mepurù ne ebayàbayà kenitew wey langun ne menge ruma ran ne ruen gaga ran te ed-ewit kenitew. Ibpengeningeni tew te Eleteala sikandan apey meupiya se ked-ewit dan keytew su apey ebmelinandang se ketemanan tew wey apey ruen kesig tew te eduma te Eleteala wey ed-ulaula te metidtu.

1 Timoteo 3:11

Engketà ded ke menge esawa ran, iyan din kemeyidan ne ed-ulaula ran te meupiya su apey ran egkeedati, ne kenà dan serupeten. Ne kenà dema mekalas se kebpenunuen din te keuyahan. Ne ebpengeserihan te piya engkey en ne ed-ul-ulaan dan.

1 Timoteo 3:4

Iyan din kemeyidan ne egkeveyveyaan din ke sikandan ne telteleanak, wey ke menge anak din ne meperumaruma su meadat kandin.

1 Timoteo 4:12

Na Timoteo, kenà nu idluhut se kedsudian ka misan engkeniyan te menguwed ke pà, ugaid ne iledawan nu rut te langun ne menge ruma niyu ne mibperetiyaya. Ipekita nu ke keupiya ne egkeiringan dan kayi te lalag nu wey ke ed-ul-ulaan nu. Pekita ka te limù dut te menge ruma nu wey ke tidtu ne sarig nu te Eleteala, ne ipekita nu kandan te warà meraat ne netahù te itungan nu su apey sikuna se egkeiringan.

1 Timoteo 5:10

Iyan dà egkepakey ne valu ne ke ed-edatan su meupiya ke helevek din iring be te kinepeneheewit din te meupiya te menge anak din, kinetirapan din te ebpekaan dut te menge etew ne sumeseharey, kinetavang din te menge etew ne mibperetiyaya te Eleteala, labi en ke menge etew ne ebpekeanuyanuy te kerehenan wey misan engkey en ne ketulengeran din ne impekita rin diyà te menge ruma rin.

1 Timoteo 5:2

Ne ke menge meritan ne lukes pà keykew, ne penurua nu sikandin iring te tuney ne iney nu. Ne ke menge raha, ne penurua nu sikandan iring te etevey nu. Ne iyan nu pegitunga kandan se warà misan deisek dà ne meraat ne kayi te itungan nu.

Tito 1:8

Ugaid ne iyan pà mulà se mesakew sikandin te piya engkey en ne etew, ne igkesuat din ke piya engkey en ne meupiya ne ed-ul-ulaan. Ne ed-erangan se ed-ul-ulaan din, metidtu sikandin, ke ulaula rin se ebpekesuhat te Eleteala, ne ed-eren te kiyug te lawa rin.

Tito 2:14

Ne imbeliwas din ke lawa rin ketà te kinepatey rin su apey mekeliyu kiyu te kinekeuripen te salà tew wey apey ebmetilak ke hinawa tew. Ne insivey ki nikandin ne kandin ne sakup ne mibehayan ki nikandin te kiyug te ed-ulaula te meupiya.

Tito 2:2

Igkahi nu rut te menge lukes ne meama ne ed-erangan dà te ed-ul-ulaan dan, ne ed-ulaula te endei se egkeedatan dan wey med-eren dan te kiyug te lawa ran. Ne mebmetidtu se kebperetiyaya ran te Eleteala, medlimù dan te menge etew, ne mebpekeantus dan se edtigker te kemerehenan.

Tito 2:7

Ne sikuna imbe, Tito, ne ipekita nu se meupiya ne ulaula nu ne egketularan su sikuna se egkeiringan dan. Ne embiya ebpenurù ka, ne tidtu te hinawa nu te kebpenurù su apey ran egkekita se tidtu se keykew ne peretiyaya.

Tito 3:14

Ne penurua nu ke menge suled tew keniyan te meguru ran te ebpegelep te ulaula ne meupiya su apey ran ebpeketavang te menge etew ne egkepesangan su apey ke keupiya te peretiyaya ran ne egkekita.

Hibruhanen 11:2

Ne ke menge etew rengan ne nekesuhat te hinawa te Eleteala su egenat dut te sarig dan kandin.

Hibruhanen 13:18

Ne kenà kew ed-engked te kebpengeningeni niyu kenami. Melintad se hinawa rey su warà netuenan dey ne mid-ulaula rey ne meraat, ne iyan dey kiyug ne layun ki metidtu rut te ulaula tew.

Santiago 1:27

Su ke etew ne edtelimà dut te Amey tew ne Eleteala ne metidtu nevenar se kebperetiyaya rin ne arà imbe ne etew ne metau ne edtavang te menge ilu wey ke menge balu ne egkerehenan. Ne kenà dema sikandin eduma rut te meraat ne ed-ul-ulaan te menge etew kayi te ampew te dunya.

Santiago 3:17

Ugaid ne ke etew ne riyà ebpuun te Eleteala se ketampas din, ne arà se etew ne metidtu diyà te etuvangan te Eleteala. Mehalewhalew se hinawa rin dut te menge ruma rin, melimù sikandin, ne laus ne edsepekat. Igkelimù din ke menge ruma rin, ne layun meupiya se ed-ul-ulaan din diyà te kandan. Warà ebpelebien din su negidsan se ulaula rin dut te langun. Ne kenà asal-asal dà se peretiyaya rin su tidtu se hinawa rin.

1 Pedro 1:22

Na geina te mibperumaruma ki en dut te tidtu ne penurù ne egkepakey ne meilut se limù tew rut te menge ruma tew te ebperetiyaya su mibmetidtu ke itungan tew. Tembù be ebpelimlimuey ki egenat te hinawa ta ne kenà kayi rà te bèbà ta.

1 Pedro 2:12

Iyan iya se meupiya ke ed-ul-ulaan niyu su apey egkekita dut te menge etew ne warà pà mibperetiyaya. Su misan ke egkehiyen dan ne meraat se ed-ul-ulaan niyu, ne egkekita ran ded te ini se ed-ul-ulaan niyu ne meupiya ne ketà te hewii ne edlived si Hisus kayi te ampew te dunya ne edeyù dan te Eleteala su atag dut te meupiya ne ed-ul-ulaan niyu.

1 Pedro 4:8

Ne iyan ta ibpeuna te hinawa ta ne egeweran ta te meilut ini se kedlimù ta dut te menge ruma ta ne menge mibperetiyaya. Su embiya tidtu se limù ta dut te menge ruma ta ne misan duen salà dan keyta ne egkepakey ne ebpeseharen ta.

2 Pedro 3:1

Menge suled ku ne igkelimù ku, ini se ikeruwa ne surat ku diyà te keniyu. Iyan ku kedsurati keniyu su ebpetentenuran ku keniyu maa ke benar ne penurù ne nerineg niyu su apey egkepukew ke itungan niyu mekeatag ketà.

1 Juan 3:18

Menge anak ku, ini se ralan te kebpekita ta te limù ta kayi te menge ruma ta ne kenà kayi rà te lalag ne egemew te bèbà ta, ugaid ne kayi te kedtavang ta kandan ne egenat te limù ta.

1 Juan 3:3

Tembù be piya engkey ne etew ne edsarig te edtumanen te Eleteala ini se penareng din, ne iyan iya se mebantey te hinawa rin su apey warà ebpekesawug ne meraat dut te ed-ul-ulaan din iring te warà misan deisek ne meraat ne nekesawug dut te mid-ulaula ni Hisu Kristu.

1 Juan 4:1

Menge suled ku ne igkelimù ku, kenà kew peretiyaya dut te langun ne egkahi ne impekahi ran kun te Kedesenan ne Ebpetuntul te Menusiyà. Ugaid ne perisaan niyu pà ke ebpenurù dan apey niyu metueni ke riyà be ebpuun ini te Eleteala etawa kenà. Su merakel se midlepew kayi te ampew te dunya ne uvag kun te ebpelambas sikandan te Lalag te Eleteala.