Pilipus 1:21 - Ke meupiya ne tudtul mekeatag ki Hisu Kristu

²¹ Su gewii te kayi e pà te ampew te dunya, ne si Hisu Kristu rà se dekelà te hinawa ku. Ugaid ne embiya ebpatey a ne meupiya pà su ebpekelintad a diyà te kandin.

Pilipus 1:21 ပူးပေါင်းရင်းမြစ်များ

1 Kurintu 1:30

Su ke kinepekidseveka tew ki Hisu Kristu ne riyà ebpuun te kiyug te Eleteala. Ne Eleteala rema se ebehey keyta te ketau ibpepevayà ki Hisu Kristu. Ne si Hisus ke iyan kedtengteng te Eleteala keytew ne metidtu diyà te etuvangan din su sikandin se mibpeliyu keytew rut te kedusa te salà tew su apey ki mevaluy ne menge etew te Eleteala.

1 Kurintu 3:22

Su sikami ki Epulus wey si Pedro ne midsuhù key te Eleteala te edtavang keniyu, ne engketà be ne warè en pantag din se ebpemilien key nikiyu. Su langun taman ne mibeelan te Eleteala ne imbehey rin en keniyu, misan ke umur niyu, ke kepepatey niyu, ne misan ke egketemanan niyu en guntaani wey ke keuremà. Uya, langun kayi ne imbehey en te Eleteala keniyu

2 Kurintu 5:1

Netuenan ta te embiya egkereetan en ini se lawa ta kayi te ampew te dunya su iring ini te sabung ta, ne ruen behu ne lawa ne ibehey keyta te Eleteala ne riyà te langit ne kenà en ebpatey taman te taman.

2 Kurintu 5:6

Tembù be lelayun mevag-et se hinawa ta. Netuenan ta te taman ne kayi kiyu pà ed-ubpà te ampew te dunya, ne nekepekeriyù kiyu pà te ked-ubpà ta ki Hisu Kristu ke Kerenan tew.

2 Kurintu 5:8

Uya, lelayun mevag-et se hinawa ta, su iyan ta egkiyuhan ne egkeawaan ta ini se lawa ta ne kayi rà te ampew te dunya su apey kiyu riyà mekeubpà te ki Hisu Kristu ke Kerenan tew.

Gelasiya 2:20

Ne sabap dut te kinesarig kud ki Hisus ne iring te nekeamung ad te kinepatey rin diyà te pinebelavag ne kayu. Su ingenat ketà ne kenà ke kiyug ku se edwayàwayà kedì, ugaid ne ke kiyug ni Hisu Kristu su sikandin se ed-ubpà kayi te hinawa ku. Ne taman te kayi e pad ed-ubpà te ampew te dunya ne idtepeney ku ke umur ku te edtuman dut te kiyug ni Hisus ke Anak te Eleteala ne egkelimù kedì ne midselidig kedì te kebpatey.

Gelasiya 6:14

Ugaid ne siak mulà, ne iyan ku rà igkesuati ne edeyuen ku ne ke Kerenan tew si Hisu Kristu. Su sabap dut te kinepatey rin diyà te pinebelavag ne kayu su atag te salà tew, ne neekaran ad dut te nekeiket kedì ne kiyug te kememenusiyai kayi te ampew te dunya, su warà en atag din kayi te kedì.

Pilipus 1:20

Su dekelà se egkepenareng ku wey ke sarig ku te ebpeketuman a rut te langun ne insarig te Eleteala kediey su apey warà kegkeyeyai ku. Nasì pà se iyan ku kiyug ne ed-iseg pà ke kewalew ku te ebpesabut te Meupiya ne Tudtul su apey guntaani wey ketà te hewii ne ebpekeuma ne siaken se puunan te kegkereyù ki Hisu Kristu taman te biviyag e pà etawa misan ebpatey a.

Pilipus 1:22

Ne embiya kiyug te Eleteala se ked-ubpà ku pà lavew kayi te ampew te dunya, ne tembù pà engketà su ruen pà ibpehelevek din kedì. Embiya ebpepemilien a te ebpeubpaan pà kayi te dunya etawa ebpatey, ne kenà ku egketuenan ke endei rapit kayi se meupiya.

Pilipus 1:23

Su iring te nevaad se hinawa ku, su ruen arà se egkesuat ad ne ed-awà kayi te ampew te dunya ne ebpekiduma en ki Hisu Kristu su arà en iya ke meupiya te langun.

Pilipus 2:21

Su ke menge ruma ne iyan dan ibpeuna te itungan ne ke kandan ne keupianan ne kenà arà ke ibpeulaula kandan ni Hisu Kristu.

Kulasi 3:4

Ne si Hisu Kristu se ebehey keytew te behu ne umur, ne ketà te kedlived din kayi ne egkeheram tew rema te raman te keupiya rin su ebpekeruma kiyu kandin.

Imperayag 14:13

Ne ketà ne ruen suwara diyà te langit ne nerineg ku ne edlalag kediey ne migkahi te, “Isurat nu ini: Igenat guntaani ne egkehalew ke menge etew ne ebpatey embiya mibperetiyaya en ki Hisus ke Kerenan. “Benar iyan,” ke migkahi te Kedesenan ne Ebpetuntul te Menusiyà. “Egkehalew ran su ebpekeimeley ran dut te mepasang ne helevek dan su ruen lalew ran dut te meupiya ne mid-ulaula ran.”